寫blog我唔太中意寫流水帳，不過其實我都好想記低成個旅程去過嘅地方做過嘅事。咁啱臨去京都前喺YouTube睇咗條人地剪得好好嘅旅行vlog，咁我咪又心思思學下人地剪條片囉。一條片睇晒我成個trip好過我打咁多篇blog齋睇文字咁悶😂😂😂 第一次拍片剪片唔算太好，希望大家多多指教🙇🏻♀️
Month: March 2017
京都大阪行 – 輕鬆自拍小心得
有朋友問我究竟自己去旅行啲相係點影，其實而家有好多人都有寫關於獨遊影相技巧嘅blog，仲要好鬼勁啲相影得好鬼靚添！我獨遊自拍其實用嘅方法都大同小異，分別都係要有腳架、相機/ 手機、同埋後期執相，但當然我就冇咁pro啦。呢篇就講下我自己獨遊自拍嘅小小心得先。
首先因為我非常懶嘅關係，好怕出去玩時要拎好多野同重野，所以我自從轉用iPhone之後直頭連相機都唔再拎了。你地見到嘅所有相都係用iPhone影，quality當然唔可以同單反或者半單反比啦，但放上Facebook或者Instagram呃like及自己手機電腦睇我覺得已經非常足夠。至於腳架，我以前直頭連腳架都冇用，只係一個夾夾住個電話等佢可以企喺度，再喺現場搵啲野墊高或者就咁放地下就算。不過呢個辦法可以自拍嘅地方同角度都好有限，所以我今次就買咗個高身啲嘅八爪魚腳架，貪佢夠輕身又唔太佔位，唔用時放喺背囊等我唔使長時間拎住佢，喺有柱嘅地方佢隻腳又可以繞住又增加可以自拍嘅地方同角度，非常方便。我喺觀塘廣場買平平地都係幾十蚊，如果你有時間可以等得切上淘寶買可能都係十幾廿蚊港紙咁上下，所以八爪魚腳架我覺得好值得買！
影嘅時候搵個靚位set好腳架之後，我都會喺個畫面睇我應該企咩位記低個位置，再set十秒timer影。因為得十秒所以要快位置都唔好太遠，位企唔準或者唔啱心水最多影多幾次。通常我都會來回十幾次先影到啱心水，但後期影慣咗其實都大約五次已經收貨！所以大家多多練習就OK 😂😂😂
腳架＋現場環境（石駁/ 欄杆/ 柱/ 樹 / 櫈）做set鏡頭示範:
腳架就咁放地下set鏡頭示範:
不過總會有放唔到腳架嘅時候，例如人太多。不過個腳架一樣都有用喎，當佢係自拍神棍做成手臂嘅延申，角度同影嘅範圍都可以多啲啲。
跟住比大家睇下啲失敗嘅例子，其實真係要不斷咁試位呀試鏡頭先影到啲滿意嘅相㗎。
最後就係講後期執相喇！其實我覺得iPhone個photo editor已經好足夠，最主要要執都係扭返正張相啦（因為有時set個腳架好多時都唔係完全直嘛）、唔夠光就校返光啲、校返sharp啲顏色咁囉。如果我張相有放上Instagram就會加少少佢啲effect囉，咁大家想再玩多啲effect嘅vsco呀April呀都好好用㗎。
好啦以上就係我小小自拍心得，唔係啲咩專業技巧但勝在夠輕鬆方便。如果大家都有啲咩心得不防開心share下？
京都大阪行 – 來個細細嘅拉麵品評
曾經有個舊同事同我講過佢好想寫一本日本拉麵天書，食均晒日本所有嘅拉麵店。其實我覺得佢呢個idea非常好，希望佢可以做得到啦😂 自問我就冇能力食得晒所有拉麵店，不過今次去京都大阪我都食咗4間拉麵⋯⋯無他，因為真係有好多拉麵嘅選擇而我又真係間間都想試下喎，但當然真係食唔落咁多啦哈哈！好就等我品評一下我試過呢幾間拉麵店比大家參考下（嗱口味嘅野好個人，我覺得好食你地未必覺得係，所以戴定頭盔先哈哈）
京都車站拉麵小路 – ますたに （好味指數: 3.5/5)
