2016年我最大嘅成就!!!

2016年剩返一日,呢一年其實做好多野都係失敗。失敗野就唔多講喇哈哈,但有一件事竟然喺唔經唔覺之下成功了!就係我成功減左15lbs!!! 你冇睇錯!!!係15lbs!!! 可能你會覺得15lbs都唔係好多啫,係呀的確唔係好多我自己都唔覺得我有瘦左咁多,但我由最高峰140lbs再多啲到而家125lbs,呢15lbs真係好critical. 同埋 125lbs係我好多年都冇見過嘅數字,所以當我見到呢個數嗰一刻我簡直係唔相信我自己對眼!😭😭😭

其實我以前係非常介意比人知我有幾重,我直情係連自己都唔想知自己有幾重所以好少磅重,只知道自己大約係130-135lbs咁上下好多年。直到年頭我有一日上磅磅下,先知原來我已經肥到140lbs…嗰時嘅我食野好放肆,又眼闊肚窄,又懶完全冇運動 ; 食野嘅習慣係朝朝奶茶+腿蛋治或者M記做早餐,晏晝公司buffet又食沙律又熱盤仲要食埋甜品,就算唔喺公司食都係日日出街食晏。夜晚就一定係出街食飯(其實而家都係晚晚出街食)。生果同菜好少食,好彩嘅係我唔算好好零食,不過因為太中意食野所以食親飯都會駁老命咁食。

前言講得太長添,其實我呢篇blog唔係要講減肥嘅方法,而係想講我而家嘅生活習慣嘅改變,呢15lbs只係我嘅改變嘅indicator. 我而家嘅習慣冇話啱定唔啱,只係我終於搵到一種方式我舒服又令我過得健康啲仲可以有效咁減到磅。所以講出黎都係純粹分享下唧。

喺我大半年前我離開左我對上嗰份工,跟住放左大約個幾月嘅長假,有時間終於可以諗諗點樣改變下食野同生活習慣。首先我諗到嘅係我要食少啲街外野,自己煮飯。由於我其實都係好懶,要我餐餐開火或者餐餐諗今餐煮乜我諗我會好快放棄,所以我喺youtube睇左好多meal prep嘅片,學人地點樣meal prep. 以前我會覺得日日食一樣嘅野好悶啫,但而家睇多左學多左唔同嘅食譜,一星期可能有兩三樣唔同嘅野,加上係自己煮,都唔會嫌棄嘅。反正我都只係午餐係咁啫,晚餐我都出街食嘅所以真係冇所謂。就算我返翻工,我都係prep meal午餐帶飯。我通常都係星期六或日煮晒五餐,兩/三餐放冰格急凍住,帶飯前一晚拎定出黎放雪櫃解凍。

我煮都係啲簡單野,多數都係雞胸雞翼豬扒三文魚蝦仁呀咁,有時唔想食飯就煮意粉或者炒烏冬。不過個飯盒一定有一半係菜,炒又得就咁淥又得,不過去到而家我多數都係淥,因為快嘛,淥完加幾粒鹽同黑椒或者味椒鹽就食得。不過唔係隻隻菜都可以急凍再解凍黎食,因為有啲解凍之後會出好多水跟住啲菜會好soaky好難食,我試過咁多隻菜so far最穩陣都係西蘭花同椰菜。中式菜好似菜心嗰啲就試都唔使試因為實黃好難食。

img_2850
如果有打green smoothie嗰日早餐飲埋,weekend朝早時間多啲食得好啲心情都好啲。

除左自己煮自己帶飯,早餐我而家多數都係食麥皮或者cereal。啱啱開始嗰時我早餐日日係麥皮+一隻香蕉,但原來香蕉好鬼寒涼我唔知道,我自己又係寒底所以食左大概一個月身體唔受得我就唔敢再日日食。所以真係要睇個人體質唔係人人啱嘅習慣你一定都啱。星期六日早餐就係麥包多士,有時加半個牛油果,有時就咁搽我最愛嘅speculoos butter+花生醬。想食鹹嗰時就煎隻蛋放上多士度食。

其實我而家除左每餐份量食少左,其他時間都係密密食(我啲同事話成日見我都喺度食野😂),不過我就食聰明左,會自己帶啲snack返工食。我好中意食香口野所以最常食係granola bars, 試過好多隻我最中意係食Nxture Vxlley嘅Honey & Oats.

img_1877
試過好多隻都係Nxture Vxlley最好食,左下759買呢個牌子甜到阿媽都唔認得我覺得好伏。隔離呢隻澳洲野muesli bar我覺得都係麻麻地因為佢唔脆口。

