我的快樂不丹之旅 - 行上虎穴寺,我足足行左一棟ICC!

好喇終於可以的起心肝再繼續寫我嘅不丹之旅。

成個不丹之旅嘅高潮一定係行上位於海拔三千米上嘅虎穴寺!基本上每個去不丹嘅遊客都一定會上虎穴寺,冇上過嘅話應該都唔算黎過不丹。(就連早我兩個幾月去嘅王子同王妃都上你就知啦!)

其實我好少行山,所以之前上網睇人地講話行左三個鐘上山同三個鐘落山我已經諗我會唔會頂唔順?甚至乎幾個月前我已經諗使唔使練定啲體能先呢?最後其實都冇刻意去練體能嘅,不過因為我都係一個唔怕行路嘅人所以有意無意就行多啲路練腳骨力咁囉。

之前講過因為呢個時候算係不丹旅遊淡季,成個不丹嘅旅程頭四日我地都好少見到人。但我地上虎穴寺嗰日咁啱撞正佢最重要嗰個chamber嘅一年一度開放日,所以我地上山嗰日係超!多!人!我懷疑成個不丹啲人有一半都黎左上山!

平時阿導遊都好就我地時間九點或者九點半先出發,但嗰日可能一來人多二來又知我地行得慢,所以要我地八點出發,好啦冇所謂啦行山係應該要早啲嘅。於是早餐食飽飽我地就開車出發去虎穴寺山腳嘞。話雖虎穴寺係海拔三千米,但其實又唔係真係行足三千米高嘅因為不丹本來就係喺高海拔,所以實際係由大約二千米多啲開始啦。後來我check返iphone嗰height climbing track,哦都唔係好高啫都係行左109層之嘛即係一棟ICC咁啫 XDDDDD

嗰日天氣其實麻麻,開始時都冇雨,但大概行左半個鐘就開始落雨,雖然未至滂沱大雨但都唔係細,加上山路好多泥濘其實好滑好跣!好彩阿導遊教練比左支行山棍我地,如果唔係我真係行唔到⋯⋯  其實上山有一半路係可以比錢騎馬仔上嘅,但阿導遊教練一開始就叫我地行完全冇問過我地要唔要騎馬仔,去到大概三分一先同我講話呢日落雨人又多唔好騎馬仔有啲危險喎。不過我後來都覺得佢啱嘅,因為啲路其實唔闊又好近崖邊,坐上左隻馬仔度仲高啲應該會驚啲,加上嗰日啲路跣應該會仲驚!同埋其實自己行晒全程行完之後成功感真係好大!

IMG_0787 一開始嘅山腳只係出現好短暫嘅平路。我地已經拎住支竹行都覺得辛苦,睇下啲本地人大包小包仲要揹住小朋友行真係好勁!

IMG_0841 上山就係可以騎呢啲馬仔喇!不過你睇其實條路唔闊人馬爭路,讓路就要唔係人行到邊邊就馬仔行到邊邊,都真係幾牙煙!

一開始我問教練其實全程行到上山要幾耐,佢話大約個半鐘,佢九個字都行完喎。咁我真係相信佢應該真係行九個字都上到因為佢大大話話行左一百次仲要佢條友仔係著住件國服行又行得超快但氣都唔喘汗都冇一滴!我行左半個鐘已經成件衫濕晒!

IMG_0808點解我叫佢教練,你睇下佢就係全程行山竹都唔洗汗都冇滴又行先我地成條街再遠處回望我地比壓力動力我地等我地行快啲囉。再睇下條路,呢啲真係叫唔係路⋯⋯

一路上其實都真係本地人多,一家大細有老有嫩咁,帶晒野食同一大壺拉茶上山,仲有啲話係印度過黎嘅僧侶,可以知道呢個開放日係幾咁重要。

IMG_0930 行行下阿教練又撞到熟人。呢位係佢妹妹嘅好朋友,成家人一齊黎上山,佢地帶晒自己整嘅餅同拉茶上黎行,咁啱喺度抖抖就請埋我食餅飲茶。

行左大概兩個半鐘終於見到個虎穴寺!個虎穴寺真係好有氣勢因為佢就係起喺個懸崖邊!不過見到佢其實都係未到,因為差不多到虎穴寺最後呢段路係又落又上嘅樓梯,啲樓梯又企又大級加上嗰時仲落緊雨又超多人我覺得係比山路更難行嘅路段!

