極幸運!遠征立山黑部!

極幸運!遠征立山黑部!

今次我地上到立山黑部其實真係非常好彩!

首先由plan行程嗰時開始,當知道排好上山嘅日子係日本公眾假期嘅第一日時,我已經好擔心會人山人海等車都等到花兒也謝了,仲諗緊要唔要掉過晒啲次序嚟避開呢日上山。但諗嚟諗去都覺得嗰日上山個行程係最順唔使行太多冤枉路,所以都照定計劃5月3日上立山。之前睇其他人遊記話排隊等cable car係最耐仲話要等成個鐘云云,心諗算啦不如唔好用pass就豪啲額外比錢上網另外訂定cable car嘅票咁就唔使排隊。點知官網表示紅日嗰三日唔可以上網訂票一定要即日買,但就另有告示話嗰日會有安排巴士直接由立山上室堂。咁我都諗既然有巴士,如果等唔到cable car最多咪坐巴士囉耐啲啫。所以我都冇再諗特別路線行程都係到時先算啦咁。

bus
我就係喺官網睇到呢個告示,Google translate話有直行巴士由立山直上室堂但唔停美女平天狗平等等,但就搭70分鐘。本來諗如果冇得book cable car又真係好似人地咁講話要等成個鐘咁,我直接搭呢架巴士其實時間上都唔會差好多。好彩最後唔多人唔使搭呢架巴士!

到嗰日上山,我地都諗住早啲去睇下咩環境同睇下換唔換到cable car嘅票先,所以八點我地就落到去富山電鐵站(我特登㨂前一晚嘅酒店住富山電鐵,就喺富山電鐵站隔離,極方便!)。去到富山電鐵站其實唔係好多人咋喎,有人龍排緊隊但只係1X個咁上下,換票counter更加係冇人排隊添!嗰度其實有好多工作人員幫遊客解答問題同安排換票,我地一去到就有個日本叔叔二話不說幫我地換咗緊接最快出發嗰程去立山嘅電車嘅cable car(立山電車十分鐘後出發),但我地未食早餐見又唔係預期中咁多人,就決定換再遲啲嘅cable car票,食埋早餐先搭下一班由富山出發去立山嘅電車嘞。本來都諗住搭嘅嗰架直行巴士,我問過工作人員話原來我地張pass搭唔到,不過我覺得其實嗰朝都唔係咁多人所以應該都冇嗰架巴士添。

好嘞以下呢幅喺官網嘅圖就可以好清楚知道上立山沿路要搭嘅交通工具。我上篇提及嘅嗰張JR pass係包晒圖中所有嘅交通公具,唔使下下買飛亦都慳返唔少錢同時間,所以我強烈建議大家買呢張pass!我地沿路一直都係順暢,人都唔算好多,啲人講最難等嘅cable car係多人但去到都唔係話多人到上唔到車,接駁巴士嗰啲要排隊但都係只需一陣就上到車,所以都唔覺得好辛苦。

Screen Shot 2018-05-22 at 9.28.04 PM

不過一路上山天氣就真係麻麻,好大霧,能見度好低,坐巴士嗰時都替司機擔心睇唔睇到路。上到立山雪之大谷大概係11點幾12點左右,我諗大家都係呢個時候到達所以明顯地多好多人,但未至於係水泄不通嘅。由於天氣真係唔太好,好大風大霧,所以喺雪牆影相都唔係好靚。啲風每次一吹連埋啲沙呀冰呀咁打埋塊面真係超痛又好凍!我地行咗大約一個鐘到就返去立山酒店嗰度食飯喇。

因為立山上面只有呢個地方有餐廳食飯,咁啱又係午飯時間,條人龍都好長下,不過因為餐廳都好大下,排咗大半個鐘到就有位喇。(其實樓下都有間立食蕎麥麵店,但都係好多人下)

IMG_1624
話富山縣出名白蝦,咁就叫個白蝦天婦羅飯嚟試下,不過我覺得普通而已。

食完飯就繼續向前行喇搭電巴士穿越立山去黑部嗰邊。穿越咗立山去到大觀峰嗰邊已經變成好天冇晒霧喇,加上一望無際嘅雪山山脈真係好靚!跟住又係一輪嘅交通工具咁去埋黑部水壩就去到我地立山黑部嘅尾聲嘞!

跟住去到扇沢我地就再搭巴士去大町溫泉鄉住一晚溫泉旅館喇。點知第二朝喺旅館checkout見到佢貼咗張告示出嚟話立山黑部寄行李服務暫停先知原來第二日山上面天氣太差全日都唔開!!!所以我地前一日上得到真係好好彩呀!!!

