無啦啦又黎個毒遊快打首爾!

趁而家仲放緊我個悠長假期時啱啱上個星期黎左個快打首爾。

而我又發揮我hea遊嘅本色,冇plan行程冇睇旅遊書只係上網睇下大概有咩地區去記低左就又隻身出發了。不過呢啲新世代去旅行,只要有電話有得上網去邊都唔難啦。

除左Google map一定要有之外,臨出發前download定鐵路app冇死。我覺得首爾呢個地鐵app Korea Subway非常好,其實同日本個Navitime transit介面同用法差唔多,仲要好在佢有多種語言選擇,中英文都有咁就唔使怕唔識睇佢啲韓文啦。

IMG_9211

點解我話毒遊?除左我又自己一條友去之外呢個trip真係好毒因為只係買野、買野同買野。其實首爾我話想去好耐,我知道如果我去一定買到破產,但因為今年年頭有諗過要去,加上又無啦啦有個假期咁咪去囉。不過我都唔算買得好勁啫,去時8KG返黎都只係20KG未爆喼未超重,好叻女!

好喇又係嗰句詳細遊記唔打喇大家睇其他人遊記啦人地寫得好我好多,我反而想簡單地講講我去完首爾得出嘅感覺:

  1. 我覺得韓國啲女仔禮貌真係麻麻,尤其係喺機場,我去information centre問野佢地係一副唔想答你、你問啲問題咁廢嘅樣咁答你,仲要只係問一句答一個字咁。我唔想一竹竿打一船人,可能我咁啱遇到呢兩位黎M心情唔好卦?但我覺得機場係作為一個國家境內旅客接觸你地嘅第一站,比個笑容黎都好卦?反而呢oppa阿豬媽同大叔係好啲helpful啲。我終於明點解啲仔覺得韓妹唔好⋯⋯
  2. 因為我呢個trip只係買野買野同買野(都有食野嘅),所以我只可以講下我去過嘅地方邊個最值得行(我指買野):
    • 東大門:冇時間可以唔去,因為係旺中質素但銅灣灣地帶價錢,買飾物囉都okay嘅。個Hyundai outlet啲野係幾靚嘅不過貴囉。
    • 弘大:真心中意呢個地方,年青人地方真係唔同啲,好多型格小店小清新cafe,衫嘅quality係okay正,大部份價錢都係200港紙咁上下(就係咁先衰樣樣唔過二百就唔覺唔覺買好多)又有港女韓妹中意嘅Chuu同stylenanda嘅flagship store,真係買到喪心病狂。周圍又好多食肆食炸雞呀燒肉呀咁,全部都開到好夜,行到天黑就可以食埋個飯先返去!
    • 三清洞/ 北村/仁寺洞:其實呢三區唔係行街shopping嘅地方,不過三清洞都有少少舖頭仔賣野都幾特別。北村我覺得好值得去,因為睇下啲韓屋咁我覺得好靚,行得攰攰地有啲韓屋賣飲品比你入去坐下抖下非常舒服。仁寺洞就順便行下囉冇乜野睇都係賣啲遊客野,但我嗰日喺仁寺洞一條小巷嘅盡頭搵到一間兩層高嘅韓屋茶室嘆左個韓式下午茶係好正㗎!
    • 新沙洞/狎鷗亭:我覺得新沙洞都好好行,街路樹道一帶不停地轉入啲小巷全部都係小店,但呢度賣嘅野就比弘大貴我覺得係高價位,不過當然都會搵到啱價錢又啱心水嘅所以真係又要慢慢行。Gentle monster嘅flagship store都喺新沙洞呢度(其實我唔係特登要黎只係九行又比我行行下去左呢度)狎鷗亭我都係路過咋因為我已經行到冇力行,不過其實好近所以兩個地方可以一齊去。
    • 明洞:因為我就係住喺明洞所以我冇特登留時間行,只係每晚返酒店放低啲野抖抖再出去明洞搵食食完飯先行。最多就係化妝品護膚品店所以我全部留晒喺明洞買買完即刻拎上酒店。至於買衫我覺得普通,賣啲野同東大門差唔多。不過佢有成三間åland,其中一間係全男裝,fans應該會覺得好開心(我都好中意åland,不過我覺得啲野來來去去都差唔多所以冇乜收獲)
    • 廣藏市場:其實除左以上地方仲有廣藏市場我覺得都要去,成條街都係小檔攤食野花多眼亂見到都開心晒。去到食佢啲綠豆餅呀炒年糕呀kimbap呀你會發現同香港食過嘅實在差太遠!
  3. 可能我得4日5夜只係去晒啲買野地方冇乜去觀光,所以我覺得首爾只得shopping…但唔知點解相比日本,我都係中意日本旅行多啲。因為日本係有得食有得買又有得觀光感覺好似平衡啲(韓國fan屎唔好打我,我知我應該要比多幾次機會韓國,但我驚我再去,都只係不斷地買買買⋯⋯)

打打下變左咁大篇添。下次講下我買左啲咩先,或者大家有冇野想知我都可以寫下!

廣藏市場實在係太多野食喇!IMG_8359呢度嘅綠豆餅真係冇得輸一定要試!IMG_8360

弘大好多呢啲cafe同舖頭仔,全部都好靚好特別。但佢地好晏先開所以唔使朝早黎,我一點左右到都好多cafe未開。IMG_8530IMG_8535嗰日無啦啦落好大雨,唯有搵間cafe坐低嘆咖啡食個scone避下雨順便抖下。IMG_8602

三清洞都有啲好特別嘅舖頭IMG_8680啲新式韓服好鬼靚!有日喺街度我見有個女人著住真係好鬼型!IMG_8681北村成個山頭都係呢啲韓屋,玩影相真係可以喺度玩一個朝早。IMG_9182喺仁寺洞就係亂行行行下見到呢間cafe超中意,死都要行返轉頭上去坐!IMG_8886個凍嘅五味子茶好鬼好飲!IMG_8901

新沙洞一出地鐵站就見到呢啲整容醫院,成間酒店咁。IMG_9002新沙洞嘅巷仔入面嘅cafe同舖頭。記住喺首爾行街唔好行大路,轉入小巷入面啲舖頭正好多㗎!IMG_9024

Advertisements