我的日常 – 上妝篇

來繼續我每日日常出門口前執返正常樣嘅程序。其實唔係有約只係返工我都一律唔化眼唔搽mascara唔畫眼線，因為實在係冇咁多時間哈哈。

做完之前嗰堆保濕程序之後我通常都係等塊面吸收下先。襯呢個時候我就會換衫整頭咁。跟住就首先噴Caudelie皇后水醒下神再黎多次比塊面plum下水先。

跟住就係用primer喇，之前一直都係用開benefit支porefessional. 用晒之後而家用緊urban decay呢支。感覺其實同benefit差不多，價錢就平啲啲。benefit好似係300? 呢支就係二百幾咁囉。

跟住我就用NARS呢支tinted moisturiser，之前喺加拿大買，好似大約係半年前先開黎用。雖則佢遮瘕度唔算好高，屬中等coverage，不過已經夠遮到紅印同均勻膚色，夠自然，同埋都long lasting嘅。

呢個之前人人都讚嘅laneige BB cushion, 我都買左黎試下，的確佢搽上面嗰一刻塊面係真係好透光淨白嘅，但其實佢一啲都唔持久，只係幾個鐘就冇左個光澤感，唔知係咪反差太大我直情嗰得會暗左一度咁。所以我而家只會喺出去食個飯就返時先會用佢。不過佢個盒其實真係幾靚嘅。

之前嗰排唔知自己做乜咁中意買cushion product, 呢個innis free嘅foundation cushion 就係貪得意買喇。但其實好麻麻，唔long lasting同埋個隻色偏白，為左唔好浪費我而家會喺搽左tinted moisturiser/ foundation之後用佢喺眼底額中同鼻樑做highlight。

跟住遮瘕膏我而家用緊呢兩隻。其實我覺得韓牌clio呢隻遮瘕膏真心好用！係！比植村秀呢支野更好！佢唔乾唔cakey, 相反植村秀我覺得太乾。但色就係植村秀啱色啲白啲，做highlight 會出啲。

碎粉我冇特別喜好，只要係幼同滑就OK！而家用緊clio不過不失咁啦。唔知大家有冇聽過baking呢個上碎粉嘅方法？我而家每日都係咁上碎粉，的確遮瘕膏係冇咁易甩。想知係咩同點樣做，可以睇下呢度，或者喺youtube打”baking makeup”就有大把教學片睇！

眉筆唔多講，用過咁多支都係植村秀畫出黎最自然。通常都係眉筆黎畫眉尾。跟手眉尾或者邊度寫得唔好，我就會再遮瘕掃執返靚個眉型。

眉頭我就用眉粉，而家用緊canmake呢盒，多數都用左邊淺色啲隻啡。

跟住呢兩樣野勁重要！雖然我頭髮好黑，但我唔中意條眉跟住都咁深色好似好惡咁，所以一定會用淺色嘅染眉膏，etude house呢支麻麻地，唔知點解覺得佢啲色好唔襟，之前用嗰支日牌好啲，但唔記得咩牌子。至於十蚊場呢支眉coat….已經用左第N支喇！又平又好用，唔想做無眉娘畫完眉搽作一層keep到一整日！由其眉頭同眉尾位我唔搽半日就冇左喇！所以每次去十蚊場見到都入定幾支。

跟住到打陰影，其實我都只係用brozer輕輕咁掃下顋骨位等塊面睇落冇一片白紙咁平面。用緊呢盒too faced我係托人喺美國買。一來貪佢個盒好鬼靚二來係佢冇咁深色唔會太誇張。仲有佢個盒塊鏡夠大非常好用！

 

胭脂我而家用緊hourglass，都係搵人幫我買返黎，隻色好鬼靚同好自然！不過佢呢個價錢但個盒竟然係膠我覺得呢度要扣分！

跟住urban decay呢支定妝噴霧我覺得冇大家講得咁神奇。出油同會甩粉嘅T字位係依然會甩粉，其他冇乜油嘅位置我覺得係OK嘅粉同胭脂都係keep到一日。所以都係不過不失咁啦。