喺京都車站伊勢丹10樓連住嘅拉麵小路，有齊8間日本唔同地區嘅拉麵店，有東京、札幌、富山、大阪、京都、博多等等等（其他唔記得咗自己上網google下啦）我記得東京嗰間大勝軒係好多人排，咁我一場嚟到京都梗係試返主場啦所以我就去咗代表京都嘅ますたに喇。
如果我冇理解錯門口嗰張poster呢佢個湯底應該係雞湯，但一樣都係好濃郁得嚟而冇左豬⻣湯有時會有嘅酥味，麵就係硬身幼麵。由於呢餐係我嘅早餐（係呀第一朝喺京都一起身出門口就食拉麵喇好堅😂）所以就食普通叉燒拉麵，正常份量唔會太多。叉燒好淋好唔係乾柴，麵硬度適中，加埋啲䓤花係好食嘅，但個湯都係有啲啲偏咸，所以湯精如我飲剩大約三分一到。提提大家拉麵小路開11點，所以唔使咁早去，我就係太早10點半去到全部都未開門只係準備中，結果都係行下伊勢丹先再返去食拉麵。
大阪道頓堀 – 花丸軒（法善寺店）（好味指數: 4.5/5)
道頓堀磯丸水產轉入去嗰條街（好似叫千日前街）有好幾間拉麵店，呢間花丸軒就係喺嗰條街。我其實都係上網睇過人地話呢度食「幸福拉麵」我先有留意呢間，咪就係嗰塊呃like紫菜上面印住「結緣」所以我覺得一定要去食囉（女人就係好鬼易呃😂）。
不過其實佢個麵真係一啲都唔只係呃like，佢個醬油湯底係非常濃味！好啱我呢啲重口味嘅人！塊肉係比一般叉燒要厚身嘅豚肉仲有少少燒到焦邊好香好入味又淋，麵就係一般粗幼度都係軟硬適中。碗湯雖然濃味我又唔覺得佢好咸所以我都差不多飲晒！我叫呢碗都係正常份量，我見到佢menu有碗叫Double Happiness（佢係有英文menu唔怕唔識睇）我諗意思應該係加大啦但價錢好似都係差唔多。我見到佢枱面其實有用日文寫住要玉子同泡菜就出聲唔使錢⋯⋯隔離兩個日本妹係有攞到嘅，不過我又唔係好想食蛋就冇謂浪費喇。花丸軒仲要係24小時營業，我行到夜晚9點幾入去都唔使排隊喇，所以大家想食嘅夜啲去都唔怕！
大阪道頓堀 – 三豐麵 （好味指數: 4/5)
三豐麵就喺花丸軒對面，唔算好起眼所以冇人排隊！其實我都係上網睇見呢度有沾麵食所以我mark底嚟試。
我叫左個魚湯沾麵。首先我一定要講下佢個麵，因為真係超級好食，而且佢話係自家製麵所以真係好唔一樣！佢係粗身麵，好鬼煙韌彈牙！雖然唔係曲麵但都好掛湯喎。個湯呢聞落好香魚味，但食落就偏咸，尤其食到差不多到底湯開始凍直頭覺得佢好咸。不過其實都係好食嘅，最多飲多啲水囉哈哈。
嗰湯入面配料有玉子有豚肉有筍，豚肉似五花腩好鬼厚身，反而塊肉唔係好有醃過咁但加埋啲湯嘅咸味又啱啱好喎！如果想食沾麵嘅我都推薦大家黎試試！
大阪道頓堀 – 金龍拉麵 （好味指數: 2/5)
我見佢有成兩間分店，其中千日前轉角嗰間仲要排隊，於是我咪係臨走前嗰個下晝試下佢囉。
我去咗佢後啲嗰間舖食，舖面大啲唔使排隊。全店都係用自助形式，好似見到有白飯提供添。老實說，我覺得佢舖面座位同枱都係好污糟！好似香港嘅大X食咁囉唔會想坐得耐食完快快走。
我又係叫普通叉燒拉麵，成碗麵包括湯叉燒同麵都只係普通，甚至乎我覺得只係比香港式拉麵店好啲啲咁囉。除咗價錢平之外（呢碗只須600yen）我諗真係冇咩吸引之處，所以大家可以慳返食第二間喇。
另外道頓堀仲有一間四天王其實我都想試，但因為條隊太長我唔想排所以作罷。不過上網睇啲comment都好兩極化，就唯有下次有機會自己親身試下啦。
同場加影，都係講食嘅不過唔係拉麵。我喺京都有兩餐嘅食店我想講下。
京都烏丸七条通 – へそ
