極幸運!遠征立山黑部!

極幸運!遠征立山黑部!

今次我地上到立山黑部其實真係非常好彩!

首先由plan行程嗰時開始,當知道排好上山嘅日子係日本公眾假期嘅第一日時,我已經好擔心會人山人海等車都等到花兒也謝了,仲諗緊要唔要掉過晒啲次序嚟避開呢日上山。但諗嚟諗去都覺得嗰日上山個行程係最順唔使行太多冤枉路,所以都照定計劃5月3日上立山。之前睇其他人遊記話排隊等cable car係最耐仲話要等成個鐘云云,心諗算啦不如唔好用pass就豪啲額外比錢上網另外訂定cable car嘅票咁就唔使排隊。點知官網表示紅日嗰三日唔可以上網訂票一定要即日買,但就另有告示話嗰日會有安排巴士直接由立山上室堂。咁我都諗既然有巴士,如果等唔到cable car最多咪坐巴士囉耐啲啫。所以我都冇再諗特別路線行程都係到時先算啦咁。

bus
我就係喺官網睇到呢個告示,Google translate話有直行巴士由立山直上室堂但唔停美女平天狗平等等,但就搭70分鐘。本來諗如果冇得book cable car又真係好似人地咁講話要等成個鐘咁,我直接搭呢架巴士其實時間上都唔會差好多。好彩最後唔多人唔使搭呢架巴士!

到嗰日上山,我地都諗住早啲去睇下咩環境同睇下換唔換到cable car嘅票先,所以八點我地就落到去富山電鐵站(我特登㨂前一晚嘅酒店住富山電鐵,就喺富山電鐵站隔離,極方便!)。去到富山電鐵站其實唔係好多人咋喎,有人龍排緊隊但只係1X個咁上下,換票counter更加係冇人排隊添!嗰度其實有好多工作人員幫遊客解答問題同安排換票,我地一去到就有個日本叔叔二話不說幫我地換咗緊接最快出發嗰程去立山嘅電車嘅cable car(立山電車十分鐘後出發),但我地未食早餐見又唔係預期中咁多人,就決定換再遲啲嘅cable car票,食埋早餐先搭下一班由富山出發去立山嘅電車嘞。本來都諗住搭嘅嗰架直行巴士,我問過工作人員話原來我地張pass搭唔到,不過我覺得其實嗰朝都唔係咁多人所以應該都冇嗰架巴士添。

好嘞以下呢幅喺官網嘅圖就可以好清楚知道上立山沿路要搭嘅交通工具。我上篇提及嘅嗰張JR pass係包晒圖中所有嘅交通公具,唔使下下買飛亦都慳返唔少錢同時間,所以我強烈建議大家買呢張pass!我地沿路一直都係順暢,人都唔算好多,啲人講最難等嘅cable car係多人但去到都唔係話多人到上唔到車,接駁巴士嗰啲要排隊但都係只需一陣就上到車,所以都唔覺得好辛苦。

Screen Shot 2018-05-22 at 9.28.04 PM

不過一路上山天氣就真係麻麻,好大霧,能見度好低,坐巴士嗰時都替司機擔心睇唔睇到路。上到立山雪之大谷大概係11點幾12點左右,我諗大家都係呢個時候到達所以明顯地多好多人,但未至於係水泄不通嘅。由於天氣真係唔太好,好大風大霧,所以喺雪牆影相都唔係好靚。啲風每次一吹連埋啲沙呀冰呀咁打埋塊面真係超痛又好凍!我地行咗大約一個鐘到就返去立山酒店嗰度食飯喇。

因為立山上面只有呢個地方有餐廳食飯,咁啱又係午飯時間,條人龍都好長下,不過因為餐廳都好大下,排咗大半個鐘到就有位喇。(其實樓下都有間立食蕎麥麵店,但都係好多人下)

IMG_1624
話富山縣出名白蝦,咁就叫個白蝦天婦羅飯嚟試下,不過我覺得普通而已。

食完飯就繼續向前行喇搭電巴士穿越立山去黑部嗰邊。穿越咗立山去到大觀峰嗰邊已經變成好天冇晒霧喇,加上一望無際嘅雪山山脈真係好靚!跟住又係一輪嘅交通工具咁去埋黑部水壩就去到我地立山黑部嘅尾聲嘞!