IMG_2310

Advertisements

其實我都係適合hea遊之 – 日本東海北陸立山黑部chur爆遊

其實我都係適合hea遊之 – 日本東海北陸立山黑部chur爆遊

成年冇去過日本真係好掛住日本呀!所以呢2018年嘅第一個旅行就決定要去一去日本喇!

難得搵到腳去旅行我就決定去啲未去過嘅地方,所以二話不說就book咗去名古屋嘅機票喇。Plan行程嗰時咁啱知道立山黑部開山喎,咁所以都冇多想就決定玩上昇龍道再上埋立山黑部嘞!

其實呢我已經好耐冇試過認真地plan行程路線,但冇辦法啊上立山黑部路途遙遠所以都真係plan下點行好啲。出發前大約個幾月我都問定去過嘅同事拎定啲itinerary參考下,跟住研究完一輪酒店呀搭咩車呀買咩pass呀咁我終於定咗一個好進取嘅itinerary!!! 呢個itinerary fully pack到我後來係有啲後悔嘅因為完全同我hea遊嘅style完全相違背……將8日嘅行程pack做6日咁行囉我都諗點解要咁做…..就比大家睇下我有幾痴線啦:

Day 1 香港 → 名古屋 (3pm到名古屋)

Day 2 名古屋 → 飛驒高山 (朝早名古屋出發。2.5個鐘JR去到高山,夜晚住溫泉酒店)

Day 3 高山 → 白川鄉 → 金澤 →富山 (呢日最甘!一早高山坐一個鐘巴士去白川鄉,行3個鐘後又坐一個鐘巴士去金澤。夜晚金澤坐一個鐘電車去富山)

Day 4 富山 → 立山黑部 → 大町溫泉鄉 (日本紅日第一日,一早搭兩個鐘車上立山。夜晚又住溫泉酒店)

Day 5 大町溫泉鄉 → 名古屋 (信濃大町經松本再轉JR返名古屋3.5個鐘)

Day 6 名古屋 → 香港 (7:50pm機返到香港11pm)

Screen Shot 2018-05-11 at 9_Fotor

其實以上嘅行走路線係順路嘅,但係完全冇多餘時間可以hea!即係咁,我以往嘅習慣係一日最多只喺同一地區去兩個地方(仲要相隔唔遠),但今次竟然一日要走三個地區,仲要每個地方相隔車程都要成個鐘!只可以講我太貪心喇今次……搞到每個地方都好似只係到一到咁,尤其是金澤!只係一個下晝加傍晚我覺得好唔夠呀因為金澤我好喜歡好多小店好好hea!其實每一朝早早起身都唔係辛苦,但要睇時間趕車呢樣野先令我覺得好有壓力……

所以如果比我再plan,我諗呢個路線行程我會去8日,金澤玩一日住一晚,名古屋都可以住多一晚(行街加食野)。咁我就唔使因為趕第二日上立山而喺金澤都要趕死去富山訓一晚,然後喺名古屋又可以有多啲時間行街食好西(金澤食唔到魚生飯同名古屋食唔到手羽先我表示好遺憾😭)。

仲有今次我去日本呢個星期咁啱係佢地嘅黃金週(4月30—5月5),我以為一定周圍都好多人啦由其上立山黑部嗰日會人山人海,但結果立山黑部比想象中少人好多,其他地方好似高山、白川鄉咁都唔算太多人,不過有啲舖就冇開囉(或者係佢地係早收)。

雖則呢個行程(東海+北陸+立山黑部)要搭好多程車,但其實我覺得唔算好難,因為日本交通真係好完善,亦都好易明,只要做少少功課,再有埋個「乘換案內」App咁就萬無一失。然後呢再有埋呢個「立山黑部、高山、松本地區周遊卷」呢個JR Pass,17500yen包晒JR同上立山黑部所有交通嘅費用,浄係名古屋去高山、同信濃大町返名古屋呢兩程指定席JR都己經過12000yen,所以計埋上立山黑部嘅交通(正價大約都成10000yen),呢張JR pass真係慳咗唔少錢!但記得呢張pass只係海外有得賣,所以出發前一定要喺香港買咗先!

IMG_2205
喺香港拎嗰張只係兌換劵,要喺日本換成呢張pass先可以用。

好喇都係好似以往咁啦詳細遊記同教學就唔講喇,要知多啲都可以問我我再答。下篇繼續講立山黑部同高山!比住少少相大家preview下先啦!

IMG_0719
名古屋確實係比東京大阪少好多人。其實行得都幾舒服,不過呢唔知係因為黃金週定平時都係咁啲舖頭好早收😭

↑ 飛驒高山食好西浸溫泉真係好正!

