靚爆胭脂 – Hourglass Volume 3 2017 Holiday Palette

靚爆胭脂 – Hourglass Volume 3 2017 Holiday Palette

好喇呢度又完全荒廢咗喇。因為我太懶都冇乜動力寫野認真抵打。

其實我九月尾十月頭去咗加拿大遊山玩水咗兩星期,唔寫遊記喇都冇乜特別野寫同埋文字其實都唔係好表達到嗰啲北極光真係一定要睇一次呀仲有加拿大嘅山脈同湖水真係靚到成幅畫咁嘅感覺,所以大家想知就去睇下我instagram啲相啦。因為個trip有兩日去咗西雅圖,人生第一次踏足美國呀,終於有機會行我成日都好想行嘅Sephora喇!!!所以呢就襯呢個機會又去放低幾百兩銀咁喇。

今次我target只有一個,就係老連賣到勁貴嘅hourglass。咁啱得咁橋我幾個月前跌爛咗我自己嗰盒,咁就死都等呢個機會買盒新啦!同行另一位朋友同我目標一致,仲一早睇定有咩好買,所以嗰日我地就(自己以為)極速用咗一個鐘時間掃貨喇!

img_8960
其實都係買咗咁多野之嘛,我仲要都唔係好知價,返到嚟先知LM連稅仲要比喺香港買貴啲。所以大家應該做下功課先,唔好學我!

其實我都唔係買咗好多野咋,都係啲我覺得啱用嘅野囉,啲咩gift set呀eye shadow palette冇再買喇因為其實自己都唔係成日用。但hourglass volume 3呢個palette我忍唔到手入咗,因為實在太太太太靚喇!!!

img_8963
題外話,新束束嘅hourglass盒身係玫瑰金反光真係堅靚。但唔知其實係咪會氧化,我盒胭脂就咁放櫃面兩個月後佢就變成有一點點又唔令面。相反盒palette放櫃入面就冇事。所以大家要保持佢個靚包裝就記得放入櫃桶喇。

今次呢個holiday limited edition有三格新product三格現有product。新野有兩隻新色嘅胭脂同一隻新嘅highlight(右下、中下、同中上),其他三格有兩隻唔同色嘅finishing powder同埋一隻bronzer。

img_9370
左:我跌爛咗嘅舊色 – Diffused Heat;中:新嘅limited edition Volume 3 palette;右:新色胭脂 – Euphoric Fusion

我最中意就係嗰highlight!但如果你係中意啲勁閃勁反光嘅highlight呢隻就唔對你口味喇。佢隻閃係好subtle嘅閃,我用嚟搽顴骨位佢暗暗咁有一野光澤咗又自然睇又落立體啲。Highlight我多數都係搽顴骨位,有時搽埋鼻樑同唇山位就成個妝睇落再精緻啲囉。

跟住呢嗰兩隻新色胭脂,中下嗰隻叫Surreal Halo,右下嗰隻叫Pure Effect。Surreal Halo係暗紫色胭脂,最近好多雜誌都有講紫色胭脂,其實一啲都唔難carry,佢搽上面係暗紅色接近自己面紅嘅顏色,我覺得比一般粉紅呀桃紅呀自然好多,如果唔係走甜美路線我覺得搽紫色胭脂其實仲好睇。而另外嗰隻Pure Effect就係桃紅色,搽上面好sharp好粉紅。呢兩隻色嘅胭脂都係一貫咁顯色,掃一至兩下已經夠,如果掃多幾下就會好深色,尤其是係隻Pure Effect,手多的話真係變馬騮屎忽,所以記得輕手!點解我咁中意佢地嘅胭脂係除咗顯色之外亦都好long lasting,朝早返工搽一次到放工嗰時都仲有喺度!

img_9371
palette入面隻紫色胭脂Surreal Halo我同我另外買嗰盒Euphoric Fusion嘅比較。上面嗰隻係Euphoric Fusion,下邊係Surreal Halo。呢度我係來回捽咗兩三下。今次啲新色胭脂全部都有少少嘅金色閃粉喺入面,又係好subtle都閃閃好鬼靚!
img_9372-1
4隻胭脂色嘅swatch一次過睇晒唔同效果。左一:Pure Effect (From Palette);左二:舊嗰盒Diffused Heat;右二:Surreal Halo (From Palette);右一:Euphoric Fusion。呢度我就捽咗多少下大概來回五六次左右。