跟住去到扇沢我地就再搭巴士去大町溫泉鄉住一晚溫泉旅館喇。點知第二朝喺旅館checkout見到佢貼咗張告示出嚟話立山黑部寄行李服務暫停先知原來第二日山上面天氣太差全日都唔開!!!所以我地前一日上得到真係好好彩呀!!!

IMG_2310

Advertisements

其實我都係適合hea遊之 – 日本東海北陸立山黑部chur爆遊

其實我都係適合hea遊之 – 日本東海北陸立山黑部chur爆遊

成年冇去過日本真係好掛住日本呀!所以呢2018年嘅第一個旅行就決定要去一去日本喇!

難得搵到腳去旅行我就決定去啲未去過嘅地方,所以二話不說就book咗去名古屋嘅機票喇。Plan行程嗰時咁啱知道立山黑部開山喎,咁所以都冇多想就決定玩上昇龍道再上埋立山黑部嘞!

其實呢我已經好耐冇試過認真地plan行程路線,但冇辦法啊上立山黑部路途遙遠所以都真係plan下點行好啲。出發前大約個幾月我都問定去過嘅同事拎定啲itinerary參考下,跟住研究完一輪酒店呀搭咩車呀買咩pass呀咁我終於定咗一個好進取嘅itinerary!!! 呢個itinerary fully pack到我後來係有啲後悔嘅因為完全同我hea遊嘅style完全相違背……將8日嘅行程pack做6日咁行囉我都諗點解要咁做…..就比大家睇下我有幾痴線啦:

Day 1 香港 → 名古屋 (3pm到名古屋)

Day 2 名古屋 → 飛驒高山 (朝早名古屋出發。2.5個鐘JR去到高山,夜晚住溫泉酒店)

Day 3 高山 → 白川鄉 → 金澤 →富山 (呢日最甘!一早高山坐一個鐘巴士去白川鄉,行3個鐘後又坐一個鐘巴士去金澤。夜晚金澤坐一個鐘電車去富山)

Day 4 富山 → 立山黑部 → 大町溫泉鄉 (日本紅日第一日,一早搭兩個鐘車上立山。夜晚又住溫泉酒店)

Day 5 大町溫泉鄉 → 名古屋 (信濃大町經松本再轉JR返名古屋3.5個鐘)

Day 6 名古屋 → 香港 (7:50pm機返到香港11pm)

Screen Shot 2018-05-11 at 9_Fotor

其實以上嘅行走路線係順路嘅,但係完全冇多餘時間可以hea!即係咁,我以往嘅習慣係一日最多只喺同一地區去兩個地方(仲要相隔唔遠),但今次竟然一日要走三個地區,仲要每個地方相隔車程都要成個鐘!只可以講我太貪心喇今次……搞到每個地方都好似只係到一到咁,尤其是金澤!只係一個下晝加傍晚我覺得好唔夠呀因為金澤我好喜歡好多小店好好hea!其實每一朝早早起身都唔係辛苦,但要睇時間趕車呢樣野先令我覺得好有壓力……

所以如果比我再plan,我諗呢個路線行程我會去8日,金澤玩一日住一晚,名古屋都可以住多一晚(行街加食野)。咁我就唔使因為趕第二日上立山而喺金澤都要趕死去富山訓一晚,然後喺名古屋又可以有多啲時間行街食好西(金澤食唔到魚生飯同名古屋食唔到手羽先我表示好遺憾😭)。

仲有今次我去日本呢個星期咁啱係佢地嘅黃金週(4月30—5月5),我以為一定周圍都好多人啦由其上立山黑部嗰日會人山人海,但結果立山黑部比想象中少人好多,其他地方好似高山、白川鄉咁都唔算太多人,不過有啲舖就冇開囉(或者係佢地係早收)。