IMG_1269
白川鄉真係要咁樣喺山上面睇先覺得佢係咁特別!有雪應該靚好多添!

↑ 5月仲睇到咁多雪真係好似發夢咁,仲舖住半溶雪嘅山脈真係靚到嘩嘩聲!

淘寶買啲乜???

淘寶買啲乜???

新年快樂!2018年都差不多過咗兩個月喇,農歷新年都到過緊添喇,咁就首先祝大家新一年身體健康、所有事都順順利利啦!

好喇隔咗咁耐我係嚟找數!自從上年淘寶雙十一之後我話有開箱文跟住直到而家都未出,淘寶都唔知淘多咗幾多轉。所以不如趁今次一篇過講喇,但我唔講晒喇因為真係太多,我揀啲特別嘅嚟講啦。

第一樣我一定要講嘅就係呢個香薰機!好到直頭呢已經再返兜買咗第三部喇!首先佢個造型好簡單又唔太大部(我揀嗰個size係300ml),佢有個時間制可以比你揀放60/ 180/ 360分鐘,仲要有埋夜燈,咁先RMB90(雙十一價)!如果佢啲水放晒仲識自己熄機添,性價比係非常高!落單嗰時仲可以留言叫佢地換個原裝香港嘅三腳插,唔使額外加錢。佢地嘅包裝都非常好同穩陣,就算集運完再寄落嚟香港所有野都係完好!其實同款我見到淘寶有好多,我有同事買咗大size再平啲添。不過我冇仔細問有冇得換插頭包裝點呀之類,我又覺得我買開呢間無論出貨速度呀客服呀包裝呀都好一流所以我就算返兜幫人買我都係買返呢間。

IMG_9535
個香薰機有埋夜燈功能我覺得夜晚開住佢,間房都變得好似有好有格調咁!

第二樣呢我都唔知應該點叫佢,姑且就叫佢「狗便便神器」啦!因為有咗佢真係幫咗我不少!!!事原係好耐之前我喺facebook見到外國有條好似廣告片介紹呢個夾,夾住一個大口膠袋再夾喺狗狗條尾度就可以好乾淨俐落咁接晒狗狗啲便便。點知我雙十一嗰排竟然喺偉大嘅淘寶見到有呢個夾連10個膠袋嘅試用裝,只賣RMB18 (雙十一價)!!!貪得意梗係買黎試下啦,點知真係work喎!個夾入面係軟膠夾住我隻狗條尾佢完全冇反抗,應該冇唔舒服嘅感覺。膠袋嗰口夠大便便一出全部跌晒入個袋度唔會跌落地,次次用都冇失手,所以我即刻再買兩盒60個嘅膠袋備用喇!雖然用呢啲膠袋比免費嘅報紙係有啲少貴,但當你家毛孩好似我屋企嗰隻咁已經老年控制唔到大小便,又或者仲係potty training嘅階段,呢個夾真心幫到你,唔使驚屙到地下周圍都係!佢有分大中小3個size,我屋企隻係金毛所以我揀咗大,都啱fit喎,我諗除非你隻小狗係芝娃娃條尾勁幼,否則佢大中少嘅size應該都有一個fit你嘅毛孩。

IMG_9394

跟住呢個呢其實我唔係雙十一淘,不過都因為好平所以我又淘,就係我間房嘅窗簾喇!淘寶其實有好多店係可以按尺寸訂做窗簾,但我就貪快買佢現成車好嗰啲,反正我間房隻窗又唔大。佢現成都有幾個尺寸比你㨂,我揀呢個size其實比我隻窗長,不過我唔係成日開閂窗簾所以就咁摺起收埋啲腳就算。佢仲有3隻布料你揀,分別係遮光布、紗布同埋麻布。我㨂咗麻布,所以好透光,不過我中意間房光所以我係OK的。但如果要完全遮光我就建議買遮光布喇。我覺得啲料都幾好喎,pattern選擇如果可以多返啲就仲perfect!兩幅都係RMB58仲連埋啲掛勾比你,真心抵買!

IMG_9559
我覺得無論布料車工同個pattern都唔錯。頂嗰幅織布係我喺荃灣愉景新城嗰間韓仔家品店買,都係30蚊掛埋一齊我覺得都幾好睇喎!