通常做做下野10點幾11點左右就會肚餓就隊一條(一包兩條我食一條),或者有時我朝早會烚一舊日本蕃薯仔或者一隻蛋拎返工。要治口痕嘅時候就食nuts(杏仁居多)或者藍苺呀提子呀咁,總之多數都係食啲冇乜加工過嘅野就冇死。但我又未至於完全唔食其他零食嘅,M記呀薯片呀朱古力呀一個月食一次半次唔死得嘅,又無謂要抑壓到自己咩都唔食咁唔開心咁辛苦啦。

食野大致上講得七七八八,跟住就係最重要嘅野就係做運動!!!呢個係我今年最值得比自己掌聲嘅事情,以前嘅我都有做過下運動,但永遠都唔可以堅持,可能三個月我就會停左唔做。但今年突然開竅,覺得其實我唔應該追求變成瘦到條籐咁,應該要練有肌肉先啱我。所我開始睇youtube學一啲練肌肉嘅workout,做下plank squat crunches等等呢啲屋企都好容易做到嘅動作。之前我都有去跑步,但跑步真係唔係我中意嘅運動,所以夏天後來轉左游水(其實唔係好識游㗎咋都係慢慢跟朋友學返)。而家我嘅習慣係每日朝早做4分鐘運動,plank squat crunches push up各一分鐘,夜晚得閒無聊又再做下(但都唔係日日係咁)或者訓覺前拉下筋。星期六日就做半個鐘tabata,youtube有好多tabata嘅tutorial自己中意做咩動作做幾耐悉隨尊便,總之自己覺得舒服就可以又唔使做到半死咁。其實講完我真係唔算做好多運動,不過可以堅持到日日做,就算只做plank一分鐘,唔覺唔覺半年腰間啲肥肉就會減左好多!呢個真係堅!因為我真係咁樣call機肉同肚腩都冇左好多,條腰減左兩吋!!!

大致上係咁上下喇仲有啲其他鎖碎嘅小習慣有機會先再講。另外我都有食幫助做運動時增加消脂效果嘅supplement不過真係做運動時先食佢(日日4分鐘嗰啲我冇食),呢個對我都幾有效果但前提都係要做運動!!!講左咁耐大家可能會話「車得個講字冇圖冇真相!」所以我都掙扎左好耐唔怕醜地放我半年前後嘅對比照大家睇下⋯⋯

collage_may-dec-2016左邊係5月頭嗰時影,右邊係呢個星期影嘅,前後相隔8個月。嗰時手臂仲好好肉地,而家手臂雖然唔可以叫瘦,但睇落都已經冇咁肥又冇咁脹喇 😭😭😭

好喇我要再講一次磅數都真係只係我改變嘅indicator,真係唔係要鼓吹追求輕磅。我其實都唔係成日磅住都係記得先會磅下,反而我會keep住幫自己身體影相,好似好自戀咁但咁先會見到自己身體嘅改變,見到自己無啦啦開始隱隱有啲腹肌其實仲大鼓舞 😂

即係呢我呢個細個已經係肥妹仔懶左十幾廿年變成肥婆嘅人變成而家呢個樣我相信真係冇野係冇可能,所以大家共勉之!!!💪🏻💪🏻💪🏻 我會keep住練肌肉!!!

最後祝大家新年快樂同進步!!!

Advertisements

台北食食食 2

上篇講左啲麻麻嘅餐廳,呢次講啲好食或者氣氛好嘅餐廳!

無老鍋 (中山店)

真係好慚愧,去過幾次台北但都未試過喺台北食麻辣鍋 😂 所以今次就提出去食,而朋友就好醒目咁book左喺我地酒店附近呢間無老鍋打個10點鐘嘅late dinner邊爐!

一入到去已經聞到好大陣麻辣香心情非常興奮!我地怕辣得滯叫左個鴛鴦湯底,少少地叫左啲肉呀菜呀帶子滑呀同埋佢出名嘅冰淇淋豆腐。辣湯其實都冇想像中咁辣不過好惹味!個冰淇淋豆腐其實即係雪硬左嘅豆腐但索左啲湯之後好好味!另外餐廳坐位闊落服務仲要非常好!我地其實都食唔晒啲野,埋單每人都係一百蚊港紙多啲啲真係抵食到喊!

一支支豬骨湯放定喺度比你加湯用真係好細心。打邊爐配支凍嘅台灣菠蘿啤真心正!