雖則呢個行程(東海+北陸+立山黑部)要搭好多程車,但其實我覺得唔算好難,因為日本交通真係好完善,亦都好易明,只要做少少功課,再有埋個「乘換案內」App咁就萬無一失。然後呢再有埋呢個「立山黑部、高山、松本地區周遊卷」呢個JR Pass,17500yen包晒JR同上立山黑部所有交通嘅費用,浄係名古屋去高山、同信濃大町返名古屋呢兩程指定席JR都己經過12000yen,所以計埋上立山黑部嘅交通(正價大約都成10000yen),呢張JR pass真係慳咗唔少錢!但記得呢張pass只係海外有得賣,所以出發前一定要喺香港買咗先!

IMG_2205
喺香港拎嗰張只係兌換劵,要喺日本換成呢張pass先可以用。

好喇都係好似以往咁啦詳細遊記同教學就唔講喇,要知多啲都可以問我我再答。下篇繼續講立山黑部同高山!比住少少相大家preview下先啦!

IMG_0719
名古屋確實係比東京大阪少好多人。其實行得都幾舒服,不過呢唔知係因為黃金週定平時都係咁啲舖頭好早收😭

↑ 飛驒高山食好西浸溫泉真係好正!

IMG_1269
白川鄉真係要咁樣喺山上面睇先覺得佢係咁特別!有雪應該靚好多添!

↑ 5月仲睇到咁多雪真係好似發夢咁,仲舖住半溶雪嘅山脈真係靚到嘩嘩聲!

Hea爆清邁 – 5個胡亂嘅小記

1. Uber平過tuk tuk!!!

雖然坐篤篤同雙條車係好有特色,但其實好鬼貴囉!短短大約係15/ 20分鐘嘅車程,篤篤收費係泰銖120(仲要係講完價先收120)。但Uber只係大約泰銖50幾蚊,仲要係坐有冷氣嘅私家車!自從試過暴雨行雷坐篤篤之後,Uber即刻變成我地代步首選!

2. 荔枝好睇唔好食!

每次行市集都見到啲荔枝又圓又大粒,我地心諗一定好正啦!終於有晚我地買左返酒店食,結果原來佢地係裝假狗!啲核都超大粒,但肉就好簿,仲唔係好甜添!所以大家都可以留返個肚食其他野喇!

img_5021
紅卜卜又大粒咁睇落真係好靚好吸引。點知原來都係得個樣架咋!

3. 亲!來感受一下文青小清新氣質!

我實在大鄉里,我真係從來冇諗過泰國而家可以同文青小清新扯上關係。直到我地去清邁之前我先有留意原來清邁大學附近呢個尼曼海明區原來有好多好靚嘅cafe。我覺得有啲似台北嘅赤峰街或者首爾嘅新沙洞咁囉。咁呢我想講,我地強大嘅祖國同胞同淘寶網實在有夠勁!尼曼海明區係我地遇到最多同胞嘅區域,然後喺cafe入面左右枱都係影疑似淘寶網拍相嘅少女!(其中最勁嘅係一位比港女更港女嘅同胞少女比男友埋怨佢食唔晒啲野做乜要叫咁多野食而佢個原因係”我要拍照嘛”然後揸住支軟雪糕擺pose屎影相影左差不多成10分鐘就快雪糕都溶晒)

4. 泰國比香港更嗜甜!?

其實可能唔係嘅,只係我自己唔係太食得甜啫。喺清邁,日日都好熱,行幾步就好想飲野,仲要一定係凍!除左路邊飲椰青之外,基本上大部份飲品都同飲糖水冇分別。就連泰式咖啡都甜到一個極點!係咪泰國人真係好食中意甜野架呢?