跟住嗰啲呢我唔續樣講喇,大家就睇圖睇caption啦。

咁有啲咩係我會係淘寶無限回購呢?就係我隻狗嘅尿墊啦同埋佢訓緊嗰張帆布床(寵物用品真心不錯,只要唔係放落肚就得)。尿墊都只係RMB三十幾蚊,我試過幾隻牌子我覺得而家用緊呢隻「寵百思」最好,雖然佢唔係我喺香港寵物店買日本嗰啲咁厚但我覺得吸水力都夠。至於張床呢已經買咗第三張,之前我買床架連牛津布,每次換我都要掉個架我覺得有啲浪費。後來我搵到呢間店有得單買塊布,所以我而家只係換咗佢塊布就OK喇!

除咗呢堆之外我仲淘啲運動用品呀衫呀質地都非常好!我見其實而家好多youtuber都出淘寶開箱片,好好心機續樣介紹咁,我都成日睇下人地會喺淘寶買啲咩。如果大家都有淘寶歡迎交流有啲咩心水推介!

shopping list:(如果有漏大家可以問返我)

香薰機300ml – https://item.taobao.com/item.htm?spm=a1z09.2.0.0.61bc2e8dabGFZ3&id=537813461470&_u=i2b5bd638c2a

狗便便神器 – https://detail.tmall.com/item.htm?id=555306991643&spm=a1z09.2.0.0.61bc2e8dabGFZ3&_u=i2b5bd637b40

麻布窗簾連掛勾 – https://item.taobao.com/item.htm?spm=a1z09.2.0.0.61bc2e8dhujAEl&id=520178315781&_u=i2b5bd638a26

玻璃化妝掃箱 – https://detail.tmall.com/item.htm?id=557317185553&spm=a1z09.2.0.0.61bc2e8dhujAEl&_u=i2b5bd630066&skuId=3454506528671

木托盤 – https://item.taobao.com/item.htm?spm=a1z09.2.0.0.61bc2e8dhujAEl&id=537654240044&_u=i2b5bd631524

LED化妝鏡 – https://detail.tmall.com/item.htm?id=522957403473&spm=a1z09.2.0.0.61bc2e8dhujAEl&_u=i2b5bd63ffc5

金邊玻璃飾物盒 – https://item.taobao.com/item.htm?spm=a1z09.2.0.0.61bc2e8dhujAEl&id=547090449350&_u=i2b5bd63df1a

化妝掃清潔板 (長形)- https://detail.tmall.com/item.htm?id=552626925304&spm=a1z09.2.0.0.61bc2e8dabGFZ3&_u=i2b5bd63cca4

mintbear染暈握/鼻影掃 – https://detail.tmall.com/item.htm?id=559125603514&spm=a1z09.2.0.0.61bc2e8dhujAEl&_u=i2b5bd63691b&sku_properties=7814360:18128498

晾刷架 – https://item.taobao.com/item.htm?spm=a1z09.2.0.0.61bc2e8dabGFZ3&id=551403971350&_u=i2b5bd63d8b2

廚房磁貼架 – https://detail.tmall.com/item.htm?id=557141246995&spm=a1z09.2.0.0.61bc2e8dabGFZ3&_u=i2b5bd63249f

彎頭iPhone差電線 – https://detail.tmall.com/item.htm?id=557974996465&spm=a1z09.2.0.0.61bc2e8dabGFZ3&_u=i2b5bd630e64

狗狗牛津布連床架 – https://detail.tmall.com/item.htm?id=19249855454&spm=a1z09.2.0.0.61bc2e8dhujAEl&_u=i2b5bd633217

早餐食得好系列

早餐食得好系列

近呢年養成咗一個習慣就係星期六日朝早起身自己整個簡單早餐。本來嘅原意係早餐有食、食得輕營啲健康啲對修身有幫助,但整整下我啲早餐已經好似越來越大份一啲都唔輕營。其實久唔久我都有喺instagram post我自己啲早餐相,做咗個 #早餐食得好系列# 如果大家都係同路人的話歡迎分享交流下!

輕營系列

平時返工為求快捷方便5日有3或4日我都係開麥皮食,所以如果假日喺屋企都唔會揀食麥皮,真係冇其他選擇時我就唯有比多少少心思切啲生果落去一齊食囉(我平時真係熱水開好齋)。有時星期六日得閒我會打下green smoothies,其實好易打,我多數用香蕉(急凍咗)、蘋果、baby spinach,如果有其他生果就會加埋落去一齊打。材料都好隨意,冇波菜就蕃薯葉呀或者red chard呀睇下有咩菜用咩菜囉。睇youtube啲外國人可以就咁朝早飲一杯就當早餐,但我唔得呀我飲完都係會肚餓所以佢只會係我嘅早餐嘅其中一部分。再懶啲或者想食啲暖野呢,我就會整小米粥,以前出差返大陸食佢地係落糖食,我覺得幾好味,但又唔想食咁多甜野,所以我就落少少鹽再加肉鬆,都好好味架!

