非常寫意嘅輕井澤住宿 - Hotel Bleston Court (下篇)

上篇講完酒店入面設施同野食,呢篇講下酒店附近環境。其實佢都喺星野area入面,步行去溫泉蜻蜓之湯同隔離嘅村民食堂、Harunire Terence都只係十分鐘腳程。所以日頭慢慢行其實係好舒服。但一入黑基本上係冇燈連方向都睇唔到,所以就算明知好近,都係叫車穩陣啲。另外遊客指定要去嘅嗰兩間教堂星野遊學堂同石之教會其實就係酒店範圍入面,所以住呢度都可以慳返踩單車上山黎呢兩個教堂嘅路程喇哈哈。

image

其實沿路景色都好靚,都係有樹林有小溪,我一路行一路嘅感覺就好似去左加拿大咁。

image

我嗰日大概一點到,房未check得in,又好鬼餓,所以第一時間就係去村民食堂醫肚。

IMG_5216 呢張相影得佢好似好隱蔽咁,但其實係只係路口邊,好易搵。

村民食堂係食日本輕食。個餐牌有定食有散叫。價錢方面就唔算平但都唔係十分貴,一個定食set大概係指1600-1800yen咁上下。

IMG_5184

我叫左個炸豬扒定食,點豬扒嘅醬有三款比你㨂,我㨂左蘋果味噌,味噌味又帶少少甜都幾得意。

IMG_5188

IMG_5191 呢個就係蘋果味噌

喺村民食堂隔離就係溫泉蜻蜓之湯。其實佢都係開放比公眾,無記錯好似係1300yen入場費。但因為我入住佢地酒店,所以我入場係免費嘅。佢除左有室內池都有一個室外池。我兩晚都有去浸,望上天可以睇到好多星星,真係好靚同好舒服!

IMG_5192

再沿路行落少少就係harunire terence。其實嗰度真係冇乜特別舖頭,只係得啲賣得好貴嘅精品店同幾間餐廳。另外有間丸山咖啡cafe都出名嘅,坐喺嗰度飲咖啡嘆個景都好不錯!

IMG_5225 個harunire terence其實好細,加上我去嗰日星期三同四遊客唔多非常靜,十分鐘行晒。

IMG_5230 人少少喺丸山咖啡cafe嘆下咖啡食件cake。其實嗰日有啲凍,但為左睇風景發呆死都要坐出面。

IMG_5267 第一晚浸完溫泉就喺harunire terence食個soba。不過我覺得味道都係普通。

冬天嘅輕井澤一到五點個天就黑晒。我去嗰時臨近聖誕,所以佢地有好多燈飾整得好靚好浪漫。

IMG_5276

IMG_5281 呢個就係星野遊學堂,十二月期間限定節目,晚上由酒店職員演出嘅鈴鐘同詩歌表演,都幾好聽㗎。

IMG_5587 酒店範圍入面嘅樹林一到夜晚全部都放晒小燈箱好鬼靚。不過真係辛苦晒酒店一大班員工,因為呢啲小燈箱唔係置梗喺地下,而係佢地喺日落之前一個個咁放出黎,朝早天光又一個個咁放返入櫃。呢啲咁傻豬辛苦嘅做法,我相信係日本先會做到。

IMG_5625 石之教會,就喺酒店main building 行5分鐘嘅路程之內。(題外話,對於一個懶醒嘅人,5分鐘嘅路都係可以會蕩失路。呢個旅程教識我一件事 —— 永遠都唔好相信自己直覺!)

非常寫意嘅輕井澤住宿 - Hotel Bleston Court (上篇)

啱啱黎左個長嘅東京+輕井澤之旅。今次除左第一日有約朋友之外其餘六日都係一條友自己玩完全冇planning諗起去邊就去邊勁free style好開心!

今次特登去左兩日半輕井澤,詳細遊記唔寫喇,不過要講一下喺輕井澤踩單車真係好正!踩去雲場池嘅路上大部份都係森林咁非常寫意!雖然有啲啲難搵路但只要有google map導航就完全大丈夫!(我自己一條人咁不斷踩下停下搵路咁但其實好enjoy!)普通單車只係500yen租一日(5點前還車),如果體力唔夠租電動都係1000yen。不過信我,以我唔運動嘅人租普通嗰隻其實已經OK因為慢慢踩其實唔算好辛苦。

IMG_5461 踩單車去雲場池沿路上就係咁樣嘅樹林小路,好寫意。(題外話,google map導航如果㨂行人路佢就會帶左你去呢啲好多石仔嘅路唔係好好踩,啲路仲好奇怪有啲難搵。如果㨂行車路可能會好啲,不過就要小心啲車喇。)

IMG_5438 未入小路前嘅馬路好踩啲。

IMG_5537  一條茂利在路上又冇人理又冇人幫我同部單車影相唯有用個最騎呢嘅角度自拍啦。題外話一段小插曲,去到雲場池諗住離開又停左喺度搵路時遇到一個同我一樣一條女自己踩車嘅台灣妹,大家交換左一下路線情報之後就各自向唔同方向出發。兜左一段路之後又再遇到(好明顯我係行錯左路啦即係),台妹同我講左一聲「加油啊!」嘩一條友身在外地突然聽到有人用中文同我打氣我覺得好窩心!