5. 泰國街頭謎樣小食

我地上篇講做spa嗰度附近好似係有兩間學校,所以街頭巷尾都會見到啲車仔小食擺賣。由於售賣對象都唔係遊客所以都唔會有任何泰文以外嘅招牌啦,咁我地就純粹係靠估黎試喇。我地見到嘅第一檔呢咁啱就有個做喺度做義工外藉少女幫緊伯伯手,所以就順便充當翻譯喇。

img_5343

不過我都其實都唔係好知係乜東東,只記得話中間白色嗰pat係coconut囉。上面啲蛋絲點解唔同色係咪有分別我都唔係好食得出。至於食完有乜感覺其實冇乜呀感覺就好似一陣風咁囉。

再行遠啲啲我地就遇到另一檔車仔。見佢一條條一粒粒咁我地以為係泰國魚旦,點知原來係燒糯米丸。上面仲搽咗少少醬油咁覺好似日本啲燒年糕咁不過佢就咬到一粒粒嘅糯米唔係煙un口感,最盞鬼嘅係佢連埋啲生椰菜比你一齊食。我兩個朋友就覺得麻麻好食因為都幾滯,但我又覺得幾好食喎不過呢真係食唔到多囉。

呢個係另一檔街頭小吃,迷你砵仔椰汁糕。呢個我覺得好好食呀佢唔甜得嚟帶有少少鹹鹹地又好香椰汁味!一盒10粒都係20bhat好鬼抵!

Hea爆清邁 – CP值極高嘅spa!

啱啱短短地去左個4日4夜嘅清邁hea到核爆之旅。老實說我對清邁係冇概念,就算去完返黎都唔知做過啲咩咁。不過就係因為真係冇咩做咩都唔使諗所以先可以好好relax下,幾日旅程周圍行下又食下又坐下飲下野做spa做yoga同去下cooking class咁,心情輕鬆愉快!成個trip我地做左兩次spa,今次就想講講呢兩個spa嘅比較。

第一間我地去左古城區間Fah Lanna Spa。我地係屎忽撞棍,其實都係嗰朝訓醒決定去做spa,又聽朋友介紹呢間正,即刻上網睇下又見好評,冇booking就出發前打電話過去問下有冇位。點知又好好彩地話一個鐘後有位咁就去成左喇!(後來我上網睇話原來呢度成日都爆,可能我地朝早加上係平日去卦所以都算好彩!)其實佢地係有車接送,但我地仲有啲時間就自己周圍行下再自己去喇。

img_5730
Easy to find. Hard to forget. 又真係正到幾難忘嘅。

呢到裝潢好鬼exotic,好多草木圍住一座座小石屋。後來上網睇返原來佢地係走蘭納風格 (Lanna),呢種泰北風情我好喜歡!入到去店入面直情好似去左渡假村咁好開心!

入到去店員就招呼我地坐低飲杯茶揀做咩按摩。價錢都好相宜大約都係600-1300泰銖(唔計package)半小時至一小時不等。我同兩個朋友分別揀左兩樣野做,因為我地都揀左唔同嘅按摩所以大家就分別入房,兩個鐘頭後再會!

按摩嗰啲房大部份都係一間間獨立石屋仔,因為我揀做嘅按摩同我兩個朋友唔一樣所以我自己就可以獨佔一間房(好正啊😍)!房都係貫徹蘭納風格,有shower有個大浴池,非常亁淨企理。(我唔記得影相呀因為真係太心急想開始XDD)

img_5325我嗰日揀左做全身磨紗+香薰油按摩。正式開始前姨姨幫我洗洗腳跟住比我換衫就開始嘞。做香薰油按摩嗰時姨姨仲幫我做少少嘅泰式按摩,一路比佢按再一路聽住嗰度啲大自然風音樂我真係舒服到有某幾刻訓著左!

img_5326 做完晒按摩之後仲有熱薑茶同米通比你享用(據講如果係做三個鐘或以上嘅按摩係送芒果糯米飯!)。嗜薑嘅我覺得佢呢杯薑茶又係好好飲再買埋佢啲薑茶粉!一路飲緊茶嘅時候店員同樣地都問我地使唔使安排車送我地走,但因為我地諗住周圍行搵訂食飯所以就冇坐到佢地車。但我聽到人地話去機場佢地都送!雖然呢個價錢係呢度應該算係中上消費,但呢個環境加上呢個服務我覺得絕對係物超所值!