全部都係多士系列

多士係我最經常會食嘅weekend早餐。又快手又容易整,鹹食又得甜食又得。好心機嗰時就會整牛油果多士,用芝士搽底或者淋少少蜜糖喺面都好好食;想食鹹就煎隻太陽蛋放面,多士點蛋黃汁嚟食好好食架!懶嗰時就咁搽花生醬/ 杏仁醬/ speculoo spread/ 果醬就ok!(題外話,樽杏仁醬我係喺加拿大costco買,冇糖同話冇加任何添加劑。我都係第一次食,除咗聞落好香之外其實食落冇乜味。)

有啲豐富系列

如果好心機,我真係會諗整啲咩早餐食睇落開心啲食落又開心啲。多數我啲idea都係睇下youtube呀tasty呀instagram呀睇返嚟,當然呢都係啲易整嘅野啦我都唔想太麻煩。我發現原來台式蛋餅其實好鬼易整,只要煎好塊好似薄撐咁嘅餅皮,再煎隻蛋喺上面咁就完成!中間如果想多啲花款就可以夾啲饀再卷埋佢,我上次試過夾芝士同三文魚係超級好食!

Hea食系列

有時真係唔係咁好心機整早餐又想食多啲其實都只係就咁炒個蛋煎條腸食下。現成野多數都快捷方便!

好啦我都想我啲相影得再靚啲咁睇落我好似好勁咁,除咗諗食咩早餐之外我會開始諗埋影相構圖點影得靚啲另大家都覺得我入得廚房出睇廳堂先XDDDDDDDD

靚爆胭脂 – Hourglass Volume 3 2017 Holiday Palette

靚爆胭脂 – Hourglass Volume 3 2017 Holiday Palette

好喇呢度又完全荒廢咗喇。因為我太懶都冇乜動力寫野認真抵打。

其實我九月尾十月頭去咗加拿大遊山玩水咗兩星期,唔寫遊記喇都冇乜特別野寫同埋文字其實都唔係好表達到嗰啲北極光真係一定要睇一次呀仲有加拿大嘅山脈同湖水真係靚到成幅畫咁嘅感覺,所以大家想知就去睇下我instagram啲相啦。因為個trip有兩日去咗西雅圖,人生第一次踏足美國呀,終於有機會行我成日都好想行嘅Sephora喇!!!所以呢就襯呢個機會又去放低幾百兩銀咁喇。

今次我target只有一個,就係老連賣到勁貴嘅hourglass。咁啱得咁橋我幾個月前跌爛咗我自己嗰盒,咁就死都等呢個機會買盒新啦!同行另一位朋友同我目標一致,仲一早睇定有咩好買,所以嗰日我地就(自己以為)極速用咗一個鐘時間掃貨喇!

img_8960
其實都係買咗咁多野之嘛,我仲要都唔係好知價,返到嚟先知LM連稅仲要比喺香港買貴啲。所以大家應該做下功課先,唔好學我!

其實我都唔係買咗好多野咋,都係啲我覺得啱用嘅野囉,啲咩gift set呀eye shadow palette冇再買喇因為其實自己都唔係成日用。但hourglass volume 3呢個palette我忍唔到手入咗,因為實在太太太太靚喇!!!

img_8963
題外話,新束束嘅hourglass盒身係玫瑰金反光真係堅靚。但唔知其實係咪會氧化,我盒胭脂就咁放櫃面兩個月後佢就變成有一點點又唔令面。相反盒palette放櫃入面就冇事。所以大家要保持佢個靚包裝就記得放入櫃桶喇。

今次呢個holiday limited edition有三格新product三格現有product。新野有兩隻新色嘅胭脂同一隻新嘅highlight(右下、中下、同中上),其他三格有兩隻唔同色嘅finishing powder同埋一隻bronzer。

img_9370
左:我跌爛咗嘅舊色 – Diffused Heat;中:新嘅limited edition Volume 3 palette;右:新色胭脂 – Euphoric Fusion

我最中意就係嗰highlight!但如果你係中意啲勁閃勁反光嘅highlight呢隻就唔對你口味喇。佢隻閃係好subtle嘅閃,我用嚟搽顴骨位佢暗暗咁有一野光澤咗又自然睇又落立體啲。Highlight我多數都係搽顴骨位,有時搽埋鼻樑同唇山位就成個妝睇落再精緻啲囉。