Coffee Stand by me (赤峰街)

赤峰街一帶好好行好舒服,有好多小店賣野同cafe或者餐廳食野。嗰日好鬼熱我地行行下好想搵地方坐底飲野,記得有經過呢間好似吧嘅cafe好得意於是我地就行返轉頭去飲野喇。

img_2127

img_2125img_2158img_2171

呢間cafe有賣手工啤亦都主打手沖咖啡,但我地呢啲咁唔文青嘅人加上嗰日又熱到hihi梗係飲啤酒啦。舖頭細細一張長吧枱同門口兩三個座位,但因為地方同裝修好舒服,加上嗰日又平日出面又唔多人真係坐到唔想走。

聽講呢間時代1931日本野幾好食,不過我地去時佢已經落左場。

非常酒 rare MALT Barrel (大安區)

呢度係朋友帶我黎飲野,聽講係出名飲whisky嘅酒吧。其實我未試過去whisky bar所以我覺得都幾特別。因為唔知點去又夜嘅關係我地係選擇搭的士去唔使煩!

img_2209img_2205img_2202

飲野嘅地方係喺地庫,地面係賣酒同雪茄嘅舖面。我覺得呢度氣氛好好,其實地方好細,只有一張吧枱同一個包廂。我地嗰晚去有外國人有台灣人又有日本人,原來係要訂位但我地冇訂到,所以哥哥就安排我地坐係僅餘嘅一張枱仔。其實我唔識飲whisky所以bartender哥哥就問我地想要咩類型嘅whisky再幫我地揀,我都唔記得佢幫我㨂左邊隻whisky,我只記得係易入口同有少少花香味嘅,好好飲呀真係!價錢我都唔係好記得了好似一百蚊多啲咁上下啦都合理價錢啦。

我蒲頭了+(九月)台北食食食 1

我原來有成大半年冇寫過blog。

而家嘅工作每一日都係不斷地寫冗長嘅罐頭文字,加上長途跋涉嘅上落班車程,返到屋企已經完全冇心機諗野打字。另外星期六日多數都忙於煮飯做運動同偷懶,我承認我嘅生活已經變成好routine,完全冇野好寫了。

不過今日我想蒲頭say個hi! 大家近來好嘛?😂

其實九月中秋節黎左個好短快閃台北,主要都係想飛想離開下hea下同食下野,反正好幾年冇去過台灣已經out晒。兩條友買左機票book左酒店就去喇,又係唔plan行程,我只係咁二喺facebook睇左啲介紹台北食野嘅地方bookmark左就去。

我先講左嗰啲我就係跟bookmark去食野嘅地方,究竟係咪真係介紹咁正咁好食呢?

瞞著爹二店(微風廣場後面)

我諗而家個個去親台北都會去食日本刺身丼,價錢親民又足料。反正我未試過一朝訓醒就諗住試下,見呢間瞞著爹都有人介紹,又唔難搵所以就去喇。

img_2329img_2327

舖面細細整到好日和feel咁係幾有特色,入去坐之前要先點餐比錢先,我同個friend大家都叫左呢個海鮮丼再好豪氣咁加海膽!碗仔細細但上面舖滿刺身真係好吸引,不過⋯⋯其實我覺得唔係太好食。係咪好反高潮呢哈哈?唔知點解一入到間舖我已經覺得腥腥地,呢碗飯嘅刺身其實都少腥,仲要佢只係喺飯面加左少到唔係好覺有嘅份量嘅豉油。我明白食刺身唔落咁多豉油係要食佢嘅鮮味,但我真係覺得佢唔係鮮係腥!實在係頂唔順我最後要問侍應哥仔拎豉油⋯⋯只可以講一分錢一分貨,想食好味到喊嘅刺身丼都係去返築地食海膽飯啦(趁佢未搬之前)😂😅

Matcha One (永康街)

我真係好耐冇去台北都唔知道永康街而家變成咁多野睇。呢個Matcha One喺永康街深深處,唔算難搵,新開張又好似好有個性咁所以人氣度爆燈。我地嗰日去到三點左右要等位,等位嘅人有台灣人香港人連日本人都有!

個店面走簡約路線,因為人多所以入座都有限時。我地三點幾入坐都已經有好多野賣晒!我等位時見到呢個哥仔好有架勢咁打抹茶同倒抹茶咁,杯野又白又綠咁好吸引,所以就叫左呢杯珍珠抹茶鮮奶。本來想食佢個抹茶千層蛋糕,但賣晒得返焙茶味,都試下啦咁。另外朋友叫左個抹茶芭菲但冇入鏡。先講杯珍珠抹茶鮮奶⋯⋯嗯⋯⋯可能抹茶實在太少,我覺得其實係飲緊鮮奶!個焙茶紅豆千層蛋糕OK啦咁,另外朋友個杯冇入鏡嘅抹茶芭菲據講都係OK啦。其實你問我覺得係咪值得排隊等咁耐黎食佢我覺得唔係好值,不過旅行一場咩都試下啦冇咩所謂。

我唔係咩食家呀以上都係我個人意見,不喜勿插!又為免比人話咩死港女去台灣但食日本野又要彈三彈四咁我帶定頭盔先我知想食好味日本野一定係去日本啦唔使鬧我,所以呢下篇我會講返台灣好味餐廳!