 

跟住第二日我地book左我地住嘅酒店RarinJinda Wellness Spa Resort嘅Spa。因為我地都比較遲先book所以只係夜晚時間有位(佢開到夜晚12點),咁我地就book左夜晚10點等我地可以玩完返黎做埋spa先休息喇。其實據講呢間酒店係出名做spa尤其係水療,不過都因為夜喇就唔水療搞咁耐啦。

img_5799
呢間酒店其實幾正!位置好好就喺Riverside,一行出酒店就喺酒吧餐廳都幾旺人氣。

 

今次我就心思思想試下佢地啲package,佢地有一個入場package唔使做好耐都係個半鐘,加上佢呢個package有一個襌音放鬆治療我好有興趣所以就揀左黎試喇。

入去之前又係洗洗腳做下腳嘅磨紗先,跟住又各自入房喇。我覺得呢度環境都靚嘅,不過就似人地啲lounge咁囉冇乜特別,唔知係咪因為真係太夜嘅關係定係佢本身特登調到低光我覺得有啲昏暗咁囉。

我個package係訓係個熱砂床上面按摩,呢個熱砂床係全個package最正嘅項目因為暖笠笠尤其暖住個尾龍骨位真係好放鬆!至於我之前講我好有興趣嘅襌音放鬆,按摩姨姨就係用4個唔同大小嘅銅砵分別喺你四肢同頭頂拷啲音同震盪出黎。的確當佢喺我頭頂拷個銅砵時我feel到個音好似環迴立體聲咁喺我兩邊耳走,而我個心真係會跟住佢每拷一次嘅音向下沉。不過其實個歷時好短,可能因為佢間房嘅隔音唔係幾好會聽到出面馬路啲車聲同對面酒吧嘅音樂聲唔夠靜所以維持唔到卦。

img_5794-1
又係我一人獨佔一房!毛巾下面就係啲熱砂黎嘞。

img_5796

 

按摩完之後都有芒果糯米飯比你享用。總括而言呢我覺得呢度按摩其實都OK舒服嘅,但服務黎講我就覺得唔太㦘勤囉以呢個價錢計(唔知係咪因為我地最後一批客佢地趕收工)。環境都麻麻唔夠靜因為隔唔到街外啲嘈音,可能日頭黎啲酒吧未開會好啲卦。

 

 

所以總結!就呢個兩間中上消費嘅spa黎比較,我會大大力推薦Fah Lanna Spa!!! 大家如果去清邁都不防試試!

題外話,喺清邁周圍都幾多寫住係女子懲教所按摩訓練中心嘅按摩店,我唔知係堅定係gimmick黎呢?不過做個腳底按摩收費都好平同好多人幫趁。有一個下晝行行下落大雨,我地諗住入去按下腳順便避下雨,點知登記嗰兩個著住疑似懲教人員制服嘅姐姐話今日full晒明天請早!

img_5733
入面嗰兩個人真係著晒制服㗎冇呃你!

 

京都大阪行 – Vlogging!

寫blog我唔太中意寫流水帳,不過其實我都好想記低成個旅程去過嘅地方做過嘅事。咁啱臨去京都前喺YouTube睇咗條人地剪得好好嘅旅行vlog,咁我咪又心思思學下人地剪條片囉。一條片睇晒我成個trip好過我打咁多篇blog齋睇文字咁悶😂😂😂 第一次拍片剪片唔算太好,希望大家多多指教🙇🏻‍♀️

京都大阪行 – 輕鬆自拍小心得

有朋友問我究竟自己去旅行啲相係點影,其實而家有好多人都有寫關於獨遊影相技巧嘅blog,仲要好鬼勁啲相影得好鬼靚添!我獨遊自拍其實用嘅方法都大同小異,分別都係要有腳架、相機/ 手機、同埋後期執相,但當然我就冇咁pro啦。呢篇就講下我自己獨遊自拍嘅小小心得先。