跟住呢嗰兩隻新色胭脂,中下嗰隻叫Surreal Halo,右下嗰隻叫Pure Effect。Surreal Halo係暗紫色胭脂,最近好多雜誌都有講紫色胭脂,其實一啲都唔難carry,佢搽上面係暗紅色接近自己面紅嘅顏色,我覺得比一般粉紅呀桃紅呀自然好多,如果唔係走甜美路線我覺得搽紫色胭脂其實仲好睇。而另外嗰隻Pure Effect就係桃紅色,搽上面好sharp好粉紅。呢兩隻色嘅胭脂都係一貫咁顯色,掃一至兩下已經夠,如果掃多幾下就會好深色,尤其是係隻Pure Effect,手多的話真係變馬騮屎忽,所以記得輕手!點解我咁中意佢地嘅胭脂係除咗顯色之外亦都好long lasting,朝早返工搽一次到放工嗰時都仲有喺度!

img_9371
palette入面隻紫色胭脂Surreal Halo我同我另外買嗰盒Euphoric Fusion嘅比較。上面嗰隻係Euphoric Fusion,下邊係Surreal Halo。呢度我係來回捽咗兩三下。今次啲新色胭脂全部都有少少嘅金色閃粉喺入面,又係好subtle都閃閃好鬼靚!
img_9372-1
4隻胭脂色嘅swatch一次過睇晒唔同效果。左一:Pure Effect (From Palette);左二:舊嗰盒Diffused Heat;右二:Surreal Halo (From Palette);右一:Euphoric Fusion。呢度我就捽咗多少下大概來回五六次左右。

至於嗰兩隻finishing powder,一隻叫Diffused Light,帶少少黃色tone,但其實搽上面係半透明至少少奶白色,另外嗰隻Dim Light就係帶少少粉紅底嘅。我覺得兩隻色喺塊面度掃少少嗰分別其實唔會好明顯,所以我都唔知應該點用佢地。後來睇美國啲姐姐嘅review佢地有啲人會用嚟做唔同部位嘅定妝,所以我而家用Diffused Light掃眼底定concealer,胭脂重手得滯或者要做blending就用Dim Light掃面頰。

至於隻bronzer呢我係未用過嘅,佢應該都係好似其他product咁係淡淡嘅啡色唔會一野就勁深色。我諗用嚟打鼻影應該都可以。

除咗呢個palette之外我仲買咗佢地隻新胭脂,冇呀難得嚟到又平成老連一舊水就唔爭在買埋啦。佢好似今年胭脂出咗4隻新色,我諗住買啲我冇乜嘅色所以最後我揀咗又係紫色系嘅Euphoric Fusion。佢呢隻紫比palette入面嗰隻紅啲紫啲(palette嗰隻係暗啲),搽上面我覺得呢隻就會紅啲palette嗰隻就暗紅啲。其實兩隻都好自然,睇下你係想要咩效果喇。不過palette嗰隻我有時會兩隻色溝埋嚟用,感覺好似冇咁沉色咁囉。

好啦同場寫多個review。我其實仲買咗盒Anastasia Beverly Hills嘅眉膠(DIPBROW® POMADE)。我都係喺youtube同instagram睇得多啲外國姐姐用嚟畫眉畫得好鬼靚先燒到我買。佢好似eyeliner gel咁囉,有好多隻色揀。一盒我記得為返港紙150咁上下,但掃就另外買,支掃嘅價錢同盒膠係一樣所以我冇買到用返自己啲角掃算。

我其實已經揀咗佢最淺色嗰隻叫Blonde嘅色,但大力畫出嚟我覺得都好深色,介乎係深啡同黑之間咁,所以我估佢嘅深啡應該會好黑(我冇時間試色呀嗰日,見到就即擸即比錢)。我而家日日都係用佢畫眉,用角掃嚟畫其實都幾易控制,同埋佢呢因為係膠狀佢可以gel住掃啲毛唔會散所以畫眉尾都可以畫好幼,但最好畫之前搵野抺一抺啲份量先(我通常都係喺手背抺)唔係一野好大pat咁畫上眉就變小新好難救。另外佢呢隻眉膠係話防水,我畫咗條眉去做運動流勁多汗條眉尾仲喺到(前題係當然你唔會抺汗卒條眉啦),但我唔知我呢個可唔可以作準因為我都習慣性係會畫完眉再上12蚊店嗰支眉gel coat。

img_9379
上面喺朝早畫完條眉出門口前影,下面就係放工食完飯返屋企影。都超過成12個鐘,眉尾同眉峰都仲喺度!

好今次就講住咁多先有機會又再講下其他美妝產品。

Hea爆清邁 – 5個胡亂嘅小記

1. Uber平過tuk tuk!!!

雖然坐篤篤同雙條車係好有特色,但其實好鬼貴囉!短短大約係15/ 20分鐘嘅車程,篤篤收費係泰銖120(仲要係講完價先收120)。但Uber只係大約泰銖50幾蚊,仲要係坐有冷氣嘅私家車!自從試過暴雨行雷坐篤篤之後,Uber即刻變成我地代步首選!

