淘寶買啲乜???

淘寶買啲乜???

新年快樂!2018年都差不多過咗兩個月喇,農歷新年都到過緊添喇,咁就首先祝大家新一年身體健康、所有事都順順利利啦!

好喇隔咗咁耐我係嚟找數!自從上年淘寶雙十一之後我話有開箱文跟住直到而家都未出,淘寶都唔知淘多咗幾多轉。所以不如趁今次一篇過講喇,但我唔講晒喇因為真係太多,我揀啲特別嘅嚟講啦。

第一樣我一定要講嘅就係呢個香薰機!好到直頭呢已經再返兜買咗第三部喇!首先佢個造型好簡單又唔太大部(我揀嗰個size係300ml),佢有個時間制可以比你揀放60/ 180/ 360分鐘,仲要有埋夜燈,咁先RMB90(雙十一價)!如果佢啲水放晒仲識自己熄機添,性價比係非常高!落單嗰時仲可以留言叫佢地換個原裝香港嘅三腳插,唔使額外加錢。佢地嘅包裝都非常好同穩陣,就算集運完再寄落嚟香港所有野都係完好!其實同款我見到淘寶有好多,我有同事買咗大size再平啲添。不過我冇仔細問有冇得換插頭包裝點呀之類,我又覺得我買開呢間無論出貨速度呀客服呀包裝呀都好一流所以我就算返兜幫人買我都係買返呢間。

IMG_9535
個香薰機有埋夜燈功能我覺得夜晚開住佢,間房都變得好似有好有格調咁!

第二樣呢我都唔知應該點叫佢,姑且就叫佢「狗便便神器」啦!因為有咗佢真係幫咗我不少!!!事原係好耐之前我喺facebook見到外國有條好似廣告片介紹呢個夾,夾住一個大口膠袋再夾喺狗狗條尾度就可以好乾淨俐落咁接晒狗狗啲便便。點知我雙十一嗰排竟然喺偉大嘅淘寶見到有呢個夾連10個膠袋嘅試用裝,只賣RMB18 (雙十一價)!!!貪得意梗係買黎試下啦,點知真係work喎!個夾入面係軟膠夾住我隻狗條尾佢完全冇反抗,應該冇唔舒服嘅感覺。膠袋嗰口夠大便便一出全部跌晒入個袋度唔會跌落地,次次用都冇失手,所以我即刻再買兩盒60個嘅膠袋備用喇!雖然用呢啲膠袋比免費嘅報紙係有啲少貴,但當你家毛孩好似我屋企嗰隻咁已經老年控制唔到大小便,又或者仲係potty training嘅階段,呢個夾真心幫到你,唔使驚屙到地下周圍都係!佢有分大中小3個size,我屋企隻係金毛所以我揀咗大,都啱fit喎,我諗除非你隻小狗係芝娃娃條尾勁幼,否則佢大中少嘅size應該都有一個fit你嘅毛孩。

IMG_9394

跟住呢個呢其實我唔係雙十一淘,不過都因為好平所以我又淘,就係我間房嘅窗簾喇!淘寶其實有好多店係可以按尺寸訂做窗簾,但我就貪快買佢現成車好嗰啲,反正我間房隻窗又唔大。佢現成都有幾個尺寸比你㨂,我揀呢個size其實比我隻窗長,不過我唔係成日開閂窗簾所以就咁摺起收埋啲腳就算。佢仲有3隻布料你揀,分別係遮光布、紗布同埋麻布。我㨂咗麻布,所以好透光,不過我中意間房光所以我係OK的。但如果要完全遮光我就建議買遮光布喇。我覺得啲料都幾好喎,pattern選擇如果可以多返啲就仲perfect!兩幅都係RMB58仲連埋啲掛勾比你,真心抵買!

IMG_9559
我覺得無論布料車工同個pattern都唔錯。頂嗰幅織布係我喺荃灣愉景新城嗰間韓仔家品店買,都係30蚊掛埋一齊我覺得都幾好睇喎!