至於嗰兩隻finishing powder,一隻叫Diffused Light,帶少少黃色tone,但其實搽上面係半透明至少少奶白色,另外嗰隻Dim Light就係帶少少粉紅底嘅。我覺得兩隻色喺塊面度掃少少嗰分別其實唔會好明顯,所以我都唔知應該點用佢地。後來睇美國啲姐姐嘅review佢地有啲人會用嚟做唔同部位嘅定妝,所以我而家用Diffused Light掃眼底定concealer,胭脂重手得滯或者要做blending就用Dim Light掃面頰。

至於隻bronzer呢我係未用過嘅,佢應該都係好似其他product咁係淡淡嘅啡色唔會一野就勁深色。我諗用嚟打鼻影應該都可以。

除咗呢個palette之外我仲買咗佢地隻新胭脂,冇呀難得嚟到又平成老連一舊水就唔爭在買埋啦。佢好似今年胭脂出咗4隻新色,我諗住買啲我冇乜嘅色所以最後我揀咗又係紫色系嘅Euphoric Fusion。佢呢隻紫比palette入面嗰隻紅啲紫啲(palette嗰隻係暗啲),搽上面我覺得呢隻就會紅啲palette嗰隻就暗紅啲。其實兩隻都好自然,睇下你係想要咩效果喇。不過palette嗰隻我有時會兩隻色溝埋嚟用,感覺好似冇咁沉色咁囉。

好啦同場寫多個review。我其實仲買咗盒Anastasia Beverly Hills嘅眉膠(DIPBROW® POMADE)。我都係喺youtube同instagram睇得多啲外國姐姐用嚟畫眉畫得好鬼靚先燒到我買。佢好似eyeliner gel咁囉,有好多隻色揀。一盒我記得為返港紙150咁上下,但掃就另外買,支掃嘅價錢同盒膠係一樣所以我冇買到用返自己啲角掃算。

我其實已經揀咗佢最淺色嗰隻叫Blonde嘅色,但大力畫出嚟我覺得都好深色,介乎係深啡同黑之間咁,所以我估佢嘅深啡應該會好黑(我冇時間試色呀嗰日,見到就即擸即比錢)。我而家日日都係用佢畫眉,用角掃嚟畫其實都幾易控制,同埋佢呢因為係膠狀佢可以gel住掃啲毛唔會散所以畫眉尾都可以畫好幼,但最好畫之前搵野抺一抺啲份量先(我通常都係喺手背抺)唔係一野好大pat咁畫上眉就變小新好難救。另外佢呢隻眉膠係話防水,我畫咗條眉去做運動流勁多汗條眉尾仲喺到(前題係當然你唔會抺汗卒條眉啦),但我唔知我呢個可唔可以作準因為我都習慣性係會畫完眉再上12蚊店嗰支眉gel coat。

img_9379
上面喺朝早畫完條眉出門口前影,下面就係放工食完飯返屋企影。都超過成12個鐘,眉尾同眉峰都仲喺度!

好今次就講住咁多先有機會又再講下其他美妝產品。

Advertisements

一次試晒5隻mask! Peter Thomas Roth Maskaholic set

好耐之前有提過嘅Peter Thomas Roth嘅mask set, 其實都用左好耐拖到而家終於寫喇。佢支toning lotion極緻黃金原肌液都用左4/5順便寫埋啦!

