日本DAISO/ 香港十二蚊店好物分享

好耐冇寫過美容blog喇。唔係我懶冇保養呀只係最近都冇乜特別野好寫。

大家都知我之前去咗大阪啦,咁我行心齋橋行到冇野好行就走咗入DAISO行啦。其實DAISO啲野大部分香港都有啦而家,不過啲yen而家平啲嘛咁連稅都係108yen先七蚊咁上下用開嗰啲野咪好似抵啲囉😂 如果大家記得我之前都有講過十二蚊店嗰支眉gel,一場嚟到我咋咋臨入定兩支先啦梗係(題外話: 我之前喺log-on見過支類似嘅,一樣都係指甲油咁嘅packing一支賣8x蚊,十二蚊呢支係咪正先?)除咗眉gel之外我今次仲買咗三個silicone嘅mask,應該唔係新野嚟啦不過平時喺香港十二蚊唔會諗住買,喺日本見佢唔七蚊雞咪買嚟試下囉。有邊個同我一樣去旅行就亂平野?

首先要講呢兩個face mask。左邊嗰塊係一塊過,右邊嗰塊就喺面兩邊開叉可以比你剪開兩件。img_3857img_3859

我以為呢塊兩件裝會貼面啲,點知唔知係我塊面太細定佢太大塊,結果係一啲都唔貼面,勁多空位露出,下巴位完全兜唔到。

img_3877

相反呢塊一塊過嘅就好貼面喇。只有耳門前少少空位,下巴位佢係有做到立體所以兜得到個下巴。對於我嚟講個size係啱啱好。咁其實呢塊silicone mask有咩好呢?我中意佢可以固定住塊paper mask,咁我敷住paper mask都唔使只可以訓喺度坐喺度走來走去都唔怕會跌。同時佢又令塊paper mask緊貼塊面一來啲精華冇咁易蒸發二來佢拉緊又令塊面吸收啲精華好啲。所以而家我敷paper mask一定會用埋佢!

跟住就係呢對silicone嘅腳踭套。img_3479 img_3480

其實佢真係好似對襪仔咁囉套住喺腳踭位置。包裝上面都有寫喇教你沖完涼搽cream再著佢咁就會令個腳踭好軟滑。我買咗之後即試,嗰時日本仲係凍同乾由其是喺酒店開暖氣超乾,我搽左lotion再著住佢15分鐘,唔知係焗住定點,腳踭又真係又軟又滑喎。而家我都係做完腳踭去死皮都會用佢敷下腳踭咁囉,咁夏天著涼鞋就唔使比人見到個腳踭又乾又多死皮咁核突嘛哈哈。

Advertisements

唔使去法國都可以好似去左法國藥房咁喇!

其實心裡面有個問題一直問自己 -究竟寫呢個blog係咩主題?旅遊?美容?定廢up?其實一開始我係只諗住寫旅遊blog,但其實一年都係去得兩次旅行,最多三次,可以寫到幾多野呢?反而研究下買下skin care就最多咪寫下囉,點知原來寫beauty呢度反而多人睇啲。整整下我都寫多左beauty topic。我寫其實唔係想R試用嗰啲野,只係純粹分享,純粹比我搵啲細㙯做下咁咋。琴晚有人問我寫比邊個睇,冇呀,我冇target reader,大家中意就睇下咁囉,唔啱睇咪當我廢up囉哈哈哈。

好入返正題,其實今次我想講嘅係我有日無意中行左入恩平道發現嘅呢間屈人寺旗艦店。上網睇好似都係上年年中先開。其實地方就唔係好大,不過呢,就有幾多新入嘅外國skin care牌子,搞到我又放低左一千幾百咁囉。

其中一個就係我之前都有講過嘅Filorga!!! 我真係堅愛佢啲野,我知其實水貨店有得賣,但我唔太中意去水貨店,所以當我見到佢呢度一整個section齊晒所有野簡直歡喜若狂!感覺好似去左法國啲葯房咁哈哈。