IMG_0983 嗱黎到呢個位見到喺對面,都要再又落又上行埋啲石梯先可以入到去!大家可以按圖放大睇下無論虎穴寺出面條樓梯入面上下層平台全部都塞滿人!

咁多人為左要入去一年開放一次嘅呢個咁重要嘅室其實就係據講當初寧波車騎住飛虎飛到黎呢度,並且喺呢個山洞閉關修練左三年三月三日,虎穴寺都係因為呢個山洞以得名。呢個山洞係寺嘅低層,我諗平時呢個位應該係冇人,但我地上到去遠處望過去已經見到全部塞滿晒人。聽講當地人要入去係要排好耐隊,但唔知導遊教練係咪真係相識滿天下到連門口實Q都係佢啲friend(一路上佢係不斷撞到朋友、家人朋友、前女友等等XDDD,真係懷疑佢係咪成個Paro嘅人都識晒!),竟然比我地優先入去!門口實Q仲同我講,This is the most important room in Taktsang Monastery. You make a wish and it will be granted!好奇妙,唔知點解我一入到去我自己突然好激動,其實入面只係黑媽媽一個好窄嘅山窿,但嗰下我突然覺得我可以黎到呢到,又撞啱入到呢個咁重要嘅地方幫喺身邊同唔喺身邊嘅家人祈求平安,我好幸運。

好喇參觀完晒虎穴寺又排除萬難咁(因為真係好鬼多人,基本上同新年年宵人迫人咁嘅情況冇分別。尤其是出入期間限定開放嘅嗰個室都係阿教練一手拉住我先可以出入到)終於要落山喇。其實嗰時都差不多點幾兩點嗰肚餓到痴線,但都冇計呀要行返落半路山腰嗰cafe先有飯食呀陰公。

IMG_1042 我地行完出黎另一個角度嘅虎穴寺,睇下佢依山崖而建仲要一路上都係啲唔係路,咁多個世紀前啲人究竟點做得到?

IMG_1066 返到去半路個 cafe終於食飯喇!由於呢個係呢座山唯一一個食飯嘅地方,所以全部遊客都係喺呢度食飯抖抖!呢個cafe係政府營運,只serve齋菜係冇肉,阿導遊話雖然呢度十年如一日日日都係出同樣嘅食物,但佢特別在所有餸菜都係用柴火煮。

食埋個飯再繼續落山一路都係落雨。唔知係咪食完飯有氣有力,落山我竟然可以極速落到!由山腳行上山頂再行返落山腳連埋食飯嗰半個鐘左右,我地只係用左5個鐘多啲就完成!!!!相比我之前睇嘅遊記話三個鐘上三個鐘落,我地都算係咁啦!!!行完雖然係好X攰,但真係好開心好滿足!!!!

IMG_1073 行完望返上去,虎穴寺就係啲雲霧中間。就咁睇好似唔係好高好遠,但都行左10KM同埋差不多一千米上落!

 

Advertisements

我的快樂不丹之旅-不丹夜生活喪跳十字步!

上次講完rafting, 今次我要講另一樣不丹令我意想不到嘅地方,就係不丹嘅夜生活!!!!!