呢set mask我係喺萬寧買,價錢已經唔記得。我一心其實係想試佢隻24K Gold Mask, 但正常size一盒正價好似係800幾蚊,咁而家佢差不多價錢但有齊晒咁多隻mask試都真係幾抵用。

IMG_6335 IMG_6340

一盒5隻mask, 有青瓜啫喱面膜、玫瑰幹細胞活性修護面膜、南瓜酵素面膜、愛爾蘭黑泥淨肌面膜同埋24K黃金提升緊緻面膜(啲中文名我係copy佢地facebook page,應該冇錯卦?)。

先講青瓜mask,其實買呢盒野前我已經買左樽大。通常我都係用佢黎做sleeping mask,如果嗰晚塊面有啲暗有啲乾或者有少少敏感我就敷佢訓覺,都幾舒服,好快會被吸收唔會好笠痴痴咁,做保濕同舒緩都不錯。

跟住係個玫瑰mask,其實我冇好特別研究佢同埋我好似用過一兩次。好似話有anti-aging, 修護細紋嘅作用。但我感覺唔算好大,所以冇咩評論,只係當佢係其中一個保濕mask咁囉。佢陣玫瑰味唔算好香精味,但我覺得都唔係自然味。所以麻麻地。

南瓜酵素面膜。嘩呢個真係如果你塊面係敏感又好似我咁薄皮我建議唔好亂用!首先,佢入面有南瓜酵素同天然果酸可以均勻膚色,仲有可以係做磨沙。打開個個就已經聞到一陣好強烈嘅南瓜味,我諗唔係人人中意。跟住我係跟足佢指示只係薄薄咁搽一層,唔知係咪佢啲酵素好有料到定係果酸太勁,我塊面係感到毑!!!跟住我都只係敢敷佢5分鐘再好輕力嘅打圈洗走佢,我塊面顴骨同面頰係紅晒!係咪可以均匀膚色我真係唔知,但我覺得如果做磨沙嘅mask佢實在太刺激喇!

跟住呢個愛爾蘭黑泥淨肌面膜我覺得幾OK。因為佢呢個深層清潔mask係唔會敷到變乾,所以都唔怕話做深層清潔但又搞到抽乾塊面咁,清潔嘅能力都算合格。但我覺得最好嘅係敷完塊面都有啲保濕嘅感覺咁。

最後到我最期待嘅24K黃金mask, 佢話係有提升同緊緻嘅作用。個mask嘅質地好杰身,薄薄咁搽上面之後,我其實都冇特別按摩塊面,等10分鐘後,的確我一啲細嘅幼紋已經睇唔到 ,而且塊面係感到好滑同埋塊面好似飲飽水咁,好水潤,呢個mask我覺得值得推介!

至於嗰支極緻黃金原肌液,其實我真係當佢toner咁用,質地其實係比一般化妝水杰少少,同埋佢有好似黃金mask咁嘅金閃粉喺入面。當佢係化妝水其實都唔係好啱因為我覺得佢唔可以講好保濕,吸收左之後其實會覺得都仲有啲乾乾地,不過我發現早晚都用佢我一啲暗瘡印好似退得快啲,但收細紋我覺得唔夠mask明顯。

總括黎講,呢set mask係抵買嘅!我好似依然見到萬寧有得賣,有興趣可以去睇睇!

唔使去法國都可以好似去左法國藥房咁喇!

其實心裡面有個問題一直問自己 -究竟寫呢個blog係咩主題?旅遊?美容?定廢up?其實一開始我係只諗住寫旅遊blog,但其實一年都係去得兩次旅行,最多三次,可以寫到幾多野呢?反而研究下買下skin care就最多咪寫下囉,點知原來寫beauty呢度反而多人睇啲。整整下我都寫多左beauty topic。我寫其實唔係想R試用嗰啲野,只係純粹分享,純粹比我搵啲細㙯做下咁咋。琴晚有人問我寫比邊個睇,冇呀,我冇target reader,大家中意就睇下咁囉,唔啱睇咪當我廢up囉哈哈哈。

好入返正題,其實今次我想講嘅係我有日無意中行左入恩平道發現嘅呢間屈人寺旗艦店。上網睇好似都係上年年中先開。其實地方就唔係好大,不過呢,就有幾多新入嘅外國skin care牌子,搞到我又放低左一千幾百咁囉。

其中一個就係我之前都有講過嘅Filorga!!! 我真係堅愛佢啲野,我知其實水貨店有得賣,但我唔太中意去水貨店,所以當我見到佢呢度一整個section齊晒所有野簡直歡喜若狂!感覺好似去左法國啲葯房咁哈哈。