IMG_5977

基本上你想要嘅所有filorga產品都齊,包括人人都話係佢嘅皇牌sleeping mask(我未用過,用晒手頭啲野就會試 XD)。老實說,佢啲野其實唔係平,但過左個大海黎到香港之後都只係貴啲啲我覺得都可以接受。嗰日本來都唔打算買野,所以只係買左我之前都講過話好好用嘅eye cream, 價錢唔記得喇好似係400咁上下。

IMG_5979

除左Filorga之外佢仲有好多牌子skin care同化妝品,我記得嘅有avene, NYX, Sally Hansen等等。仲有phyto,呢個我有見過部份萬寧係有入呢隻野,但產品都唔齊,呢度又係一個section有齊晒唔同嘅hair treatment products。我試用過佢盒保濕修護嘅hair mask,之前染完頭髮又日日tongs搞到啲頭髮又旱又易打結,用一次之後個頭勁滑又光澤仲keep到好耐,所以見到呢度有即刻入貨。價錢好似係300幾。

sales姐姐見我猛咁研究phyto, 就介紹我用呢個瑞士牌子LMB嘅shampoo & conditioner。不過我覺得差不多二百蚊買支洗頭水又唔係大支我咁多頭髮又日日洗頭好唔抵用,反而我試左呢支噴頭髮嘅tonic ,噴完再梳頭即刻滑晒又貼服啲。佢成份主要係玫瑰水同啲植物精華,話可以幫頭髮提供養分。味道都幾好聞好自然唔似香精味。我而家日日夾tongs前就全頭噴,夾完啲頭髮都仲好滑好順。一支好似係百六蚊咁上下。

IMG_5980

埋單之後仲送左支大size嘅uriage thermal water spray同幾支lip gloss(唔記得咩牌子)。

話時話,而家萬寧屈臣氏都分別入左好多唔同skin care品牌,早一兩個星期我買左美國Peter Thomas Roth嘅masks都不錯用,遲啲又講下。

759正野分享!

不得不讚759個老細同一眾買手,生意頭腦之廣以至入貨品種之多加上咁既價位真係造福大眾市民!至少小市民如我就幫襯唔少!(呢篇唔係廣告呀,純粹發自內心咋哈哈)

除左759賣食物既舖之外我行得最多就係kawaii land。以下係咁耐以黎買過又覺得最好既頭3位!

1. 韓國Mizline壓力襪

759 kawaii land 韓國 Mizline 壓力襪 呢對壓力襪其實我買左好耐,唔記得係上年12月定年頭1月買。雖然唔識睇韓文,但睇圖都估到佢話有修腿功效。而我真係試過一次著住佢訓第二朝起身條象腿即時幼左2-3cm。不過其實我平時都只係當佢普通絲襪著。雖然佢有210針,但唔覺得好緊,都幾舒服,最重要係佢厚度適中可以保暖!喺香港著佢就保我過到冬天,就算我今個冬天去左比利時零下天氣著佢加uniqulo heat tech legging加長靴我完全唔覺凍!加上佢著出黎修腿既線條令我條象腿睇落都變美腿!仲有一樣我大愛既係佢唔會跌褲浪!!!價錢我記得嗰時好似折左只係90幾蚊!可惜既係我只見過佢賣過一排,到我著過好著想入多條已經搵唔到。如果佢再返貨我應該會亳不考慮再入多條!

2. 日本神戶美人純米水

759 kawaii land 日本神戶美人純米水 呢支純米水性價實在太好!如果遇著有折時折實價都唔使70蚊!雖則我唔知佢係咪純天然但佢冇酒精成分而且夠保濕。toner黎講呢個價錢呢種效果我覺得平靚正!759好多時都有貨我只係見佢有一排冇入所以襯佢有折有貨都入定兩支先。

3. 台灣Heme防水眼線液&Lip gloss

759 kawaii land 台灣Heme防水眼線液 Lip gloss 話係防水眼線液但其實佢一啲都唔防水,因為用水一沖即時甩晒。不過我依然覺得佢好好因為佢防油!眼油多佢唔會化到變熊貓眼。用左一日佢都會有少少甩不過佢只係甩成粒粒所以好容易整理同補返條線!而且佢好出色畫一下已經夠晒色!至於另一邊個lip gloss我覺得不過不失啦但因為我唇色深所以係好睇到佢隻淺粉紅,當佢透明lip gloss都可以。最重要係價錢折左只係40幾蚊仲想點呢!?