首先因為我非常懶嘅關係,好怕出去玩時要拎好多野同重野,所以我自從轉用iPhone之後直頭連相機都唔再拎了。你地見到嘅所有相都係用iPhone影,quality當然唔可以同單反或者半單反比啦,但放上Facebook或者Instagram呃like及自己手機電腦睇我覺得已經非常足夠。至於腳架,我以前直頭連腳架都冇用,只係一個夾夾住個電話等佢可以企喺度,再喺現場搵啲野墊高或者就咁放地下就算。不過呢個辦法可以自拍嘅地方同角度都好有限,所以我今次就買咗個高身啲嘅八爪魚腳架,貪佢夠輕身又唔太佔位,唔用時放喺背囊等我唔使長時間拎住佢,喺有柱嘅地方佢隻腳又可以繞住又增加可以自拍嘅地方同角度,非常方便。我喺觀塘廣場買平平地都係幾十蚊,如果你有時間可以等得切上淘寶買可能都係十幾廿蚊港紙咁上下,所以八爪魚腳架我覺得好值得買!

影嘅時候搵個靚位set好腳架之後,我都會喺個畫面睇我應該企咩位記低個位置,再set十秒timer影。因為得十秒所以要快位置都唔好太遠,位企唔準或者唔啱心水最多影多幾次。通常我都會來回十幾次先影到啱心水,但後期影慣咗其實都大約五次已經收貨!所以大家多多練習就OK 😂😂😂

腳架+現場環境(石駁/ 欄杆/ 柱/ 樹 / 櫈)做set鏡頭示範:

IMG_2726
咁啱呢幅繪馬就喺個亭嘅旁邊,於是就用八爪魚腳架繞住突出嚟嘅圍欄set鏡頭喇。
IMG_3093
八爪魚腳架繞喺竹樹杆,再認住要企嘅位置(咁啱有個水印位好易認)十秒內衝過去再盡情chok post!😂
IMG_2928
八爪魚腳架就咁放喺石駁再校一校個電話嘅角度,移動幾次單車個位置先影到呢張構圖比例perfect!
IMG_3099
個八爪魚就係咁繞㗎喇,嗱繞還繞大家要小心啲呀記住唔好破壞到人地啲野,做個合格旅人!

腳架就咁放地下set鏡頭示範:

IMG_3363
呢幅係我得意之作!個八爪魚就咁放喺落河嘅石級然後十秒行落去石澗度。其實iPhone嘅連環拍影動作真係好好!
IMG_2584
八爪魚都係放地下,呢張我企得比較遠因為想影多啲條長廊。又係set鏡頭時順便喺畫面認住企喺第幾條柱囉。
IMG_2264
有時範圍比較窄個八爪魚放地下唔夠高,唯有就係屈一屈後面隻腳等個電話可以斜斜地由下而上攞多啲角度啦。

不過總會有放唔到腳架嘅時候,例如人太多。不過個腳架一樣都有用喎,當佢係自拍神棍做成手臂嘅延申,角度同影嘅範圍都可以多啲啲。

IMG_2487
好似喺伏見稻荷大社人好鬼多,鳥居啲柱又太粗繞唔到腳架,就唯有就咁揸住個八爪魚影囉,唔用八爪魚應該影唔到晒兩邊鳥居嘅柱個頭又會超大。

跟住比大家睇下啲失敗嘅例子,其實真係要不斷咁試位呀試鏡頭先影到啲滿意嘅相㗎。

IMG_3041
八爪魚放地下但冇屈後腳,企又企得太後所以前面地面影得太多。其實呢張又未失敗得晒嘅cut左下面地下都用得嘅。不過啱啱睇返電話,原來呢張已經係edit過,原照其實係斜㗎張相。
IMG_3393
本來係影張逆光相,但首先個鏡頭set得唔夠斜上,跟住係十秒內有人亂入。
IMG_2522
有時候要用到前置鏡頭就位,但失敗就在於你好近喺個前置鏡頭前面按快門,跟手行去遠啲位置,係一定會out focus!!!我都諗緊有冇辦法可以解決呢個問題!

最後就係講後期執相喇!其實我覺得iPhone個photo editor已經好足夠,最主要要執都係扭返正張相啦(因為有時set個腳架好多時都唔係完全直嘛)、唔夠光就校返光啲、校返sharp啲顏色咁囉。如果我張相有放上Instagram就會加少少佢啲effect囉,咁大家想再玩多啲effect嘅vsco呀April呀都好好用㗎。

好啦以上就係我小小自拍心得,唔係啲咩專業技巧但勝在夠輕鬆方便。如果大家都有啲咩心得不防開心share下?