IMG_5977

基本上你想要嘅所有filorga產品都齊,包括人人都話係佢嘅皇牌sleeping mask(我未用過,用晒手頭啲野就會試 XD)。老實說,佢啲野其實唔係平,但過左個大海黎到香港之後都只係貴啲啲我覺得都可以接受。嗰日本來都唔打算買野,所以只係買左我之前都講過話好好用嘅eye cream, 價錢唔記得喇好似係400咁上下。

IMG_5979

除左Filorga之外佢仲有好多牌子skin care同化妝品,我記得嘅有avene, NYX, Sally Hansen等等。仲有phyto,呢個我有見過部份萬寧係有入呢隻野,但產品都唔齊,呢度又係一個section有齊晒唔同嘅hair treatment products。我試用過佢盒保濕修護嘅hair mask,之前染完頭髮又日日tongs搞到啲頭髮又旱又易打結,用一次之後個頭勁滑又光澤仲keep到好耐,所以見到呢度有即刻入貨。價錢好似係300幾。

sales姐姐見我猛咁研究phyto, 就介紹我用呢個瑞士牌子LMB嘅shampoo & conditioner。不過我覺得差不多二百蚊買支洗頭水又唔係大支我咁多頭髮又日日洗頭好唔抵用,反而我試左呢支噴頭髮嘅tonic ,噴完再梳頭即刻滑晒又貼服啲。佢成份主要係玫瑰水同啲植物精華,話可以幫頭髮提供養分。味道都幾好聞好自然唔似香精味。我而家日日夾tongs前就全頭噴,夾完啲頭髮都仲好滑好順。一支好似係百六蚊咁上下。

IMG_5980

埋單之後仲送左支大size嘅uriage thermal water spray同幾支lip gloss(唔記得咩牌子)。

話時話,而家萬寧屈臣氏都分別入左好多唔同skin care品牌,早一兩個星期我買左美國Peter Thomas Roth嘅masks都不錯用,遲啲又講下。

上濕粉工具邊隻好?

我知道其實上濕粉最好用嘅工具一定係用手上,最方便快捷!之不過,搽完之後手指都污糟晒我覺得好”lei hea”,所以我多數都用掃或者海綿上濕粉。今次想講下近排用開嘅呢兩隻工具:

Beauty Blender – 呢隻野喺外國真係比人捧到上天,個個blogger/ vlogger 都話佢超級好用。亦都因為咁市場上都跟風出左好多好似佢嘅海綿applicator。由於睇左好耐外國啲youtuber講佢我心思思好耐都好想要,最後終於都忍唔住去joyce beauty買左隻試下!

我睇人地啲beauty blender多數都係粉紅色,但我嗰日去買時只有set裝係粉紅色,單隻只得紫色同白色。買時我純粹出於覺得白色唔㩒污糟洗完都唔白所以我先㨂紫色,返到屋企google下先知,原來唔同顏色function唔同,白色因為冇染料就係比敏感皮膚用,紫色係同粉紅色一樣只不過係limited edition,仲有黑色同紅色,黑色官方網站寫係適合深色產品使用,我睇youtube有人仲話黑色個錐係尖啲但我睇相又唔係好覺。而紅色都係同粉紅色原版一樣只不過係指sephora嘅limited edition。

IMG_4662

喺未濕水時佢都係細細粒實實地咁。 IMG_4663

當佢濕左水之後size就會double,而且彈力十足。 IMG_4664

的確用佢無論係上咩質地(水啲定杰啲)嘅濕粉都非常貼同薄,上cream狀嘅粉都可以好薄。用佢blend開遮瘕都blend得好均勻,加上佢一粒蛋咁嘅造型可以用到佢唔同位置上唔同野(側身位上面豬登同額頭濕粉,尖尖位上睇同鼻翼位置遮瘕,底部可以用黎上胭脂blend highlight),用佢拖定印都可以,所以基本上可以多用途使用,我去旅行帶佢一粒蛋可以帶少好多掃!清洗方面我基本上都日日洗,可以買佢舊cleaser不過我只係用12蚊場嗰支海綿清潔液。保養得好其實都可以用到好長時間,所以百幾蚊我覺得都算係抵用!