跟住嗰啲呢我唔續樣講喇,大家就睇圖睇caption啦。

咁有啲咩係我會係淘寶無限回購呢?就係我隻狗嘅尿墊啦同埋佢訓緊嗰張帆布床(寵物用品真心不錯,只要唔係放落肚就得)。尿墊都只係RMB三十幾蚊,我試過幾隻牌子我覺得而家用緊呢隻「寵百思」最好,雖然佢唔係我喺香港寵物店買日本嗰啲咁厚但我覺得吸水力都夠。至於張床呢已經買咗第三張,之前我買床架連牛津布,每次換我都要掉個架我覺得有啲浪費。後來我搵到呢間店有得單買塊布,所以我而家只係換咗佢塊布就OK喇!

除咗呢堆之外我仲淘啲運動用品呀衫呀質地都非常好!我見其實而家好多youtuber都出淘寶開箱片,好好心機續樣介紹咁,我都成日睇下人地會喺淘寶買啲咩。如果大家都有淘寶歡迎交流有啲咩心水推介!

shopping list:(如果有漏大家可以問返我)

香薰機300ml – https://item.taobao.com/item.htm?spm=a1z09.2.0.0.61bc2e8dabGFZ3&id=537813461470&_u=i2b5bd638c2a

狗便便神器 – https://detail.tmall.com/item.htm?id=555306991643&spm=a1z09.2.0.0.61bc2e8dabGFZ3&_u=i2b5bd637b40

麻布窗簾連掛勾 – https://item.taobao.com/item.htm?spm=a1z09.2.0.0.61bc2e8dhujAEl&id=520178315781&_u=i2b5bd638a26

玻璃化妝掃箱 – https://detail.tmall.com/item.htm?id=557317185553&spm=a1z09.2.0.0.61bc2e8dhujAEl&_u=i2b5bd630066&skuId=3454506528671

木托盤 – https://item.taobao.com/item.htm?spm=a1z09.2.0.0.61bc2e8dhujAEl&id=537654240044&_u=i2b5bd631524

LED化妝鏡 – https://detail.tmall.com/item.htm?id=522957403473&spm=a1z09.2.0.0.61bc2e8dhujAEl&_u=i2b5bd63ffc5

金邊玻璃飾物盒 – https://item.taobao.com/item.htm?spm=a1z09.2.0.0.61bc2e8dhujAEl&id=547090449350&_u=i2b5bd63df1a

化妝掃清潔板 (長形)- https://detail.tmall.com/item.htm?id=552626925304&spm=a1z09.2.0.0.61bc2e8dabGFZ3&_u=i2b5bd63cca4

mintbear染暈握/鼻影掃 – https://detail.tmall.com/item.htm?id=559125603514&spm=a1z09.2.0.0.61bc2e8dhujAEl&_u=i2b5bd63691b&sku_properties=7814360:18128498

晾刷架 – https://item.taobao.com/item.htm?spm=a1z09.2.0.0.61bc2e8dabGFZ3&id=551403971350&_u=i2b5bd63d8b2

廚房磁貼架 – https://detail.tmall.com/item.htm?id=557141246995&spm=a1z09.2.0.0.61bc2e8dabGFZ3&_u=i2b5bd63249f

彎頭iPhone差電線 – https://detail.tmall.com/item.htm?id=557974996465&spm=a1z09.2.0.0.61bc2e8dabGFZ3&_u=i2b5bd630e64

狗狗牛津布連床架 – https://detail.tmall.com/item.htm?id=19249855454&spm=a1z09.2.0.0.61bc2e8dhujAEl&_u=i2b5bd633217

Advertisements

早餐食得好系列

早餐食得好系列

近呢年養成咗一個習慣就係星期六日朝早起身自己整個簡單早餐。本來嘅原意係早餐有食、食得輕營啲健康啲對修身有幫助,但整整下我啲早餐已經好似越來越大份一啲都唔輕營。其實久唔久我都有喺instagram post我自己啲早餐相,做咗個 #早餐食得好系列# 如果大家都係同路人的話歡迎分享交流下!

