巴黎住宿酒店hostel以外選擇 – airbnb studio flat rental

由於今次只係一個人出發冇人share房租, 所以住宿既選擇唔多。我個人唔中意住hostel所以呢個不在我考慮之列。以我比自己每晚HKD500上下既budget租酒店只係租到兩三星但睇好多間啲房都好唔開胃。結果我選擇喺airbnb搵studio flat, 終於就比我搵到呢間within budget又乾淨企理有廁所廚房又地點安全既studio喇!

今次我住喺15區係喺巴黎南, 呢區完全係巴黎既住宅區。不過其實都好方便行去巴黎鐵塔只需大約二十分鐘, studio一落樓就有cafe有其他唔同國家既食肆有雜貨店有超市有藥房仲有好多bakery。行去14區都唔係好耐大概廿分鐘到就會有好多好好味好正既餐廳同cafe (係呀我喺巴黎大部分時間都係行路)。 好近電車站但行去metro站就要耐啲十分鐘到不過都唔難行。唯一唔好就係佢喺二樓但冇電梯只有樓梯, 不過我得一個大喼其實都只係辛苦兩次所以都唔係大問題。

Studio flat入面咩都有, 包括正常浴室(呢個好緊要!), 仲有一個面積雖小不過咩都齊全既廚房。Wifi電視微波爐焗爐多士爐電器樣樣齊! 所以其實我有好幾餐唔知食咩好都係喺studio自己煮。

以下係我自己係airbnb搵住宿既小小心得以供參考:

  1. 1. 搵既時候可以自己揀search要房間, 床位, 定整個apartment。因為我見好多都只係出租廳既梳化床, 甚至訓地下都有。咁如果唔介意既話, 當然價錢都會再平啲啦。
  2. 2. 除左睇相之外, 要睇清楚主人家寫既description屋入面有咩設備, 唔好怕長, 但一定要睇。就好似點解我上面要強調我住呢間有正常浴室呢, 因為之前我睇中一間差啲想租既佢原來係只有一個shower (好似企缸連趟門)但個廁所係屋出面即係公家要用鎖匙去! 睇相都唔會為意到囉! 當然如有疑問就直接send email問屋主最好。
  3. 3. 記得留意下其他租客留既意見, 睇下會唔會貨不對辨。
  4. 4. 每個出租既盤都會有host既資料, 有個response rate同response time, 如果見到個response rate好低既其實搵多幾間穩陣唔好浪費時間。
  5. 5. 唔好老定睇中一間問左就算, 真係幾間一齊問。因為就算你想入住既時間係available人地都未必租比你, 記住你揀人, 人地屋主都有權揀你。
  6. 6. 睇清楚取消booking退款設定, airbnb分左5個級別, 但我見好多都係strict, 即係7日前取消只退50%

我冇影到好多相呀, 不過如果有興趣想睇多啲上airbnb自己搵啦, 15區studio flat唔係好多所以好易搵到, 而且屋主放上去既相同真實係一模一樣, 所以我入住時都好開心因為冇比人呃哈哈。因為我早機到巴黎所以我出發前send email問左屋主Julia可唔可以早啲check in, 佢好好人一早係屋入面等我添。我地email聯絡都好順利而且佢覆得好快所以我好放心。(以下相片都得到屋主同意先放上黎, 切勿轉載唔該!)

P1040617s

↑ 一入屋係浴室(冇影相, 不過好乾淨的), 跟住就係一張梳化床, 但非常舒服我晚晚都好好訓。

P1040621sP1040625

↑↓ 床對開係飯枱同窗, 窗望出去係人地既小花園同其他民居(P.S. 花園有隻肥貓我朝朝打開窗都見到佢喺度散步)

P1040619s P1040615s

↓ 麻雀雖小但五臟俱全既廚房

P1040616s

↓ 15區附近就係咁喇, 大部分都係住宅小舖頭同cafe咁。所以都好寧靜同安全。

P1040547s P1040558s

下篇講咩好呢? 講食野先定交通先好?

我要重新寫BLOG寫遊記! 之巴黎的個人遊

好耐之前都有寫BLOG寫遊記既習慣, 因為十分鐘熱度加上太懶已經放棄左好耐。但今次去完巴黎之後好想重新再寫喎, 可能因為今次自己一個人既時間多, 我有時間自己諗野都寫野。如其收收埋埋, 不如同人分享, 順便滿足下自己想值此成名晒命既虛榮心LOL (路人: 發你個春秋大夢啦!!!!)

巴黎其實並冇其他人講得咁恐怖治安咁差, 喺巴黎十日我都見到有差人巡街 (helpful與否我就唔知喇好彩地我唔使搵佢地)。旅遊區如鐵塔, 聖心堂, 聖母院,香榭麗榭大道等係真係會有啲人扮晒小丑咁比你影相或搵你做問卷或者賣其他野但只要你唔望佢同唔睬佢其實都唔會搞你。因為自己曾經喺香港都比人偷野所以好Alert全程都袋放前所以都相安無事。至於地鐵站乾淨程度, 我覺得還好啦同倫敦既tube都差不多啫, 起碼我見唔到有老鼠LOL 可能我冇乜期望所以我都冇乜失望卦哈哈。總之其實自己小心啲就唔會有咩大問題, 最多都係蕩失路架啫哈哈哈。

今次去巴黎其實都唔知係巴黎黑仔定我黑仔, 不過我冇事喎所以都應該係巴黎黑仔卦LOL 黑仔事件如下:

  1. 天氣不似預期~ 天陰落雨仲要落埋拳頭咁大既冰雹落左兩三日! 好彩都係夜晚先落我已經返左屋企
  2. 羅浮宮出面條橋因為太多鎖太重冧左….(我冇掛鎖呀唔關我事)
  3. 最後一日要返香港遇著鐵路罷工去機場既RER B全線停駛

喺正式開始詳細寫篇章前黎一個小總結先, 巴黎其實真係幾易行, 每個站既距離好近所以可以唔覺意就一行行左幾個站。Metro其實好方便好易明, 就算喺路面行到唔知方向, 是但搵到一個地鐵站就一定返到你想去既地方 (因為我次次都係咁搵路) 。巴黎食野係貴, 但亦都有合理價錢既選擇 (當然都係比香港貴但唔可以比較既)。巴黎既建築真係好靚絕對係值得黎睇下。巴黎既人真係幾COOL不過其實三九唔識七人地唔同你笑都好正常。巴黎係咪好浪漫我又唔係好覺喎不過我一路都覺得好唔真實就算我見到鐵塔我都唔相信自己已到巴黎。你問我會唔會再去會呀因為我今次真係hea遊仲有好多地方未發掘呀, 而且有啲野食令我好想再返去食! (係喎其實我想念一個地方都係離唔開食野)

寫住咁多先唔好期望我會寫晒行程喎因為我其實我自己都冇行程。我只係寫啲特別既野架咋哈哈! 下次會先講下我喺airbnb租既studio先!

P1040611s P1050138s P1050188s P1050214s P1050270s