跟住就係呢支資生堂131粉底掃。喺東京葯房我見到佢有大量貨而且好鬼平為返港紙都係80幾蚊所以就買左返黎試下。

IMG_5832 IMG_5833

支掃細細支咁但其實都有啲重量,掃頭斜平腳同好非常密嘅刷毛,刷毛都好軟滑。初初唔識用我用佢直接沾濕粉再上面,非常難blend開同會有刷痕。但上網睇完教學先知原來係要先將濕粉點上面,再用佢黎blend開。結果真係好似beauty blender咁好薄好貼面!cream foundation都可以blend得好薄,不過so far我試過唯一一支blend唔到仲留刷痕嘅粉底就係shu uemura支water foundation,唔支係咪真係水得滯完全唔得。反而beauty blender係海綿就可以喇。我試過用佢blend遮瘕都可以嘅,不過唔知係咪個刷已經濕左粉所以都留左少少刷痕。但我要講佢一個唔好嘅地方就係佢太短,我覺得有少少難揸咁囉。

我的日常 – 上妝篇

來繼續我每日日常出門口前執返正常樣嘅程序。其實唔係有約只係返工我都一律唔化眼唔搽mascara唔畫眼線,因為實在係冇咁多時間哈哈。

做完之前嗰堆保濕程序之後我通常都係等塊面吸收下先。襯呢個時候我就會換衫整頭咁。跟住就首先噴Caudelie皇后水醒下神再黎多次比塊面plum下水先。image

跟住就係用primer喇,之前一直都係用開benefit支porefessional. 用晒之後而家用緊urban decay呢支。感覺其實同benefit差不多,價錢就平啲啲。benefit好似係300? 呢支就係二百幾咁囉。

image

跟住我就用NARS呢支tinted moisturiser,之前喺加拿大買,好似大約係半年前先開黎用。雖則佢遮瘕度唔算好高,屬中等coverage,不過已經夠遮到紅印同均勻膚色,夠自然,同埋都long lasting嘅。

image

呢個之前人人都讚嘅laneige BB cushion, 我都買左黎試下,的確佢搽上面嗰一刻塊面係真係好透光淨白嘅,但其實佢一啲都唔持久,只係幾個鐘就冇左個光澤感,唔知係咪反差太大我直情嗰得會暗左一度咁。所以我而家只會喺出去食個飯就返時先會用佢。不過佢個盒其實真係幾靚嘅。

image

之前嗰排唔知自己做乜咁中意買cushion product, 呢個innis free嘅foundation cushion 就係貪得意買喇。但其實好麻麻,唔long lasting同埋個隻色偏白,為左唔好浪費我而家會喺搽左tinted moisturiser/ foundation之後用佢喺眼底額中同鼻樑做highlight。

image

跟住遮瘕膏我而家用緊呢兩隻。其實我覺得韓牌clio呢隻遮瘕膏真心好用!係!比植村秀呢支野更好!佢唔乾唔cakey, 相反植村秀我覺得太乾。但色就係植村秀啱色啲白啲,做highlight 會出啲。

image

碎粉我冇特別喜好,只要係幼同滑就OK!而家用緊clio不過不失咁啦。唔知大家有冇聽過baking呢個上碎粉嘅方法?我而家每日都係咁上碎粉,的確遮瘕膏係冇咁易甩。想知係咩同點樣做,可以睇下呢度,或者喺youtube打”baking makeup”就有大把教學片睇!

image

眉筆唔多講,用過咁多支都係植村秀畫出黎最自然。通常都係眉筆黎畫眉尾。跟手眉尾或者邊度寫得唔好,我就會再遮瘕掃執返靚個眉型。

image

眉頭我就用眉粉,而家用緊canmake呢盒,多數都用左邊淺色啲隻啡。

image

跟住呢兩樣野勁重要!雖然我頭髮好黑,但我唔中意條眉跟住都咁深色好似好惡咁,所以一定會用淺色嘅染眉膏,etude house呢支麻麻地,唔知點解覺得佢啲色好唔襟,之前用嗰支日牌好啲,但唔記得咩牌子。至於十蚊場呢支眉coat….已經用左第N支喇!又平又好用,唔想做無眉娘畫完眉搽作一層keep到一整日!由其眉頭同眉尾位我唔搽半日就冇左喇!所以每次去十蚊場見到都入定幾支。

image

跟住到打陰影,其實我都只係用brozer輕輕咁掃下顋骨位等塊面睇落冇一片白紙咁平面。用緊呢盒too faced我係托人喺美國買。一來貪佢個盒好鬼靚二來係佢冇咁深色唔會太誇張。仲有佢個盒塊鏡夠大非常好用!