輕營系列

平時返工為求快捷方便5日有3或4日我都係開麥皮食,所以如果假日喺屋企都唔會揀食麥皮,真係冇其他選擇時我就唯有比多少少心思切啲生果落去一齊食囉(我平時真係熱水開好齋)。有時星期六日得閒我會打下green smoothies,其實好易打,我多數用香蕉(急凍咗)、蘋果、baby spinach,如果有其他生果就會加埋落去一齊打。材料都好隨意,冇波菜就蕃薯葉呀或者red chard呀睇下有咩菜用咩菜囉。睇youtube啲外國人可以就咁朝早飲一杯就當早餐,但我唔得呀我飲完都係會肚餓所以佢只會係我嘅早餐嘅其中一部分。再懶啲或者想食啲暖野呢,我就會整小米粥,以前出差返大陸食佢地係落糖食,我覺得幾好味,但又唔想食咁多甜野,所以我就落少少鹽再加肉鬆,都好好味架!

全部都係多士系列

多士係我最經常會食嘅weekend早餐。又快手又容易整,鹹食又得甜食又得。好心機嗰時就會整牛油果多士,用芝士搽底或者淋少少蜜糖喺面都好好食;想食鹹就煎隻太陽蛋放面,多士點蛋黃汁嚟食好好食架!懶嗰時就咁搽花生醬/ 杏仁醬/ speculoo spread/ 果醬就ok!(題外話,樽杏仁醬我係喺加拿大costco買,冇糖同話冇加任何添加劑。我都係第一次食,除咗聞落好香之外其實食落冇乜味。)

有啲豐富系列

如果好心機,我真係會諗整啲咩早餐食睇落開心啲食落又開心啲。多數我啲idea都係睇下youtube呀tasty呀instagram呀睇返嚟,當然呢都係啲易整嘅野啦我都唔想太麻煩。我發現原來台式蛋餅其實好鬼易整,只要煎好塊好似薄撐咁嘅餅皮,再煎隻蛋喺上面咁就完成!中間如果想多啲花款就可以夾啲饀再卷埋佢,我上次試過夾芝士同三文魚係超級好食!

Hea食系列

有時真係唔係咁好心機整早餐又想食多啲其實都只係就咁炒個蛋煎條腸食下。現成野多數都快捷方便!

好啦我都想我啲相影得再靚啲咁睇落我好似好勁咁,除咗諗食咩早餐之外我會開始諗埋影相構圖點影得靚啲另大家都覺得我入得廚房出睇廳堂先XDDDDDDDD

2016年我最大嘅成就!!!

2016年剩返一日,呢一年其實做好多野都係失敗。失敗野就唔多講喇哈哈,但有一件事竟然喺唔經唔覺之下成功了!就係我成功減左15lbs!!! 你冇睇錯!!!係15lbs!!! 可能你會覺得15lbs都唔係好多啫,係呀的確唔係好多我自己都唔覺得我有瘦左咁多,但我由最高峰140lbs再多啲到而家125lbs,呢15lbs真係好critical. 同埋 125lbs係我好多年都冇見過嘅數字,所以當我見到呢個數嗰一刻我簡直係唔相信我自己對眼!😭😭😭

其實我以前係非常介意比人知我有幾重,我直情係連自己都唔想知自己有幾重所以好少磅重,只知道自己大約係130-135lbs咁上下好多年。直到年頭我有一日上磅磅下,先知原來我已經肥到140lbs…嗰時嘅我食野好放肆,又眼闊肚窄,又懶完全冇運動 ; 食野嘅習慣係朝朝奶茶+腿蛋治或者M記做早餐,晏晝公司buffet又食沙律又熱盤仲要食埋甜品,就算唔喺公司食都係日日出街食晏。夜晚就一定係出街食飯(其實而家都係晚晚出街食)。生果同菜好少食,好彩嘅係我唔算好好零食,不過因為太中意食野所以食親飯都會駁老命咁食。

