去日本一定去嘅20個景點?咁我仲有15次籍口再去日本!

啱啱睇左一篇叫”日本人都一定去過! 最受外國遊客歡迎的20個日本景點“。數數下,原來我只係去過其中5個😂 東京京都其實我都有去過仲唔止一次,但我竟然咩新宿御苑呀二条城呀金閣寺呀好多個鳥居嘅伏見稲荷大社全部都冇去過😒 其實我唔係唔想去,但唔知點解總係唔入行程中哈哈。

其實我自己去旅行好隨意,只係買左機票,book左大約要去嘅城市嘅住宿,可能去之前大約睇下嗰度有乜好睇好食,mark低想去嘅地方名就係咁。到時點行嘅路線,可能係到左嗰度之後先再諗去邊度先,又或者嗰一朝訓醒再決定,仲要一日都可能只係去兩三個地方咁。其實真係好hea。我有見過有人非常well planned, 用晒excel表寫晒時間去邊做咩搭咩車咁。我好佩服呢類朋友咁仔細咁有計劃,因為比我就一定冇可能寫到一個咁好嘅itinerary!

用咩方法去旅行其實都冇所謂,最緊要係同行嘅人都夾到又enjoy。我記得好多年前同好朋友第一次去旅行因為搵路而發脾氣黑面,好彩係友人冇乜所謂嘅性格不至於炒大鑊!(係呀係你呀唔知你仲記唔記得呢件事呢劉小姐?)然後幸好之後幾次同朋友去旅行都係自由派開心又愉快隨意地想去邊就去邊想做咩就做咩。

一條友去旅行都試過,的確我呢種咁hea咁冇計劃嘅旅行方法都係一條友啱啲。老實說我唔怕一個人反正我係可以自娛嘅人,不過一個人去旅行最唔好嘅事就係冇人可以同你share食野!一個人真係食唔到好多野咋😔

至於旅行必到景點,係咪一定要去到我又覺得冇乜所謂,今次去唔到咪留返下次再去囉,總有機會嘅。呢個20個日本景點淨返嘅嗰15個,咁我就分15次再比籍口我去日本啦哈哈。

↓ 對上一次去東京第一日相約左朋友同佢表姐一齊玩,冇計劃之下表姐帶左我地去淺草附近呢條賣好多餐具同食物模型嘅街,見到呢啲似到喊嘅食物模型我開心到飛起!

IMG_4814IMG_4816IMG_4823IMG_4828

Advertisements