image image

胭脂我而家用緊hourglass,都係搵人幫我買返黎,隻色好鬼靚同好自然!不過佢呢個價錢但個盒竟然係膠我覺得呢度要扣分!

image

跟住urban decay呢支定妝噴霧我覺得冇大家講得咁神奇。出油同會甩粉嘅T字位係依然會甩粉,其他冇乜油嘅位置我覺得係OK嘅粉同胭脂都係keep到一日。所以都係不過不失咁啦。

image

我的日常 – 皮膚護理篇

諗左好耐究竟blog寫咩好,見啲youtuber成日講自己嘅daily routine,咁我都寫返個自己版本當分享下先。頭先為自己每日用嘅全部產品影相先發現原來自己一日真係搽幾多野上面,相太多所以決定分開幾篇blog寫,黎緊幾篇就變成我的日常系列,請大家指教指教!

朝早起身由擦牙洗面開始。而家用緊aesop呢支cleanser,其實我真心中意aseop呢個牌子,因為佢啲野夠簡單,但可惜呢支cleanser就認真麻麻,洗完面之後乾乾地,反而之前我用喺759買嗰支純米洗面膏一啲都唔乾好好用。所以呢支野用完應該唔會再回購。

image

通常隔晚我就會用clarisonic洗面機黎洗面。雖然個BA話日日用都可以,但我都係唔係好敢。用佢洗面感覺真係乾淨好多,同埋我覺得用左佢之後粒粒同暗瘡真係出少左,咁當然深層清潔mask我都有keep住做嘅。我用緊sensitive呢個刷頭,刷毛軟啲,洗面時輕輕貼喺面度由佢轉就可以,絕對唔使用力。

image

洗完面就黎搽toner喇,本來一直都用開我之前講嗰隻純米水,但有排759冇返貨,所以就買住呢支豆乳化妝水頂住先。呢支都個質地杰身啲,保濕度都不錯,但因為佢比水厚身啲我覺得冇咁快吸收到。不過因為佢好大支我覺得性價比係高嘅。

image

跟住就係eye cream,但eye cream我冇咩心水,因為我覺得隻隻都差唔多咁,仲未有一隻用完令我有「嘩好正」嘅產品。但我㨂eye cream只㨂清爽型因為太潤嗰啲我頂唔住會出油脂粒。而家用緊呢隻Filorga係嗰時喺法國買佢盒moisturiser個藥房姐姐送左幾包比我,咁啱我之前用緊支aesop用晒所以而家拎黎用,都不錯用保濕度好夠又唔lup,同埋幾易吸收。可惜唔知幾錢同唔知香港有冇得賣。

image

到塊面保濕部份,呢支aesop嘅serum我已經唔知用到第三支定第四支!我覺得佢保濕嘅效果好夠力同持久,同埋我好中意佢隻好似草本嘅味好舒服!我介紹過比好多朋友用但有朋友就覺得佢好lup,不過我自己兩頰偏乾所以我覺得啱啱好!

image

日頭我通常搽完serum就搽moisturiser。而家用緊mary kay呢支moisturiser唔知佢地而家仲有冇出,因為呢支已經係我仲有做佢地嘅美容顧問時剩底嘅存貨,都已經係最後一支了。其實呢支野夏天用都幾好,因為佢唔係好lup保濕都okay。但冬天就嫌佢唔係好夠力了。

image

夜晚我就會skip左moisturiser,用多兩滴serum再加一滴aesop支玫瑰精油。我覺得aesop呢支玫瑰精油隻味香得黎好自然,有時如果我覺得塊面皮膚好暗同好攰時我會只用佢4-5滴搽均全面再按幾下等佢吸收,好舒服架。第二朝起身塊面皮膚即刻變返有彈性!