喺第一日Paro其實大概6點左右就完成晒我地觀光活動,太早又冇野做所以我地就問導遊有冇酒吧飲野嘅地方,跟住嗰晚阿導遊等我地食完晚飯就帶我地出去Paro當地嘅酒吧飲野喇。

其實不丹有好多”Restaurant cum bar”,我地去嘅第一間其實都正常而且都好多人,但啲人好似都係食飯多,仲有一枱年輕人喺我地後面聚會食下momo咁但冇飯酒嘅。

IMG_9925 Paro嘅夜晚,其實都幾多人浦街。

IMG_9916IMG_9917 去到邊都見到五世國王,酒吧都見到佢陪你飲酒。

IMG_9922 後面呢班年輕人好乖㗎佢地只係飲汔水。

喺第一間飲完兩三支啤阿導遊話要帶我地去第二間再local啲嘅吧。呢間真係夠晒local夠晒不丹,因為佢成間士多咁,文字實在形容唔到有幾正,所以請看圖:

IMG_9929 外型睇真係似間士多多啲!

IMG_9931IMG_9934 一個木柜放食物再加兩張矮木枱,勁原始!但有冰凍啤酒喎已經好好!

IMG_9936 係呀不丹好多野生大麻,所以啲人會隊草,聽講係!

跟住第三晚喺Punakha, 阿導遊話食完飯帶我地去跳舞。我地去左離酒店大約10分鐘路程嘅一條好似當地人住嘅村,喺轉角位有一間小小好似disco嘅店(好可惜唔記得左影相),入到去佢有disco嘅設備有晒disco燈有DJ仲有個小舞台,台下面有幾枱嘅枱同櫈比客人坐(唔好幻想係好似香港咁係梳化櫈,只係好raw嘅木枱同長木櫈),仲有幾個著住kira製服嘅妹妹姐姐駐場。其實呢啲女仔都係負責表演跳舞娛賓,但又唔好幻想佢地係勁歌熱舞咁,因為其實大部份姐姐都係好含蓄跳十字,有幾個可能知道自己要有第二啲selling point就勁啲扭下腰咁囉。咁呢啲姐姐其實唔係自動波上去跳舞,佢地係會坐枱(嗱又唔好諗多左佢地唔係你以為嘅夜總會坐枱陪你飲酒,佢地真係齋坐喺度㗎咋),然後叫你出錢點佢地上台跳舞,我問導遊通常比幾多同佢地有冇得自己袋,阿導遊話通常最少都比200Nu, 場收100佢地袋100咁。如果你想點姐姐上去跳舞,咁佢地就會好raw咁比本簿仔你寫低你想佢地跳咩歌咁。嗰晚因為我地枱嘅姐姐知道我地喺香港黎就話佢地都有中文歌,於是佢就為我地跳左首「小蘋果」!!!!(頂小蘋果真係好洗腦,只係講下個歌名我而家個腦又loop緊喇仆X)

IMG_0585IMG_0586 見唔見到台下面左邊嗰個人,佢係DJ負責打歌舞台燈光同煙霧效果,仲做埋MC過場,好勁㗎!

我地入去時開頭都唔算好多人,只有大約十幾人喺度睇跳舞,以我地嘅觀察台下嘅客人都好含蓄,真係只係坐定定咁睇跳舞(同行朋友話佢地好似睇電視XDD),全場我諗只係我地呢三條香港茂利最嘈。去到夜啲時候大約10點開始人就越黎越多個場終於開始旺喇,終於有啲客人自己上台跳舞!!!

其實嗰晚我地都好盡興,首先我真係冇諗過不丹會有夜生活,雖然係好raw我地睇會覺得好爆笑,但對當地人黎講已經係好潮好好玩。我覺得去旅行唔一定要用自己現有嘅standard去量人地嘅生活,反而咁樣喺冇預料冇期望底下去體驗一下當地嘅夜生活文化,我覺得呢個不丹嘅舞廳係好得意好好玩嘅!

講左呢兩個大嘅不丹之意想不到,下次講下呢個不丹之旅最高潮 ——行上海拔三千米嘅虎穴寺朝聖!

我的快樂不丹之旅-不丹竟然有啲咁刺激嘅野玩?