我覺得日本立食文化其實幾好喎，尤其係租金咁貴嘅地方梗係用最少嘅地方容納最多嘅客人做多幾單生意先係最實際嘛，客人都係快食快走企下都冇乜所謂啦。我第一晚到咗京都check in咗我住地方都成夜晚10點，好鬼肚餓於是就周圍八下睇下有冇野食。我住嗰邊喺京都塔後面嘅商業住宅區，行出去烏丸七条個路口其實都只係兩三個街口，我見呢間居酒屋呢個時候仲咁多人第一時間衝入去睇下menu啱唔啱食喇。
佢除左最入面有一張枱比人坐之外其他位置都係企位，但我見啲人立食都企好耐飲酒食串燒吹水喎，當然都有啲打工仔好似我一條友咁快食快走啦。我被安排咗喺吧枱位置，喂真係好鬼貼心囉仲要有埋唔同電話腳差電線比你一邊食住一邊差電話真係太好喇卦？！食物都係一般居酒屋嗰啲野啦，我叫咗個烏冬鍋食，見呢度氣氛咁好忍唔住都叫咗杯生啤啤一啤佢。好似都有啲分店大家都不妨搵下嚟試下啦。
京都餃子之王將
哈哈係咪諗有冇搞錯呢間都講，其實我覺得呢間野有啲驚喜喎，驚喜在於佢個價錢點解可以咁平？有晚我又係搞到好鬼夜成10點先搭巴士喺烏丸七条落車，見冇食正餐有啲餓喎咁啱一落車就見到佢咪衝入去醫肚囉。佢有一個menu叫”just size menu”，樣樣分量都係細嘅啱晒我呀！我叫咗呢個menu嘅餃子一份（三隻）同炒麵，個炒麵係OK㗎喎唔差，啲汁冇話杰撻撻咁，細細一碟仔夠我食喇唔使太飽等我可以去便利店買布甸食😂。
我坐樓下吧枱，側邊全部都係收咗工嘅打工仔嚟食野。我見佢地大部份人都係食餃子，仲要係大份12件打孖上😂 嗱我咁樣食兩樣埋單500yen都有找抵到爛啦！
京都大阪行 – 豪食湯豆腐宴抵唔抵食？
睇人地啲遊記見到話京都出名係豆腐，於是今次專登安排自己豪食一餐豆腐宴。
今次去京都我有做足功課上網搵定資料（嘩我今次真係唔算hea遊囉雖然都係唔排日程同路線），京都都有好幾間出名專食豆腐宴嘅餐廳，因為我唔打算去清水寺所以就冇去老店奧丹（如果大家食過奧丹請話我知好唔好食），所以我㨂左嵐山間湯豆腐嵯峨野嚟試喇。
我朝早十一點到嵐山租左部單車周圍玩，踩到差不多一點見肚餓就踩過嚟湯豆腐嵯峨野食飯喇。餐廳喺近天龍寺嗰邊，咁我踩住單車由二尊院踩過去一路搵踩都唔算好耐，但如果冇單車我建議大家喺嵐山站或者喺天龍寺附近行開就去喇無謂好似我咁去到咁遠（雖然嵐山其實都唔係好大）。
餐廳係日式庭園嘅裝潢，再加上入面播埋好寧靜嘅三味線音樂，感覺好襌。餐廳獨沽一味只有一個set，盛惠3800yen，我數過連埋碗白飯同甜品總共有十一樣野。
其實如果大家食飯一定要有肉的話呢一餐真係唔啱你，因為佢真係全豆腐造嘅菜式同蔬菜，我記得小碟有豆乾、花生豆腐、最左邊嗰碟好似雜菜豆卜咁、溫泉玉子、柚子醬蒟蒻、有啲漬物同魚乾、野菜天婦羅，當然唔少得係湯豆腐6件。啲豆腐真係好味，好香豆味，好滑冇渣，但又唔係百X滑豆腐咁流嘅滑，最勁係佢一路滾住都唔老或變鞋。其他野其實都係好味嘅，但係咪好味到會「嘩」一聲咁叫出嚟又未至於囉。
可能我喺香港食嘅所謂日本南瓜其實都係大陸嚟，當我食到呢個真正嘅日本南瓜真係「哇」一聲，好甜好粉好好味！（我知我食緊豆腐宴主角係豆腐唔係南瓜，但我真係不得不讚嘆佢因為好耐冇食過咁好食嘅南瓜！）另外甜品我本來以為係日本人好中意嘅杏仁豆腐，但其實佢係真正豆腐布甸，加左少少士多啤梨醬唔太甜但好滑溜好鬼好食！
好喇就如題目問題成港紙二百六蚊究竟抵唔抵食呢？老實說齋睇野食我覺得呢個價錢好味指數應該可以再高啲，不過就環境同服務態度係非常一流嘅！所以我都會推薦大家嚟試下！
望住出面個日式園景食飯再聽住佢啲三味線音樂確實係好relax!