image

日頭一定要做防晒!就算唔出街室內燈嘅紫外光都會慢慢令你出斑!所以搽防晒係我每日必做嘅步驟。以前一直都用呢支mary kay嘅防晒,真心覺得佢好用,好水好易推又唔lup,但佢只得spf 20完全唔夠!(因為我好少會補防晒…)冇記錯佢呢支防晒好似係佢地唯一一樣野係日本造。搽面嘅防晒我比較中意用日本貨,但就因為佢spf太低所以我已經轉投資生堂懷抱。Anessa呢支我覺得質地都幾好唔lup,但始終唔夠mary kay咁好推。但我覺得都不錯用!

imageimage

至於搽咀,我一直都係用花士令。真係由細用到而家,都唔使多講,三個字「平靚正!」臨訓前厚厚咁搽一層就算冬天或者開冷氣時好乾第二朝個咀都依然咁嫩滑!

image

我最近的孖屎之列

一失蹤就失蹤左4個月。新工作叫做終於穩定左,不過最近就忙到七彩同攰到痴線。一至五日日都唔夠訓,到左weekend就喪訓補眠!其實我好想放假好想去旅行呀!對上一次已經係年頭嗰次喇!希望過左九月可以放返個長假啦!

Weekend除左喪訓休息之外,敷mask都係我其中一個休息嘅環節。呢排我比較中意有天然成份嘅護膚品,呢類產品令我塊面泛紅嘅情況會比較少。所以mask我都大部分揀天然成份。其中最常用就係Lush嘅mask。以下係一啲我用過同用緊嘅產品:

1. 朱古力新地新鮮面膜 – 佢話有深層清潔、清除黑頭粉刺、收細毛孔功效。但我覺得效果唔算好好,不過陣朱古力味真係好香,凍敷上面係好舒服加上陣香味唔好理佢有冇功效都可以令心情即時變好!

2. 藍莓新鮮面膜 – 有抗氧化同舒緩暗瘡嘅功效。抗氧化對於我呢啲中女好緊要!呢隻我覺得幾好,敷完即刻見到塊面光左同白淨左!

3. 海藻玫瑰面膜 – 有鎮靜敏感、紓緩降紅功效。我就係聽到話可以降紅所以先試佢,其實都ok嘅,不過我覺得佢潤左啲我麻麻地,同埋其實我發現佢其他mask我用完都唔會紅所以我就冇特登再買佢用。

4. 薄荷清爽面膜 – 我相信呢個係佢地既皇牌無人唔識。佢深層清潔嘅功效我覺得比朱古力好,鼻上面嘅毛孔即時乾淨左。敷嘅時候薄荷涼涼地非常舒服,敷完之後塊面乾淨左最重要係佢冇令我泛紅同完全冇乾嘅感覺!大愛❤️❤️❤️

5. 黑夜天使洗面膏 – 呢個係我嘅最愛!其實我唔係用佢黎洗面我用黎做身體磨砂。我本來係想買佢地嘅身體磨砂,但好唔中意隻味所以冇入手。跟住店員妹妹介紹我用呢隻,一試就愛上!首先佢係冇乜味,睇落一堆乾泥咁要加少少水捽到變泥漿先用到,其實有啲「呢hea」,濕左之後佢泥入面有啲木炭粒就可以用黎磨紗,但我建議真係輕輕磨就好喇因為都幾粗粒太大力真係會痛。但因為佢有牛油果油所以用完係一啲都唔乾仲要係好滋潤好滑!

imageimage

 

另外仲有一隻mask一直用緊我覺得幾好,就係台灣嘅Annie’s way果凍面膜。好多人話用完敏感但好好彩我冇事亦都冇乜泛紅,所以已經用緊第二罐喇。平時我放入雪櫃,沖涼時厚敷佢,好神奇地用完佢啲黑頭粉刺即時標晒出黎,塊面仲要真係可以即時白一度!雖則佢話佢地都係有天然成分但我其實都唔係好肯定佢有咩,同點解可以咁神奇!曾經同朋友講起佢問會唔有螢光劑架但上網查過好彩佢唔喺列上我都放心繼續用了。

image