前言講得太長添,其實我呢篇blog唔係要講減肥嘅方法,而係想講我而家嘅生活習慣嘅改變,呢15lbs只係我嘅改變嘅indicator. 我而家嘅習慣冇話啱定唔啱,只係我終於搵到一種方式我舒服又令我過得健康啲仲可以有效咁減到磅。所以講出黎都係純粹分享下唧。

喺我大半年前我離開左我對上嗰份工,跟住放左大約個幾月嘅長假,有時間終於可以諗諗點樣改變下食野同生活習慣。首先我諗到嘅係我要食少啲街外野,自己煮飯。由於我其實都係好懶,要我餐餐開火或者餐餐諗今餐煮乜我諗我會好快放棄,所以我喺youtube睇左好多meal prep嘅片,學人地點樣meal prep. 以前我會覺得日日食一樣嘅野好悶啫,但而家睇多左學多左唔同嘅食譜,一星期可能有兩三樣唔同嘅野,加上係自己煮,都唔會嫌棄嘅。反正我都只係午餐係咁啫,晚餐我都出街食嘅所以真係冇所謂。就算我返翻工,我都係prep meal午餐帶飯。我通常都係星期六或日煮晒五餐,兩/三餐放冰格急凍住,帶飯前一晚拎定出黎放雪櫃解凍。

我煮都係啲簡單野,多數都係雞胸雞翼豬扒三文魚蝦仁呀咁,有時唔想食飯就煮意粉或者炒烏冬。不過個飯盒一定有一半係菜,炒又得就咁淥又得,不過去到而家我多數都係淥,因為快嘛,淥完加幾粒鹽同黑椒或者味椒鹽就食得。不過唔係隻隻菜都可以急凍再解凍黎食,因為有啲解凍之後會出好多水跟住啲菜會好soaky好難食,我試過咁多隻菜so far最穩陣都係西蘭花同椰菜。中式菜好似菜心嗰啲就試都唔使試因為實黃好難食。

img_2850
如果有打green smoothie嗰日早餐飲埋,weekend朝早時間多啲食得好啲心情都好啲。

除左自己煮自己帶飯,早餐我而家多數都係食麥皮或者cereal。啱啱開始嗰時我早餐日日係麥皮+一隻香蕉,但原來香蕉好鬼寒涼我唔知道,我自己又係寒底所以食左大概一個月身體唔受得我就唔敢再日日食。所以真係要睇個人體質唔係人人啱嘅習慣你一定都啱。星期六日早餐就係麥包多士,有時加半個牛油果,有時就咁搽我最愛嘅speculoos butter+花生醬。想食鹹嗰時就煎隻蛋放上多士度食。

其實我而家除左每餐份量食少左,其他時間都係密密食(我啲同事話成日見我都喺度食野😂),不過我就食聰明左,會自己帶啲snack返工食。我好中意食香口野所以最常食係granola bars, 試過好多隻我最中意係食Nxture Vxlley嘅Honey & Oats.

img_1877
試過好多隻都係Nxture Vxlley最好食,左下759買呢個牌子甜到阿媽都唔認得我覺得好伏。隔離呢隻澳洲野muesli bar我覺得都係麻麻地因為佢唔脆口。

通常做做下野10點幾11點左右就會肚餓就隊一條(一包兩條我食一條),或者有時我朝早會烚一舊日本蕃薯仔或者一隻蛋拎返工。要治口痕嘅時候就食nuts(杏仁居多)或者藍苺呀提子呀咁,總之多數都係食啲冇乜加工過嘅野就冇死。但我又未至於完全唔食其他零食嘅,M記呀薯片呀朱古力呀一個月食一次半次唔死得嘅,又無謂要抑壓到自己咩都唔食咁唔開心咁辛苦啦。