759 kawaii land 台灣Heme防水眼線液 Lip gloss 我覺得佢呢個公主同皇后既包裝都幾靚!

除左呢三樣野仲有一樣野我想講,就係呢隻pure smile lip scrub。我見佢都入左幾多呢個牌子既產品,唔知係只真係日本牌子佢全部野包裝寫日文不過都係韓國製。

759 kawaii land pure smile lip scrub 佢有好多隻味道我買左黑糖味。一打開真係好大陣黑糖味同埋用佢時唔覺意lam到係真係甜!我覺得佢有好有唔好,好就係佢可以去到死皮但用完唔覺得好乾同都幾潤,唔好就係唔知佢係咪加左好多好似凡士林咁既蠟去保持潤澤度但如果用手磨完個咀或者啲產品搽左出咀既範圍去到咀邊或者下巴就覺得好greasy! 但幾廿蚊既貨仔就算數啦不過應該唔會回購。但係同一品牌佢隻hand Cream我就覺得好好用,好香(檸檬茶味)同真係好潤。我放喺公司粗用十二蚊貨仔真係好過crabtree N倍!

其實我見759入既貨同其實log on都有,但價錢實在相差太遠!

Sephora大出血

從來都冇諗過喺加拿大竟然可以用咁多錢,都只怪有Sephora lol. 我幾中意Sephora呢種賣化妝品既形式,一個地方有晒高低價位既item仲要開架咁比你試,有需要時候靚靚BA姐姐又會拎晒唔同牌子既同類型product同你試上面等你試到啱為止。真係唔明點解Sephora要撤離香港T^T 因為平時實在太中意喺youtube睇啲美國囡囡講化妝,但好多時佢地用既product香港都冇得賣,有得睇冇得試好鬼冇癮。難得去到美洲,雖然加拿大買比美國貴,但有得買唔買就棧後悔,所以見啱就買喇!有啲野其實都只係比香港平啲啲,不過喺香港我又唔會特登去睇所以就順便買埋啦。

加拿大 Sephora 美妝 化妝 Tarte Bio oil NARS Maybelline Rimmel Fresh Urban Decay

1. Bio oil 買大送細裝 – 唔係喺sephora買,純粹嗰時喺costco見到覺得好抵所以買,但返到黎發現唔係真係平好多,唔特別講。已經唔幾得幾錢,好似差不多廿蚊加紙。

2. Fresh flower power set (rose face mask 30ml, rose floral toner 15ml, sugar tulip tinted lip treatment, lotus youth preserve face cream 30ml) – 呢set野真係抵!連埋稅先至CAD56, 咪睇佢少少地個mask得30ml但我用左5次仲有三分一淨。支唇膏仲係正常size添。其實fresh個rose mask一路都想試,但真係覺得佢貴,咁啱見到呢set野即時入手!老實說,個mask係ok的,同埋我幾中意隻玫瑰味好自然,但你問我佢係咪真係值咁貴600hkd 100ml我又覺得唔太值。個lotus cream保濕能力ok,唔厚身都唔算lup。toner未試。反而支唇膏有驚喜,好潤好上色。冇行開香港既fresh counter唔知其實香港有冇得賣呢set野?

