我的快樂不丹之旅 － 行上虎穴寺，我足足行左一棟ICC！

好喇終於可以的起心肝再繼續寫我嘅不丹之旅。

成個不丹之旅嘅高潮一定係行上位於海拔三千米上嘅虎穴寺！基本上每個去不丹嘅遊客都一定會上虎穴寺，冇上過嘅話應該都唔算黎過不丹。（就連早我兩個幾月去嘅王子同王妃都上你就知啦！）

其實我好少行山，所以之前上網睇人地講話行左三個鐘上山同三個鐘落山我已經諗我會唔會頂唔順？甚至乎幾個月前我已經諗使唔使練定啲體能先呢？最後其實都冇刻意去練體能嘅，不過因為我都係一個唔怕行路嘅人所以有意無意就行多啲路練腳骨力咁囉。

之前講過因為呢個時候算係不丹旅遊淡季，成個不丹嘅旅程頭四日我地都好少見到人。但我地上虎穴寺嗰日咁啱撞正佢最重要嗰個chamber嘅一年一度開放日，所以我地上山嗰日係超！多！人！我懷疑成個不丹啲人有一半都黎左上山！

平時阿導遊都好就我地時間九點或者九點半先出發，但嗰日可能一來人多二來又知我地行得慢，所以要我地八點出發，好啦冇所謂啦行山係應該要早啲嘅。於是早餐食飽飽我地就開車出發去虎穴寺山腳嘞。話雖虎穴寺係海拔三千米，但其實又唔係真係行足三千米高嘅因為不丹本來就係喺高海拔，所以實際係由大約二千米多啲開始啦。後來我check返iphone嗰height climbing track，哦都唔係好高啫都係行左109層之嘛即係一棟ICC咁啫 XDDDDD

嗰日天氣其實麻麻，開始時都冇雨，但大概行左半個鐘就開始落雨，雖然未至滂沱大雨但都唔係細，加上山路好多泥濘其實好滑好跣！好彩阿導遊教練比左支行山棍我地，如果唔係我真係行唔到⋯⋯  其實上山有一半路係可以比錢騎馬仔上嘅，但阿導遊教練一開始就叫我地行完全冇問過我地要唔要騎馬仔，去到大概三分一先同我講話呢日落雨人又多唔好騎馬仔有啲危險喎。不過我後來都覺得佢啱嘅，因為啲路其實唔闊又好近崖邊，坐上左隻馬仔度仲高啲應該會驚啲，加上嗰日啲路跣應該會仲驚！同埋其實自己行晒全程行完之後成功感真係好大！

 一開始嘅山腳只係出現好短暫嘅平路。我地已經拎住支竹行都覺得辛苦，睇下啲本地人大包小包仲要揹住小朋友行真係好勁！

 上山就係可以騎呢啲馬仔喇！不過你睇其實條路唔闊人馬爭路，讓路就要唔係人行到邊邊就馬仔行到邊邊，都真係幾牙煙！

一開始我問教練其實全程行到上山要幾耐，佢話大約個半鐘，佢九個字都行完喎。咁我真係相信佢應該真係行九個字都上到因為佢大大話話行左一百次仲要佢條友仔係著住件國服行又行得超快但氣都唔喘汗都冇一滴！我行左半個鐘已經成件衫濕晒！

點解我叫佢教練，你睇下佢就係全程行山竹都唔洗汗都冇滴又行先我地成條街再遠處回望我地比壓力動力我地等我地行快啲囉。再睇下條路，呢啲真係叫唔係路⋯⋯

一路上其實都真係本地人多，一家大細有老有嫩咁，帶晒野食同一大壺拉茶上山，仲有啲話係印度過黎嘅僧侶，可以知道呢個開放日係幾咁重要。

 行行下阿教練又撞到熟人。呢位係佢妹妹嘅好朋友，成家人一齊黎上山，佢地帶晒自己整嘅餅同拉茶上黎行，咁啱喺度抖抖就請埋我食餅飲茶。

行左大概兩個半鐘終於見到個虎穴寺！個虎穴寺真係好有氣勢因為佢就係起喺個懸崖邊！不過見到佢其實都係未到，因為差不多到虎穴寺最後呢段路係又落又上嘅樓梯，啲樓梯又企又大級加上嗰時仲落緊雨又超多人我覺得係比山路更難行嘅路段！

 嗱黎到呢個位見到喺對面，都要再又落又上行埋啲石梯先可以入到去！大家可以按圖放大睇下無論虎穴寺出面條樓梯入面上下層平台全部都塞滿人！

咁多人為左要入去一年開放一次嘅呢個咁重要嘅室其實就係據講當初寧波車騎住飛虎飛到黎呢度，並且喺呢個山洞閉關修練左三年三月三日，虎穴寺都係因為呢個山洞以得名。呢個山洞係寺嘅低層，我諗平時呢個位應該係冇人，但我地上到去遠處望過去已經見到全部塞滿晒人。聽講當地人要入去係要排好耐隊，但唔知導遊教練係咪真係相識滿天下到連門口實Q都係佢啲friend（一路上佢係不斷撞到朋友、家人朋友、前女友等等XDDD，真係懷疑佢係咪成個Paro嘅人都識晒！），竟然比我地優先入去！門口實Q仲同我講，This is the most important room in Taktsang Monastery. You make a wish and it will be granted！好奇妙，唔知點解我一入到去我自己突然好激動，其實入面只係黑媽媽一個好窄嘅山窿，但嗰下我突然覺得我可以黎到呢到，又撞啱入到呢個咁重要嘅地方幫喺身邊同唔喺身邊嘅家人祈求平安，我好幸運。

好喇參觀完晒虎穴寺又排除萬難咁（因為真係好鬼多人，基本上同新年年宵人迫人咁嘅情況冇分別。尤其是出入期間限定開放嘅嗰個室都係阿教練一手拉住我先可以出入到）終於要落山喇。其實嗰時都差不多點幾兩點嗰肚餓到痴線，但都冇計呀要行返落半路山腰嗰cafe先有飯食呀陰公。

 我地行完出黎另一個角度嘅虎穴寺，睇下佢依山崖而建仲要一路上都係啲唔係路，咁多個世紀前啲人究竟點做得到？

 返到去半路個 cafe終於食飯喇！由於呢個係呢座山唯一一個食飯嘅地方，所以全部遊客都係喺呢度食飯抖抖！呢個cafe係政府營運，只serve齋菜係冇肉，阿導遊話雖然呢度十年如一日日日都係出同樣嘅食物，但佢特別在所有餸菜都係用柴火煮。

食埋個飯再繼續落山一路都係落雨。唔知係咪食完飯有氣有力，落山我竟然可以極速落到！由山腳行上山頂再行返落山腳連埋食飯嗰半個鐘左右，我地只係用左5個鐘多啲就完成！！！！相比我之前睇嘅遊記話三個鐘上三個鐘落，我地都算係咁啦！！！行完雖然係好X攰，但真係好開心好滿足！！！！

 行完望返上去，虎穴寺就係啲雲霧中間。就咁睇好似唔係好高好遠，但都行左10KM同埋差不多一千米上落！