京都大阪行 – 懷舊日式cafe超好味厚蛋治！
二月又抵唔住旅行癮於是乎又自己飛左去京都同大阪喇！
其實呢兩個地方我都去過，五年前仲要係五日入面去晒大阪京都奈良有馬，所以京都我只係留左半日著套浴衣行左清水寺就走喇。今次再去當然就要稍為深度遊啦，於是就喺京都留左三日，大阪就留兩日shopping!
因為今次喺京都同大阪時間充裕，可以比多啲時間走圍行發掘下啲小店小cafe。今篇我想講兩間我覺得好得意嘅日式cafe。第一間係喺京都，某日我去三十三間堂行經呢間cafe，已經比門口佢貼出嚟嗰張日式厚蛋治嘅相吸引（當時嘅我係超餓！）嗱嗱淋去完三十三間堂出嚟就去左呢間cafe食佢嗰厚蛋治同飲杯cappuccnio醫肚抖抖先。
間cafe有兩層，我冇上樓所以唔知係咩樣，但樓下呢層面積唔大，只有一張長bar枱同靠牆兩張細枱，好有家庭feel。我一條友就揀左bar枱坐，一路食一路睇住出面啲人行過又發下呆咁好舒服。我入去嗰時都差不多4點，但都keep住好多人入嚟飲咖啡。
就係呢個厚蛋治（其實人地個名叫japanese style egg sandwich）所以先吸引我入嚟食野㗎喇！果然係不負我所望係超級好味！！！首先佢塊多士真係非常軟熟，玉子真係好厚冇呃人，跟住夾住啲漬物、紫菜、鰹魚碎，仲有少少鰹魚汁同蛋黃醬嘅味道，你估佢唔到係咁好食！！！唔係講笑，呢個蛋治真係成為我呢個旅程食過嘅美食第一位！！！（嘩每次睇返呢張相都好想再食！）
喺返香港嘅早上我見有啲時間就去左通天閣行下。其實我未去過呢一區（或者好細個嗰時嚟過？但我真係冇印象），我覺得嚟通天閣呢一區簡直好似返左7 、80年代咁，所有商店、建築，甚至乎人都係來至嗰個年代咁，都幾得意。可惜我太早去，10點幾好多舖頭都未開門。因為我又未食早餐所以又搵地方醫肚先。行來行去通天閣樓下都係食炸物或者係啲大大份定食，睇個樣都好呃遊客咁，於是我又開始亂行，行左去另一邊一個唔知咩嘅車站出面就見到呢間堅係舊嘅cafe！
間cafe其實真係唔起眼，不過我望入去又見到都坐左啲人喎（雖然全部都係上左年紀嘅人😂），我都唔知有冇野食㗎不過都入左去先啦。
細細間cafe一眼望晒，有一張bar枱同幾張細枱。我諗老闆都係做開街坊生意，所以都同客人一邊吹水一邊煲下煙咁（題外話: 其實點解日本冇室內禁煙？雖然日本人都好自律路上完全冇火車頭）。啲裝潢全部係7 ，80年代咁，雖然舊但一啲都唔殘，喺入面飲咖啡我覺得時間就好似停左咁。
cafe餐牌都係只有啲好簡單嘅輕食，同咖啡、紅茶同朱古力。由於仲係早餐時段，老闆示意有簡單早餐提供。
佢個早餐真係好簡單，只係幾塊多士同一隻烚蛋加一杯咖啡，真係好家庭feel。咖啡都幾好飲喎，呢個份量對我嚟講已經夠喇我唔使食太多仲有係夠營養就得喇反正我係諗住之後返道頓堀隊多個拉麵先走 😂 有時食野都唔一定要食複雜野嘅食啲簡單野同食下嗰度氛圍都可以好enjoy！
間cafe就喺呢個唔知去邊嘅車站隔離，其實我懷疑個車站係咪都冇人用⋯⋯
Live Your Dream 