3. Urban decay eyeshadow primer potion – urban decay 呢個牌子成日聽啲美國youtuber話好好,每次出親既eyeshadwon palette都話正,所以見到都即刻買支。不過未用所以評唔到。CAD14未連稅。

4. Too faced chocolate bar eye shadow pallette – 其實一心就諗住買urban decay既naked系列,但去左兩間sephora都只係見到naked 1/ 3,第2就冇貨連tester都冇,因為覺得啲色唔係好啱自己所以都冇入手。反而見到too faced呢個chocolate bar有貨,啲顏色又幾啱自己,加上佢好鬼得意既鐵盒朱古力packing,所以都冇乜考慮就買左。佢一盒入面有啞色同閃既eyeshadow我覺得幾易用。CAD59未連稅。

加拿大 Sephora 美妝 化妝 Too faced chocolate bar eye shadow pallette

5. NARS pure radiant tinted moisturizer – 算我孤陋寡聞我之前真係未聽過tinted moisturizer所以搵左ba姐姐解我知順便試埋上塊面。佢差不多拎晒咁多個牌子既tinted moisturizer比我試,最後我揀左NARS,我覺得佢效果其實真係好自然但coverage相對係低,少許紅印佢係遮到但唔好諗住佢可以遮到黑眼圈。但佢好在係唔乾,所以我就當佢係base咁用,搽完佢再上mineral fondation,或者用佢溝濕粉。Cad52未連稅,check過連稅價錢只係平香港少少,所以唔使特登喺加拿大買,當純粹享受下sephora既services。

6. Bath & Body Works Japanese cherry blossom deep clean hand wash & body wash – 無聊見到入去睇下,全舖頭味道最好聞就係佢,見洗手液買二送二沖涼液又送三送四咁平咪買囉,為返港紙都係廿幾蚊支,買黎當手信派。好唔好用?普通。洗手液就幾好可以做埋磨沙。

7. Tarte smooth operator Amazonian clay pressed finishing powder – tarte呢個牌子係我重點要買,因為又係聽得多啲美國妹講有幾好用但我又冇得試所以好葡萄。呢盒定妝粉幾滑,而且定妝能力都幾真心幾好,過左大半日我都冇好油面。同埋佢係pressed盒裝我覺得幾方便。cad41未連稅。

加拿大 Sephora 美妝 化妝 Tarte Tarte smooth operator Amazonian clay pressed finishing powder 加拿大 Sephora 美妝 化妝 Tarte Tarte smooth operator Amazonian clay pressed finishing powder

8. Tarte amazonian clay full coverage airbrush foundation – 佢係foundation powder,試上手好滑同幾出色所以就買了。未開黎用所以冇得評。cad 43未連稅。

加拿大 Sephora 美妝 化妝 Tarte Tarte amazonian clay full coverage airbrush foundation

9. Tarte Amazonian clay 12-hours blush – 我揀左呢隻有閃粉既橙紅色。好驚喜地,佢話12個鐘,真係一整日都keep到色,只係甩左少量,所以我非常满意。cad31未連稅。

加拿大 Sephora 美妝 化妝 Tarte Tarte Amazonian clay 12-hours blushage

跟住就係一啲藥房買既開架貨,係呀行到邊買到邊呀真係。

10. Maybelline instant age rewind eraser makeup – 呢支野香港都有類似,不過佢綠色packing既mineral foundation系列,但美洲好似就係呢支給紅色age rewind。純粹係見到有個居美既韓國youtuber成日用呢支野黎做highlight 所以我又貪得意買黎試下,質地其實好薄同埋乾乾地,唔可以靠佢遮瘕但做highlight ok既因為個包裝一個圓頭咁好方便。cad16.99未連稅。

11. Rimmel eye makeup remover – 哈哈我知,rimmel係英國牌子唔係美洲既,不過因為我唔記得帶落妝過去所以要買。唔多講,佢係水咁重眼裝或者用防水mascara落唔到,普通粉底ok。特價cad3.99未連稅。

12. Rimmel sun shimmer maxi bronzer – 又係見到佢特價cad6.99咁鬼大盒所以買,而家我都係用佢做shading。

13. Cover girl lash blast fusion volume+length mascara – 未用,唔知好唔好,純粹又係見佢特價cad6.99所以買。我見有啲youtuber都有用佢應該唔會太差卦。

好啦大致上就係咁喇。