其實除左朱古力同窩夫之外，比利時都好出名食薯條，我都係黎到先知。
某朝唔知食乜好既時候，男人就上網搵左呢間話好出名有幾十年歷史既薯條店去朝聖。
坐完地鐵再轉巴士搭左幾個站就黎到呢間座落於非遊客區外表又係小食亭既Maison Antoine。真係咪睇少佢，嗰日閒日點幾差不多兩點仲要天寒地凍飄住雪竟然都要排隊！
佢個menu上面其實冇乜特別，都係有唔同既sandwich hotdog呀嗰啲小食咁囉，最特別係佢點薯條啲醬，有超過二十款之多！嗰度既薯條有分大細size，我地嗰日一人叫一個sandwich/hotdog再叫一個大一個細size薯條同三個醬再叫一條炸雞肉腸，因為啲薯條實在太多食到眼瓊瓊！佢個細薯條其實都有香港麥當勞加大汽水杯再多啲既size，所以奉勸各位唔好好似我地咁貪心叫咁多！
呢個係男人個唔知咩sandwich上面都有薯條食到佢傻左！唔記得幫啲醬影相（淨係影蓋真係凍到傻左），啲醬係要另外比錢買的，其實都大兜。我只係記得其中一隻黃色嗰隻係咖哩好好食我最中意！
入面有三大個呢啲爐炸薯條！
就係呢間外表睇落完全冇特別既小食亭！順帶一提佢真係小食亭冇位坐架！我地都係買完企旁邊食真係凍到痴肺！
地址：Place Jourdan 1, 1040 Brussels (Etterbeek)
點解我話食薯條多過waffle呢？就係因為佢地呢隻唔知叫咩名既sandwich（後按：男人話係叫mitraillette sandwich, machine gun sandwich咁解），啲饀係可以自己㨂，但上面一定舖滿薯條！下面就係某晚男人既晚餐，見到個震撼情況嘛？真係好嚇人！
第一晚我地又食kebab，我想講呢個kebab都幾好食，我㨂左雞肉，佢個汁甜甜酸酸咁好醒胃。
我上面講嗰個炸雞肉腸就係呢個喇咪睇佢其貌不揚但好鬼香口仲要啲雞肉好似日式免治雞肉串咁咬落去一粒粒好好食！
好喇講完薯條講waffle喇基本上喺Grand place範圍行五步就有一間waffle店就連地鐵站入面都有所以唔會搵唔到。
比利時窩夫其實有兩款一款係方形既叫Brussels waffle, 圓形既叫Liege waffle。但就我睇黎多數都係賣Liege waffle，我有見到有賣Brussles waffle不過我冇試呀因為真係食唔落咁多野。
睇落去係咪好吸引呢又雪糕又cream又朱古力又唔同生果做topping真係唔知點㨂！最後我只㨂左咩都冇只有糖粉既，男人就㨂左cream加朱古力。順帶一提呢間waffle只係賣一蚊歐元一個真係平到爆，不過當然係一分錢一分貨啦男人話麻麻地但我覺得已經好好味！
1€！！！仲要喺給正屙尿仔仔隔離所以勁多人排隊！除左呢一間之外我記得周圍都有啲係賣一歐既waffle店，所以唔一定要黎呢間。
Waffle除左甜食之外其實仲有咸既。呢間叫waffle factory既舖喺Grand Place附近一個路口，有座位坐既。佢有甜既waffle 又有咸既賣，我叫左個芝士煙三文魚饀，嘩真係好好好好食！芝士同煙三文魚夾喺中間好鬼香！佢一個好似手咁大但食完已經好鬼飽。食甜食到悶既一定要試呢個！
一個咸既賣3個幾4歐，但連埋一個甜既加埋野飲就七歐幾，咁食抵啲！
地址：Rue du Lombard 30, 1000 Brussels
Live Your Dream 