其實今次要寫嘅係我喺輕井澤住左兩晚嘅酒店Hotel Bleston Court。我見好多講佢嘅遊記都係台灣人,反而香港人就中意住另一個Hotel Prince嘅木屋仔(其實我都有諗住嗰間但睇相好似嗰間舊啲,主要仲係佢木屋仔係兩張床我一條友唔想要兩張床囉lol)。Hotel Bleston Court都係星野集團其下嘅酒店,但價錢相宜過星野好多(差不多平一半)。我仲要㨂佢最平嘅日子星期三同四入住連早餐一間房都係千二蚊港紙有找一晚(18000yen per night)。如果兩人入住都係八舊水,以佢酒店嘅質素同服務其實絕對抵到爛!

image sorry張相背光唔係好睇到,酒店嘅main building就喺一個小山丘上面,輕井澤車站有shuttle bus接送,唔駛擔心搵唔到。不過記住check每日尾班車係幾點,我去嗰日最後一班係六點幾,過左就要搭的士喇。

佢地酒店有三種房型比你㨂,分別係designer cottage, terence villa同standard cottage。我今次㨂左terence villa,其實都係一間間木屋仔仲有一個小露台咁。無論你㨂邊個房類佢所有屋仔都係喺樹林入面所以全部都係林景。

IMG_5634 Terence villa就係咁嘅小木屋,有一個小小嘅露台咁。我睇其他人嘅遊記話有啲個露台出面仲有jacuzzi添。

image

房間係非常咁寬敞!浴室係開放式,如果朋友入住就好似唔係幾好。情侶入住好似好啲哈哈哈哈。

IMG_5237 image image

IMG_5243  不得不提係呢度酒店房間係冇電視(除左standard cottage之外)同wifi嘅。全房唯一嘅娛樂就係呢部CD player(其實仲有一副好靚嘅西洋象棋同啤牌嘅不過冇人同我玩啫)。聽嘅歌全部係大自然音樂同雀仔聲!所以等你可以忘記一下出面嘅煩事好專心喺度放鬆放鬆!

IMG_5245 房入面好貼心咁放左架放濕器,不過我嫌佢太細唔係好夠力lol.

IMG_5292 仲有免費嘅花茶同丸山咖啡提供。

IMG_5248 如果好似我咁中意浸浴的話,浴缸旁仲有薰衣草味嘅浴鹽比你用。

IMG_5299 佢浴室提供嘅洗頭水護髮素係我好中意嘅草本味!

我住呢兩晚係㨂左連早餐嘅plan。早餐係一個semi buffet,main course會係一個法式嘅galette(鹹嘅crepe)。但因為我住兩晚所以我email問定佢地main course會唔會唔同,結果佢地都話第二日會有唔同嘅選擇比我。

IMG_5316 Buffet部分係一啲tapas小吃,老老實實,我覺得未至於非常咁好食,不過賣相確實係一流嘅!

IMG_5327 第一日嘅main course就係呢個煙三文魚galette, 聽講話呢度最出名最自慢就係呢個galette。不過我覺得都係普普通通咁囉。(我咀刁我認lol)

IMG_5609 第二朝食返多啲菜先。佢有一大盤蒸野菜係啲南瓜牛蒡呀西蘭花呀咁我覺得好好食!

IMG_5611 望住樹林景食早餐好好舒服!

IMG_5613 第二日個main course佢有三個選擇比我㨂,分別係用薯仔整嘅galette、omelette同埋waffle。但因為佢嘅galette我真係覺得麻麻,所以我都㨂左omelette。簡簡單單咁反而係最好食!

IMG_5330 酒店間餐廳叫做no one’s recipe。主打用日本信州食材做嘅法國菜。冇喺度食過晚餐評論唔到其他食物菜色,不過要講講嘅係佢地嘅服務非常好,佢地會盡量安排客人都可以坐喺窗邊位置,喺我食食下途中佢地同我講話有個窗邊位已經預備好比我轉過去!不過呢,就係因為佢地對客人好恩勤所以會有少少慢,入座前明明餐廳係有好多位但你都要排一陣隊等候入座。但其實都冇乜所謂啦,反正放假有好多時間咪慢慢等下囉!

有太多相喇,我要分多篇講,下一篇講酒店周圍環境同啲設施。

Website: http://www.blestoncourt.com