京都大阪行 – 來個細細嘅拉麵品評

曾經有個舊同事同我講過佢好想寫一本日本拉麵天書,食均晒日本所有嘅拉麵店。其實我覺得佢呢個idea非常好,希望佢可以做得到啦😂 自問我就冇能力食得晒所有拉麵店,不過今次去京都大阪我都食咗4間拉麵⋯⋯無他,因為真係有好多拉麵嘅選擇而我又真係間間都想試下喎,但當然真係食唔落咁多啦哈哈!好就等我品評一下我試過呢幾間拉麵店比大家參考下(嗱口味嘅野好個人,我覺得好食你地未必覺得係,所以戴定頭盔先哈哈)

京都車站拉麵小路 – ますたに (好味指數: 3.5/5)

喺京都車站伊勢丹10樓連住嘅拉麵小路,有齊8間日本唔同地區嘅拉麵店,有東京、札幌、富山、大阪、京都、博多等等等(其他唔記得咗自己上網google下啦)我記得東京嗰間大勝軒係好多人排,咁我一場嚟到京都梗係試返主場啦所以我就去咗代表京都嘅ますたに喇。

fullsizeoutput_113efullsizeoutput_113d

如果我冇理解錯門口嗰張poster呢佢個湯底應該係雞湯,但一樣都係好濃郁得嚟而冇左豬⻣湯有時會有嘅酥味,麵就係硬身幼麵。由於呢餐係我嘅早餐(係呀第一朝喺京都一起身出門口就食拉麵喇好堅😂)所以就食普通叉燒拉麵,正常份量唔會太多。叉燒好淋好唔係乾柴,麵硬度適中,加埋啲䓤花係好食嘅,但個湯都係有啲啲偏咸,所以湯精如我飲剩大約三分一到。提提大家拉麵小路開11點,所以唔使咁早去,我就係太早10點半去到全部都未開門只係準備中,結果都係行下伊勢丹先再返去食拉麵。

大阪道頓堀 – 花丸軒(法善寺店)(好味指數: 4.5/5)

道頓堀磯丸水產轉入去嗰條街(好似叫千日前街)有好幾間拉麵店,呢間花丸軒就係喺嗰條街。我其實都係上網睇過人地話呢度食「幸福拉麵」我先有留意呢間,咪就係嗰塊呃like紫菜上面印住「結緣」所以我覺得一定要去食囉(女人就係好鬼易呃😂)。

fullsizeoutput_1140fullsizeoutput_113f

不過其實佢個麵真係一啲都唔只係呃like,佢個醬油湯底係非常濃味!好啱我呢啲重口味嘅人!塊肉係比一般叉燒要厚身嘅豚肉仲有少少燒到焦邊好香好入味又淋,麵就係一般粗幼度都係軟硬適中。碗湯雖然濃味我又唔覺得佢好咸所以我都差不多飲晒!我叫呢碗都係正常份量,我見到佢menu有碗叫Double Happiness(佢係有英文menu唔怕唔識睇)我諗意思應該係加大啦但價錢好似都係差唔多。我見到佢枱面其實有用日文寫住要玉子同泡菜就出聲唔使錢⋯⋯隔離兩個日本妹係有攞到嘅,不過我又唔係好想食蛋就冇謂浪費喇。花丸軒仲要係24小時營業,我行到夜晚9點幾入去都唔使排隊喇,所以大家想食嘅夜啲去都唔怕!