喺未入戲肉前有樣野我要講清楚先,我之前講嘅每人每日最低消費USD200只係適用於我地淡季去仲有人數係三人或以上,旺季或者係一條友去好似係貴啲USD250或更多,詳情請自己上網google下。(嗱我都話我唔啱寫資訊型遊記啦我都係廢嗡好啲)

其實去之前我都諗住黎不丹都係靜態旅遊,都係行下山睇下景去下寺廟咁。所以當導遊問我地玩唔玩rafting時我第一個反應係「吓?乜不丹都有啲咁刺激嘅野玩架咩?」

不丹係喺山谷之中冇海只有河,其實一落機喺Paro就已經見到有河,但出名嘅而且一定會去嘅應該就係Punakha嘅父河同母河,因為全國最靚嘅Punakha Dzong就係呢兩條河嘅交匯處。Dzong就係堡壘,基本上每個城市都有,Dzong入面一半係政府嘅行政機關辦公室,另一半就係宗教嘅寺廟。喺不丹,宗教首領嘅地位係同國王對等,所以喺主要大廳入面佢地兩個嘅座位係平排嘅。Punakha Dzong特別嘅地方係佢真係好宏偉,而且國王大婚都係喺呢度舉行。

IMG_0661 Punakha Dzong全景,呢條係母河河水靜啲冇咁急,相嘅右邊盡頭就係同父河嘅交匯點。父河啲水就急好多,我地玩rafting就喺母河玩。(全程天氣都天陰影相真係麻麻)

IMG_0443 另一個角度嘅Punakha Dzong。其實不丹所有景都好闊好大,我覺得真係要有支廣角鏡先影得到佢地嘅地方有幾靚,但我只係電話同餅鏡,所以張就下 XDD

IMG_0449 呢個係我地嘅導遊。事原佢屋企最近有親人過左身,所以佢每逢到每一個寺廟都會拎啲酥油點酥油燈(butter lamp)為過世嘅親人祈福。我地都因為咁所以喺呢個Punakha Dzong一齊點燈,可以喺度點酥油燈學佢話確實係一種blessing。

IMG_0470  每逢入呢啲Dzong同寺廟我地都要著長褲同有領衫,而佢地著國服嘅(男嘅呢種叫gho, 女嘅叫kira)就要披返條scraf.

IMG_0476寺廟入面全部都唔比影相,但入面真係好大好宏偉,佛像壁畫全部都好精緻。呢啲真係要親身黎睇先知道同感受到。

繼續講返條河同rafting先,其實雖然話我地喺冇咁急嘅母河玩,但其實水流依然係急!!!我落水前其實係淆底到核爆!!!除左傻笑之外我完全比唔到任何反應!!!我問教練之前有冇人跌落水架,佢話「sometimes, but not often」。我心諗咁即係有啦⋯⋯但既然都黎到,頂硬上啦唯有⋯⋯

IMG_0684IMG_0687 睇相真係睇唔到有幾急,但我可以話你知佢真係快而我真心驚!!!而且啲水其實係幾涼幾凍下。

IMG_0726 划左大概一個鐘就過左punakha dzong同交匯點,黎到水流平靜啲嘅位置教練幫我地同punakha dzong影張靚相。

因為喺淡季關係,其實頭嗰幾日我地去親邊或者食飯都係包場咁滯。玩rafting嗰日又係得我地幾丁友,我地講笑咁講話估唔到我地勁到連條河都包埋!

其實呢係幾好玩嘅,不過呢真係全身裡裡外外都濕晒!如果早知黎不丹會玩水上活動我就帶定泳衣同短褲啦!導遊話rafting只係夏天呢幾個月份先有得玩因為其他時候水太凍(其實嗰日我都覺得啲水好凍,應該得十幾度左右),所以想黎不丹又係夏天黎嘅朋友可以試下!如果你係大膽嘅可以挑戰下父河,阿導遊話嗰邊大浪啲仲好玩啲!

Rafting係自費活動,至於收費,佢係每隻艇計,阿導遊話因為我地後生仔女又唔係好有錢呢個rafting service公司又係佢朋友嘅所以幫我地講價收10000NU(原價萬幾我唔記得左),連埋比教練小費就10500NU(佢地貨幣,我地三條友除返開就每人400港紙啦)。所以多人黎玩其實抵啲嘅!全程大約係兩個鐘,不過其實划划下你都唔覺玩左咁耐同攰嘅因為啲水急比少少力已經推左你去好遠!