2. 荔枝好睇唔好食!

每次行市集都見到啲荔枝又圓又大粒,我地心諗一定好正啦!終於有晚我地買左返酒店食,結果原來佢地係裝假狗!啲核都超大粒,但肉就好簿,仲唔係好甜添!所以大家都可以留返個肚食其他野喇!

img_5021
紅卜卜又大粒咁睇落真係好靚好吸引。點知原來都係得個樣架咋!

3. 亲!來感受一下文青小清新氣質!

我實在大鄉里,我真係從來冇諗過泰國而家可以同文青小清新扯上關係。直到我地去清邁之前我先有留意原來清邁大學附近呢個尼曼海明區原來有好多好靚嘅cafe。我覺得有啲似台北嘅赤峰街或者首爾嘅新沙洞咁囉。咁呢我想講,我地強大嘅祖國同胞同淘寶網實在有夠勁!尼曼海明區係我地遇到最多同胞嘅區域,然後喺cafe入面左右枱都係影疑似淘寶網拍相嘅少女!(其中最勁嘅係一位比港女更港女嘅同胞少女比男友埋怨佢食唔晒啲野做乜要叫咁多野食而佢個原因係”我要拍照嘛”然後揸住支軟雪糕擺pose屎影相影左差不多成10分鐘就快雪糕都溶晒)

4. 泰國比香港更嗜甜!?

其實可能唔係嘅,只係我自己唔係太食得甜啫。喺清邁,日日都好熱,行幾步就好想飲野,仲要一定係凍!除左路邊飲椰青之外,基本上大部份飲品都同飲糖水冇分別。就連泰式咖啡都甜到一個極點!係咪泰國人真係好食中意甜野架呢?

5. 泰國街頭謎樣小食

我地上篇講做spa嗰度附近好似係有兩間學校,所以街頭巷尾都會見到啲車仔小食擺賣。由於售賣對象都唔係遊客所以都唔會有任何泰文以外嘅招牌啦,咁我地就純粹係靠估黎試喇。我地見到嘅第一檔呢咁啱就有個做喺度做義工外藉少女幫緊伯伯手,所以就順便充當翻譯喇。

img_5343

不過我都其實都唔係好知係乜東東,只記得話中間白色嗰pat係coconut囉。上面啲蛋絲點解唔同色係咪有分別我都唔係好食得出。至於食完有乜感覺其實冇乜呀感覺就好似一陣風咁囉。

再行遠啲啲我地就遇到另一檔車仔。見佢一條條一粒粒咁我地以為係泰國魚旦,點知原來係燒糯米丸。上面仲搽咗少少醬油咁覺好似日本啲燒年糕咁不過佢就咬到一粒粒嘅糯米唔係煙un口感,最盞鬼嘅係佢連埋啲生椰菜比你一齊食。我兩個朋友就覺得麻麻好食因為都幾滯,但我又覺得幾好食喎不過呢真係食唔到多囉。

呢個係另一檔街頭小吃,迷你砵仔椰汁糕。呢個我覺得好好食呀佢唔甜得嚟帶有少少鹹鹹地又好香椰汁味!一盒10粒都係20bhat好鬼抵!

Hea爆清邁 – CP值極高嘅spa!

啱啱短短地去左個4日4夜嘅清邁hea到核爆之旅。老實說我對清邁係冇概念,就算去完返黎都唔知做過啲咩咁。不過就係因為真係冇咩做咩都唔使諗所以先可以好好relax下,幾日旅程周圍行下又食下又坐下飲下野做spa做yoga同去下cooking class咁,心情輕鬆愉快!成個trip我地做左兩次spa,今次就想講講呢兩個spa嘅比較。

第一間我地去左古城區間Fah Lanna Spa。我地係屎忽撞棍,其實都係嗰朝訓醒決定去做spa,又聽朋友介紹呢間正,即刻上網睇下又見好評,冇booking就出發前打電話過去問下有冇位。點知又好好彩地話一個鐘後有位咁就去成左喇!(後來我上網睇話原來呢度成日都爆,可能我地朝早加上係平日去卦所以都算好彩!)其實佢地係有車接送,但我地仲有啲時間就自己周圍行下再自己去喇。

img_5730
Easy to find. Hard to forget. 又真係正到幾難忘嘅。

呢到裝潢好鬼exotic,好多草木圍住一座座小石屋。後來上網睇返原來佢地係走蘭納風格 (Lanna),呢種泰北風情我好喜歡!入到去店入面直情好似去左渡假村咁好開心!