食野大致上講得七七八八,跟住就係最重要嘅野就係做運動!!!呢個係我今年最值得比自己掌聲嘅事情,以前嘅我都有做過下運動,但永遠都唔可以堅持,可能三個月我就會停左唔做。但今年突然開竅,覺得其實我唔應該追求變成瘦到條籐咁,應該要練有肌肉先啱我。所我開始睇youtube學一啲練肌肉嘅workout,做下plank squat crunches等等呢啲屋企都好容易做到嘅動作。之前我都有去跑步,但跑步真係唔係我中意嘅運動,所以夏天後來轉左游水(其實唔係好識游㗎咋都係慢慢跟朋友學返)。而家我嘅習慣係每日朝早做4分鐘運動,plank squat crunches push up各一分鐘,夜晚得閒無聊又再做下(但都唔係日日係咁)或者訓覺前拉下筋。星期六日就做半個鐘tabata,youtube有好多tabata嘅tutorial自己中意做咩動作做幾耐悉隨尊便,總之自己覺得舒服就可以又唔使做到半死咁。其實講完我真係唔算做好多運動,不過可以堅持到日日做,就算只做plank一分鐘,唔覺唔覺半年腰間啲肥肉就會減左好多!呢個真係堅!因為我真係咁樣call機肉同肚腩都冇左好多,條腰減左兩吋!!!

大致上係咁上下喇仲有啲其他鎖碎嘅小習慣有機會先再講。另外我都有食幫助做運動時增加消脂效果嘅supplement不過真係做運動時先食佢(日日4分鐘嗰啲我冇食),呢個對我都幾有效果但前提都係要做運動!!!講左咁耐大家可能會話「車得個講字冇圖冇真相!」所以我都掙扎左好耐唔怕醜地放我半年前後嘅對比照大家睇下⋯⋯

collage_may-dec-2016左邊係5月頭嗰時影,右邊係呢個星期影嘅,前後相隔8個月。嗰時手臂仲好好肉地,而家手臂雖然唔可以叫瘦,但睇落都已經冇咁肥又冇咁脹喇 😭😭😭

好喇我要再講一次磅數都真係只係我改變嘅indicator,真係唔係要鼓吹追求輕磅。我其實都唔係成日磅住都係記得先會磅下,反而我會keep住幫自己身體影相,好似好自戀咁但咁先會見到自己身體嘅改變,見到自己無啦啦開始隱隱有啲腹肌其實仲大鼓舞 😂

即係呢我呢個細個已經係肥妹仔懶左十幾廿年變成肥婆嘅人變成而家呢個樣我相信真係冇野係冇可能,所以大家共勉之!!!💪🏻💪🏻💪🏻 我會keep住練肌肉!!!

最後祝大家新年快樂同進步!!!

喺香港終於遇上喺巴黎錯過左嘅莫奈

兩年前第一次去巴黎就想去橘園美術館(Musée de l’Orangerie)睇莫奈嘅名作睡蓮。其實對美術名畫一啲都唔認識,但唔知點解就係只想去睇莫奈。可惜係,兩次,始終都係錯過左冇去到。

以為應該冇乜機會再去到巴黎睇,點知今年佢就黎左香港。於是決定唔可以再錯過佢。

雖然唔係橘園美術館嗰幾幅巨大嘅作品,但睇到呢幾幅細細地嘅睡蓮系列嘅畫作唔知點解我個腦就放空左。一直我就係好期待呢種可以望到入神,可以放空嘅感覺,估唔到喺香港都可以見到佢嘅真跡、代入到佢嘅花園裡面。

其實呢個幾月我突然強烈地感覺世事好奇妙,當你好想得到或者係做到嗰件事,出盡十二分力去馬嘅時候,唔知點解會天意弄人地得唔到做唔到。反而不經意唔好咁上心,什至乎忘記佢嘅時候,就會得到、做到、或者係返黎你度。包括事同人都係咁。

扯得太遠。其實我想講嘅係,估唔到當時諗住喺法國睇嘅畫作,寫晒簿仔mark晒地址時間,但最後係喺香港睇。當然呢度嘅氛圍同巴黎嘅一定唔同,但我依然enjoy一個人行博物館睇展覽,望住展品代入放空呢個感覺。感覺就好似離開左現實生活去左一趟旅行咁,好自在。