大阪道頓堀 – 三豐麵 (好味指數: 4/5)

三豐麵就喺花丸軒對面,唔算好起眼所以冇人排隊!其實我都係上網睇見呢度有沾麵食所以我mark底嚟試。

fullsizeoutput_1141fullsizeoutput_1142

我叫左個魚湯沾麵。首先我一定要講下佢個麵,因為真係超級好食,而且佢話係自家製麵所以真係好唔一樣!佢係粗身麵,好鬼煙韌彈牙!雖然唔係曲麵但都好掛湯喎。個湯呢聞落好香魚味,但食落就偏咸,尤其食到差不多到底湯開始凍直頭覺得佢好咸。不過其實都係好食嘅,最多飲多啲水囉哈哈。

fullsizeoutput_1143

嗰湯入面配料有玉子有豚肉有筍,豚肉似五花腩好鬼厚身,反而塊肉唔係好有醃過咁但加埋啲湯嘅咸味又啱啱好喎!如果想食沾麵嘅我都推薦大家黎試試!

大阪道頓堀 – 金龍拉麵 (好味指數: 2/5)

我見佢有成兩間分店,其中千日前轉角嗰間仲要排隊,於是我咪係臨走前嗰個下晝試下佢囉。

fullsizeoutput_114a
你睇佢兩間舖分別都有條傻龍穿牆而出所以一定唔會見唔到佢。

fullsizeoutput_1147 我去咗佢後啲嗰間舖食,舖面大啲唔使排隊。全店都係用自助形式,好似見到有白飯提供添。老實說,我覺得佢舖面座位同枱都係好污糟!好似香港嘅大X食咁囉唔會想坐得耐食完快快走。

 

fullsizeoutput_114b

我又係叫普通叉燒拉麵,成碗麵包括湯叉燒同麵都只係普通,甚至乎我覺得只係比香港式拉麵店好啲啲咁囉。除咗價錢平之外(呢碗只須600yen)我諗真係冇咩吸引之處,所以大家可以慳返食第二間喇。

另外道頓堀仲有一間四天王其實我都想試,但因為條隊太長我唔想排所以作罷。不過上網睇啲comment都好兩極化,就唯有下次有機會自己親身試下啦。

同場加影,都係講食嘅不過唔係拉麵。我喺京都有兩餐嘅食店我想講下。

京都烏丸七条通 – へそ

我覺得日本立食文化其實幾好喎,尤其係租金咁貴嘅地方梗係用最少嘅地方容納最多嘅客人做多幾單生意先係最實際嘛,客人都係快食快走企下都冇乜所謂啦。我第一晚到咗京都check in咗我住地方都成夜晚10點,好鬼肚餓於是就周圍八下睇下有冇野食。我住嗰邊喺京都塔後面嘅商業住宅區,行出去烏丸七条個路口其實都只係兩三個街口,我見呢間居酒屋呢個時候仲咁多人第一時間衝入去睇下menu啱唔啱食喇。

佢除左最入面有一張枱比人坐之外其他位置都係企位,但我見啲人立食都企好耐飲酒食串燒吹水喎,當然都有啲打工仔好似我一條友咁快食快走啦。我被安排咗喺吧枱位置,喂真係好鬼貼心囉仲要有埋唔同電話腳差電線比你一邊食住一邊差電話真係太好喇卦?!食物都係一般居酒屋嗰啲野啦,我叫咗個烏冬鍋食,見呢度氣氛咁好忍唔住都叫咗杯生啤啤一啤佢。好似都有啲分店大家都不妨搵下嚟試下啦。

京都餃子之王將

哈哈係咪諗有冇搞錯呢間都講,其實我覺得呢間野有啲驚喜喎,驚喜在於佢個價錢點解可以咁平?有晚我又係搞到好鬼夜成10點先搭巴士喺烏丸七条落車,見冇食正餐有啲餓喎咁啱一落車就見到佢咪衝入去醫肚囉。佢有一個menu叫”just size menu”,樣樣分量都係細嘅啱晒我呀!我叫咗呢個menu嘅餃子一份(三隻)同炒麵,個炒麵係OK㗎喎唔差,啲汁冇話杰撻撻咁,細細一碟仔夠我食喇唔使太飽等我可以去便利店買布甸食😂。

我坐樓下吧枱,側邊全部都係收咗工嘅打工仔嚟食野。我見佢地大部份人都係食餃子,仲要係大份12件打孖上😂 嗱我咁樣食兩樣埋單500yen都有找抵到爛啦!