好,下篇又講下另一樣不丹估你唔到嘅野。定係你地有乜想知我可以再寫!

我的快樂不丹之旅

期待左大半年,終於完成左我嘅不丹之旅喇!!!!其實好幾年前我已經想去不丹,原因係我聽講呢個係世界上最快樂嘅國家,我好想去睇下感受下佢地嘅快樂。但早幾年去不丹嘅旅費唔平,所以就不了了之。到左今年年頭好朋友突然話佢會同佢朋友去不丹,二話不說我就加入了,結果我的快樂之旅實現了!!!

不丹呢個國家係咪真係人地講得咁快樂呢?我答唔到你,不過我可以話比你聽不丹比左好多意想不到嘅野我(定係我真係對呢個地方太冇認識?!),喺不丹我都試左幾樣第一次嘅野。所以呢個不丹之旅實在太太太難忘喇!!!!

嗯我唔知大家對不丹認識有幾多所以我破天荒(!!!)就講下啲基本旅遊知訊(係呀睇開嘅人就知我唔係中意寫詳細遊記嘅人),去不丹旅遊係一定要跟當地嘅旅行社,冇得自由行,不過其實就算你一條友自己想去,基本上都成行嘅因為佢地都會安排一個導遊+一個司機帶你去玩。大家係可以選擇報香港旅行社或者直接聯絡不丹當地旅行社報名,不過搵香港旅行社就唔使自己搞book去曼谷嗰程機票囉。

不丹當地政府對遊客喺當地旅遊係有每日最低消費,非旺季好似係每人每日USD200, 不過其實呢二百蚊係計埋你喺當地嘅旅費呀酒店錢呀等等(唔包你自己買野洗費同導遊司機小費),所以點解去不丹旅費咁貴其實都係呢個原因。不過我覺得呢個收費其實都唔過份,因為佢地所有旅行社都唔會拼團,無論你喺香港報名定直接搵不丹旅行社,你係幾多人報名就幾多人自己一個團咁,所以去到不丹你會見到好多導遊一個帶幾人咁玩。好似我地今次三個人去,佢地安排我地坐一架七人車,行程又好flexible我地中意用幾多時間或者想做咩導遊都可以幫我地安排,所以係玩得好舒服嘅!

係喇香港去不丹冇直航架sorry, 係要去曼谷再轉不丹航空飛去不丹Paro。曼谷去不丹都唔係直航佢中途會停印度加爾各塔,全程大概係三個幾鐘左右。不過大家唔使擔心因為不丹航空其實都非常好坐,坐得舒服飛得穩陣仲要飛機餐好食又包你食得飽(我覺得比我地去曼谷嗰程坐嘅香港航空好好多)!呢個我會另外再寫。

好喇咁究竟我去完之後對不丹印象如何呢?成個不丹其實都係比山圍住,每到一個城市你都會見到其實係喺山谷之中,有無盡嘅山景同全綠色嘅田景,無比清新零污染嘅空氣,完全安靜嘅環境只有風吹過稻田嘅聲音同偶爾嘅狗吠聲,呢個就係我對不丹由其係Paro嘅印象!!!唔係講笑,我一落機除左嗰句「嘩好靚呀」我真係冇第二句野講!

老毛病喇又一打字就停唔到只得字冇相,太長氣,我會之後分類再寫啦。至於究竟有乜野咁令我意想不到同難忘大家就敬請期待我會努力快手寫晒佢!

(六月七月係不丹嘅雨季,所以基本上我地喺不丹嘅六日有五日都係天陰陰,但好好彩地都只不過係落毛毛雨唔算好大,否則我地呢個旅程尤其上虎穴寺嗰日就去唔到了)

 

P1050404IMG_9766IMG_9782P1050411P1050439P1050464P1050476IMG_0308IMG_0524IMG_9973IMG_0089IMG_0024IMG_1052