入到去店員就招呼我地坐低飲杯茶揀做咩按摩。價錢都好相宜大約都係600-1300泰銖(唔計package)半小時至一小時不等。我同兩個朋友分別揀左兩樣野做,因為我地都揀左唔同嘅按摩所以大家就分別入房,兩個鐘頭後再會!

按摩嗰啲房大部份都係一間間獨立石屋仔,因為我揀做嘅按摩同我兩個朋友唔一樣所以我自己就可以獨佔一間房(好正啊😍)!房都係貫徹蘭納風格,有shower有個大浴池,非常亁淨企理。(我唔記得影相呀因為真係太心急想開始XDD)

img_5325我嗰日揀左做全身磨紗+香薰油按摩。正式開始前姨姨幫我洗洗腳跟住比我換衫就開始嘞。做香薰油按摩嗰時姨姨仲幫我做少少嘅泰式按摩,一路比佢按再一路聽住嗰度啲大自然風音樂我真係舒服到有某幾刻訓著左!

img_5326 做完晒按摩之後仲有熱薑茶同米通比你享用(據講如果係做三個鐘或以上嘅按摩係送芒果糯米飯!)。嗜薑嘅我覺得佢呢杯薑茶又係好好飲再買埋佢啲薑茶粉!一路飲緊茶嘅時候店員同樣地都問我地使唔使安排車送我地走,但因為我地諗住周圍行搵訂食飯所以就冇坐到佢地車。但我聽到人地話去機場佢地都送!雖然呢個價錢係呢度應該算係中上消費,但呢個環境加上呢個服務我覺得絕對係物超所值!

 

跟住第二日我地book左我地住嘅酒店RarinJinda Wellness Spa Resort嘅Spa。因為我地都比較遲先book所以只係夜晚時間有位(佢開到夜晚12點),咁我地就book左夜晚10點等我地可以玩完返黎做埋spa先休息喇。其實據講呢間酒店係出名做spa尤其係水療,不過都因為夜喇就唔水療搞咁耐啦。

img_5799
呢間酒店其實幾正!位置好好就喺Riverside,一行出酒店就喺酒吧餐廳都幾旺人氣。

 

今次我就心思思想試下佢地啲package,佢地有一個入場package唔使做好耐都係個半鐘,加上佢呢個package有一個襌音放鬆治療我好有興趣所以就揀左黎試喇。

入去之前又係洗洗腳做下腳嘅磨紗先,跟住又各自入房喇。我覺得呢度環境都靚嘅,不過就似人地啲lounge咁囉冇乜特別,唔知係咪因為真係太夜嘅關係定係佢本身特登調到低光我覺得有啲昏暗咁囉。

我個package係訓係個熱砂床上面按摩,呢個熱砂床係全個package最正嘅項目因為暖笠笠尤其暖住個尾龍骨位真係好放鬆!至於我之前講我好有興趣嘅襌音放鬆,按摩姨姨就係用4個唔同大小嘅銅砵分別喺你四肢同頭頂拷啲音同震盪出黎。的確當佢喺我頭頂拷個銅砵時我feel到個音好似環迴立體聲咁喺我兩邊耳走,而我個心真係會跟住佢每拷一次嘅音向下沉。不過其實個歷時好短,可能因為佢間房嘅隔音唔係幾好會聽到出面馬路啲車聲同對面酒吧嘅音樂聲唔夠靜所以維持唔到卦。

img_5794-1
又係我一人獨佔一房!毛巾下面就係啲熱砂黎嘞。

img_5796

 

按摩完之後都有芒果糯米飯比你享用。總括而言呢我覺得呢度按摩其實都OK舒服嘅,但服務黎講我就覺得唔太㦘勤囉以呢個價錢計(唔知係咪因為我地最後一批客佢地趕收工)。環境都麻麻唔夠靜因為隔唔到街外啲嘈音,可能日頭黎啲酒吧未開會好啲卦。

 

 

所以總結!就呢個兩間中上消費嘅spa黎比較,我會大大力推薦Fah Lanna Spa!!! 大家如果去清邁都不防試試!

題外話,喺清邁周圍都幾多寫住係女子懲教所按摩訓練中心嘅按摩店,我唔知係堅定係gimmick黎呢?不過做個腳底按摩收費都好平同好多人幫趁。有一個下晝行行下落大雨,我地諗住入去按下腳順便避下雨,點知登記嗰兩個著住疑似懲教人員制服嘅姐姐話今日full晒明天請早!

img_5733
入面嗰兩個人真係著晒制服㗎冇呃你!