IMG_7678IMG_7679IMG_7681IMG_7683 我中意睇莫奈畫嘅水同光,第一幅泰晤士河上面嘅光睇到我入左神好耐

 

同場加映:

  1. 有時間去埋樓上李小龍展,你會發現原來李小龍都幾屈機,細個就已經係靚仔,大個又識打功夫又識跳chacha又識寫詩又文又武咁,唔怪得咁多人中意佢
  2. 再有時間,睇埋其他中國文物展,你會發現,其實我應該出生喺唐朝,咁我就可以名正言順咁做一個珠圓肉潤嘅大美女 😂

IMG_7703

Big or Aidan?

我係睇sex and the city大嘅。

對於Carrie兜兜轉轉最後都係揀Mr. Big,我覺得係正常不過。係囉,Aidan係好,但佢未至於會令Carrie有夭心夭肺嘅感覺嘛。去到season 6,終於Carrie係最失落嘅時候喺巴黎遇返Mr. Big,嘩成件事點解可以浪漫得咁完美。

於是乎,Mr. Big先係Mr. Right呢個概念就入左我個腦好耐。

到左而家,去過巴黎,遇過一個人好夭心夭肺,學識放手後,又遇到一個人類嘅渣滓少少咁夭心夭肺。我諗我明點解Carrie會咁眷戀Mr. Big,可惜嘅係我遇到嘅全部都唔係Mr. Big。但原來夭心夭肺呢個感覺係可以玩死人。

終於明白原來Mr. Big同Carrie嘅結局只會喺電視電影出現,現實只會得當初Mr. Big冇諗過Carrie然後話要去巴黎一段時間就byebye。

可以比我幫Carrie揀,我會再㨂過Aidan。而家嘅我自己都會㨂Aidan。

e85aee2416e855ae952c2e2a6858f101

pic source: online

嘩老喇!我原來都見證住RW由曳仔變成真男人!

今次唔講旅行美容,我想講下長大成人呢回事。

我讀中學開始我就已經聽Robbie Williams。由當年好似進擊的巨人咁嘅Rock DJ、朝朝起身用Supreme做鬧鐘鈴聲、係人都唱嘅Better man、我最愛嘅The Road to Mandalay,到近年唱比個囡聽嘅Go Gentle。有邊個會諗到以前嘅佢係壞孩子一名,醉酒鬧事打人台上食煙咩曳事都做盡,但而家竟然係個愛妻女顧家男人?呢堆歌一直都係我個playlist入面,老實說一路聽住,心裡面一路覺得,「嘩老喇!我原來都見證住RW由曳仔變成真男人!」。

最近喺facebook睇到一篇漫畫,講30前後嘅不同。其中一幅係講話細個時覺得30好老唔想到呢嗰年齡,但到30時就覺得呢個年齡先係一個開始。我好有同感啊!其實呢幾年自己生命中發生好多事,開心唔開心都有,黎到今年,突然間發現原來自己都不經不覺變成左咁樣樣嘅一個人,唔係完美唔係最好,有少少經歷,有少少遺憾,但又有少少得著,有少少心得。心境唔同左唔係細個時咁硬頸(雖然都係硬硬地)唔聽人講野,原來咁濟遇又會有少少唔同機會又多左少少。原來黎到呢個年紀先叫做開始明白咩係生活(life & living),原來黎到呢個年紀先可以話自己終於大個識諗喇!當然,而家先至係開始,仲有好多野有排學,但望返轉頭,我諗當年影張相都黑口黑面,樣樣都唔想試嘅四眼肥妹都冇諗過自己會變成咁哈哈!

好啦明明只係playlist loop到RW首Go Gentle竟然變成感性廢up。此歌獻比同樣好似我咁有感自己終於長大成人嘅各位,仲有都中意聽Robbie Williams嘅各位!